ສະມາຄົມ ສົ່ງເສີມການຮຽນຮູ້ ເພື່ອການພັດທະນາ ເຜີຍແຜ່ຂໍ້ມູນຂ່າວສານ, ນະໂຍບາຍ ແລະ ການສະໝັກຂໍທຶນ ຈາກແຜນງານກອງທຶນຂະໜາດນ້ອຍ ຂອງກອງທຶນ ສິ່ງແວດລ້ອມໂລກ ໃນວັນທີ 26 ມິຖູນາ 2024 ທີ່ແຂວງອຸດົມໄຊ ໂດຍການເປັນປະທານຂອງທ່ານ ນາງ ເພັງ ສຸດາພອນ ຮອງປະທານ ສະມາຄົມ ສົ່ງເສີມການຮຽນຮູ້ ເພື່ອການພັດທະນາ, ທ່ານ ຄຳສະຫວ່າງ ຈັນທອງພິລຸນ ຮອງພະແນກສຶກສາທິການ ແລະ ກິລາແຂວງ, ທ່ານ ບຸນມີ ພົມມະກອນ ຜູ້ປະສານງານ ແຜນງານກອງທຶນຂະໜາດນ້ອຍ ກອງທຶນ ສິ່ງແວດລ້ອມໂລກ ພ້ອມດ້ວຍຄູ່ຮ່ວມງານ ຈາກແຂວງຊຽງຂວາງ, ບໍ່ແກ້ວ, ຫລວງພະບາງ ແລະ ພາກສ່ວນກ່ຽວຂ້ອງ ທີ່ເປັນກຸ່ມເປົ້າໝາຍຂອງສະມາຄົມ ເຂົ້າຮ່ວມ.
ການສຳມະນາຄັ້ງນີ້ ກໍເພື່ອເຜີຍແຜ່ຂໍ້ມູນຂ່າວສານ, ນະໂຍບາຍ ແລະ ການສະໝັກຂໍທຶນ ຈາກແຜນງານກອງທຶນຂະໜາດນ້ອຍ, ເປັນການເລືອກອົງກອນທີ່ສອດຄ່ອງຕາມເງື່ອນໄຂ ແລະ ມີຄວາມເໝາະສົມໃນການສະໝັກຂໍທຶນ. ພ້ອມແນະນຳການຂຽນບົດສະເໜີໂຄງການຄາດຄະເນຜົນໄດ້ຮັບ, ຮຽນຮູ້ໃນການຂໍທຶນ, ຂັ້ນຕອນໃນການກະກຽມ, ນໍາສະເໜີບົດໂຄງການເພື່ອຂໍທຶນ, ບົດນໍາສະເໜີ ໃນການແນະນໍາ ແຜນງານ ກອງທຶນຂະໜາດນ້ອຍ, ກອງທຶນ ສິ່ງແວດລ້ອມໂລກ ແລະ ນະໂຍບາຍຕ່າງໆຂອງແຜນງານ, ອົງກອນ ຫລື ພາກສ່ວນທີ່ສາມາດມີສິດສະໝັກຂໍທຶນ, ບົດນໍາສະເໜີໃນການແນະນໍາ ແລະ ເອກະສານຈໍາເປັນທີ່ກະກຽມໃນການຂໍທຶນ ການວິເຄາະເຄືອບັນຫາ ເພື່ອກໍານົດກອບແນວຄວາມຄິດໂຄງການ, ນໍາສະເໜີຜົນຂອງການວິເຄາະເຄືອບັນຫາ ແລະ ການກໍານົດກອບແນວຄວາມຄິດໂຄງການ ໃນການຈັດຕັ້ງປະຕິບັດໃນການວິເຄາະເຄືອບັນຫາ.
ທັງນີ້ ກໍເພື່ອເຮັດໃຫ້ຄູ່ຮ່ວມງານແຜນງານ ກອງທຶນຂະໜາດນ້ອຍຂອງກອງທຶນ ສິ່ງແວດລ້ອມໂລກ ເຊັ່ນ: ກຸ່ມກະສິກອນ ແລະ ອົງການຈັດຕັ້ງຊຸມຊົນ, ສະຖາບັນການສຶກສາ, ມູນນິທິ, ອົງການທີ່ບໍ່ຫັວງຜົນກໍາໄລ ແລະ ອົງການຈັດຕັ້ງມະຫາຊົນ (ຊາວໜຸ່ມ ແລະ ແມ່ຍິງ) ກຳໄດ້ວິທີການສະໝັກຂໍທຶນ ແນ່ໃສ່ເຮັດໃຫ້ການດໍາເນີນແຜນການເຄື່ອນໄຫວ ຖືກຕ້ອງ ສອດຄ່ອງກັບແນວທາງຂອງພັກ-ລັດ, ຖືກຕ້ອງກັບນະໂຍບາຍຂອງແຜນງານກອງທຶນຂະໜາດນ້ອຍ ຂອງກອງທຶນສິ່ງແວດລ້ອມໂລກ. ການສຳມະນາຄັ້ງນີ້ໄດ້ຮັບການສະໜັບສະໜູນຈາກ ກອງທຶນສິ່ງແວດລ້ອມໂລກ ແຜນງານກອງທຶນຂະໜາດນ້ອຍ.
ຂ່າວ: ຄຳພັນ ແກ້ວມະນີ
