ວິທະຍຸກະຈາຍສຽງແຫ່ງຊາດລາວ

Lao National Radio

ຕັ້ງໜ້າຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XI ຂອງພັກ ເຂົ້າສູ່ຊີວິດຈິງ
ກະຊວງພາຍໃນ ໄດ້ຈັດກອງປະຊຸມເຜີຍແຜ່ດຳລັດ ວ່າດ້ວຍການຫັນຫົວໜ່ວຍວິຊາການເປັນເຈົ້າຕົນເອງ ແລະ ດຳລັດວ່າດ້ວຍພາລະກອນ ຂຶ້ນໃນວັນທີ 21 ມິຖຸນານີ້ ທີ່ ກະຊວງພາຍ​ໃນ, ໂດຍການເປັນປະທານ ຂອງ ທ່ານ ວິໄລວົງ ບຸດດາຄໍາ ລັດຖະມົນຕີກະຊວງພາຍໃນ, ມີບັນດາຮອງລັດຖະມົນຕີ, ບັນດາຫົວໜ້າກົມ ທີ່​ກ່ຽວ​ຂ້ອງ​ຈາກບັນດາກະຊວງ, ອົງການ ອ້ອມຂ້າງສູນກາງເຂົ້າຮ່ວມ.
ທ່ານ ວິໄລວົງ ບຸດດາຄໍາ ກ່າວວ່າ: ດັ່ງທີ່ຮັບຮູ້ແລ້ວວ່າ, ສະພາບການສາກົນ ແລະ ພາກພື້ນ ຍັງສືບຕໍ່ຜັນແປໄປຢ່າງສັບສົນ, ຄວາມຂັດແຍ່ງ, ສົງຄາມການຄ້າ ແລະ ເຕັກໂນໂລຊີ ລະຫວ່າງປະເທດມະຫາອຳນາດ ໄດ້ສົ່ງຜົນກະທົບທັງທາງກົງ ແລະ ທາງອ້ອມຢ່າງໜັກໜ່ວງ ຕໍ່ການຂະຫຍາຍຕົວເສດຖະກິດ ເຮັດໃຫ້ລາຄາພະລັງງານ, ສິນຄ້າອຸປະໂພກ ບໍລິໂພກ ແລະ ເງິນເຟີ້ສູງຂຶ້ນ ຊຶ່ງສະພາບການທັງໝົດນັ້ນ ໄດ້ສົ່ງຜົນກະທົບໂດຍກົງ ຕໍ່ກັບການພັດທະນາເສດຖະກິດ-ສັງຄົມ ຂອງຫຼາຍປະເທດໃນໂລກ ກໍຄືປະເທດເຮົາ ແລະ ການດໍາລົງຊິວິດຂອງພະນັກງານ-ລັດຖະກອນ, ທະຫານ, ຕຳຫຼວດ ແລະ ໄປເຖິງປະຊາຊົນລາວບັນດາເຜົ່າ ຢ່າງຫຼີກລຽງບໍ່ໄດ້. ສູນກາງພັກ ຈຶ່ງໄດ້ກຳນົດແນວທາງນະໂຍບາຍ ເພື່ອປັບປຸງການຄຸ້ມຄອງລັດ, ຄຸ້ມຄອງເສດຖະກິດ-ສັງຄົມຂອງ ສປປ ລາວ ໃຫ້ມີຄວາມເຂັ້ມແຂງເທື່ອລະກ້າວ ເປັນຕົ້ນແມ່ນ: ມະຕິວ່າດ້ວຍການເພີ່ມທະວີການນໍາພາແກ້ໄຂຄວາມຫຍຸ້ງຍາກ ດ້ານເສດຖະກິດ-ການເງິນ ແລະ ສ້າງຄວາມເຂັ້ມແຂງຂອງການຄຸ້ມຄອງມະຫາພາກ ສະບັບເລກທີ 057/ຄບສພ, ລົງວັນທີ 19 ທັນວາ 2018, ມະຕິວ່າດ້ວຍການຍູ້ແຮງການຜັນຂະຫຍາຍແນວທາງປ່ຽນແປງໃໝ່ສູ່ລວງເລິກ ສ້າງການຫັນປ່ຽນທີ່ແຂງແຮງ, ເລິກເຊິ່ງ ແລະ ຮອບດ້ານ ໃນການນໍາພາຂອງພັກ ສະບັບເລກທີ 05/ຄບສພ, ລົງວັນທີ 5 ກັນຍາ 2023 ແລະ ມະຕິວ່າດ້ວຍການສ້າງເສດຖະກິດ ເອກະລາດ ເປັນເຈົ້າຕົນເອງ ໃນໄລຍະໃໝ່ ສະບັບເລກທີ 04/ກມສພ, ລົງວັນທີ 11 ເມສາ 2024, ພ້ອມກັນນັ້ນ ສະພາແຫ່ງຊາດກໍໄດ້ອອກມະຕິວ່າດ້ວຍການຮັບຮອງເອົາວາລະແຫ່ງຊາດວ່າດ້ວຍການແກ້ໄຂຄວາມຫຍຸ້ງຍາກທາງດ້ານເສດຖະກິດ-ການເງິນ ສະບັບເລກທີ 03/ສພຊ, ລົງວັນທີ 1 ຕຸລາ 2021 ຊຶ່ງວຽກງານຈຸດສຸມໜຶ່ງໃນນັ້ນ ແມ່ນການປັບປຸງກົງຈັກການຈັດຕັ້ງລັດໃຫ້ກະທັດຮັດ, ສ້າງຄວາມເຂັ້ມແຂງໃຫ້ຫົວໜ່ວຍວິຊາການຂອງລັດໃຫ້ສາມາດເຄື່ອນໄຫວວຽກງານວິຊາສະເພາະຂອງຕົນຢ່າງມີປະສິດທິພາບ, ຄົ້ນຄວ້າກົນໄກເພື່ອຫັນຫົວໜ່ວຍວິຊາການ ອອກຈາກການຄຸ້ມຄອງບໍລິຫານເກື້ອກູນຂອງລັດ ໄປສູ່ການຄຸ້ມຄອງເປັນເຈົ້າຕົນເອງ ກ້າວໄປເຖິງໃຫ້ສາມາດກຸ້ມຕົນເອງທາງດ້ານງົບປະມານ ເພື່ອຫຼຸດຜ່ອນການແບກຫາບຂອງລັດຖະບານ ທາງດ້ານງົບປະມານ ໂດຍສະເພາະແມ່ນລາຍຈ່າຍງົບປະມານທີ່ນໍາໃຊ້ເຂົ້າໃນການເຄື່ອນໄຫວວຽກງານ ທີ່ບໍ່ມີປະສິດທິພາບ-ບໍ່ມີປະສິດທິດຜົນ ແລະ ຫັນປ່ຽນລັດຖະກອນ ຂອງຫົວໜ່ວຍວິຊາການເປັນພາລະກອນ ຫຼື ຮູບການອື່ນ ຈຶ່ງຈະສາມາດຫຼຸດຜ່ອນການແບກຫາບຂອງລັດຖະບານທາງດ້ານງົບປະມານລາຍຈ່າຍບໍລິຫານ ແລະ ເງິນເດືອນຂອງພະນັງານ-ລັດຖະກອນລົງໄດ້.
ເພື່ອເປັນການຜັນຂະຫຍາຍແນວທາງນະໂຍບາຍທີ່ໄດ້ກ່າວມານັ້ນ, ລັດຖະບານໄດ້ອອກມະຕິວ່າ ດ້ວຍການແບ່ງຄວາມຮັບຜິດຊອບໃນການຈັດຕັ້ງຜັນຂະຫຍາຍ ມະຕິຂອງສະພາແຫ່ງຊາດ ສະບັບເລກທີ 07/ລບ, ລົງວັນທີ 4 ຕຸລາ 2021, ມະຕິວ່າດ້ວຍການແບ່ງຄວາມຮັບຜິດຊອບໃນການຈັດຕັ້ງປະຕິບັດ ມະຕິຂອງຄະນະບໍລິຫານງານສູນກາງພັກ ສະບັບເລກທີ 17/ລບ, ລົງວັນທີ 12 ທັນວາ 2023, ມະຕິວ່າ ດ້ວຍການແບ່ງຄວາມຮັບຜິດຊອບໃນການຈັດຕັ້ງປະຕິບັດມະຕິຂອງກົມການເມືອງສູນກາງພັກ ສະບັບເລກ ທີ 05/ລບ, ລົງວັນທີ 21 ພຶດສະພາ 2024 ຊຶ່ງໄດ້ມອບໃຫ້ກະຊວງພາຍໃນ ຮັບຜິດຊອບກ່ຽວກັບການ ປັບປຸງກົງຈັກການຈັດຕັ້ງ, ການຫຼຸດຜ່ອນຈໍານວນລັດຖະກອນ, ການຄົ້ນຄວ້າກົນໄກເພື່ອຫັນຫົວໜ່ວຍ ວິຊາການອອກຈາກການຄຸ້ມຄອງບໍລິຫານເກື້ອກູນຂອງລັດ ໄປສູ່ການຄຸ້ມຄອງເປັນເຈົ້າຕົນເອງ ກ້າວໄປເຖິງ ໃຫ້ສາມາດກຸ້ມຕົນເອງທາງດ້ານງົບປະມານ ແລະ ການຫັນປ່ຽນລັດຖະກອນຂອງຫົວໜ່ວຍວິຊາການ ເປັນຮູບການອື່ນ ເຊັ່ນ: ພາລະກອນ, ພະນັກງານຕາມສັນຍາ ຫຼື ເປັນຜູ້ຊ່ຽວຊານ ເພື່ອເປັນການສົ່ງເສີມການພັດທະນາດ້ານວິຊາສະເພາະ ໃຫ້ກາຍເປັນມືອາຊີບ.
ກອງປະຊຸມຄັ້ງນີ້ ແມ່ນການເຜີຍແຜ່ດຳລັດວ່າດ້ວຍການຫັນຫົວໜ່ວຍວິຊາການເປັນເຈົ້າຕົນເອງ ແລະ ດຳລັດວ່າດ້ວຍພາລະກອນ ເພື່ອສ້າງຄວາມຮັບຮູ້ ແລະ ເຂົ້າໃຈ ໃຫ້ເປັນເອກະພາບກັນໃນການຈັດຕັ້ງປະຕິບັດ ຊຶ່ງກອງປະຊຸມ ຈະໄດ້ຮັບຟັງການນໍາສະເໜີເນື້ອໃນຂອງດໍາລັດທັງສອງສະບັບ ແລະ ສະເໜີໃຫ້ຜູ້​ເຂົ້າ​ຮ່ວມ ຍົກເອົາປະເດັນທີ່ມີຄວາມສົນໃຈ ຫຼື ຍັງບໍ່ທັນເຂົ້າໃຈແຈ້ງ ຕໍ່ກັບເນື້ອໃນຂອງທັງສອງດໍາລັດ ເພື່ອສົນທະນາ, ແລກປ່ຽນກັບ ຄະນະວິຊາການ.
ຂ່າວ-ພາບ: ແສງຈັນ