ກະຊວງອຸດສາຫະກຳ ແລະ ການຄ້າ ຈັດສໍາມະນາແລກປ່ຽນຄວາມຮູ້ ໃນຫົວຂໍ້: “ບົດບາດຂອງອຸດສາຫະກຳປຸງແຕ່ງມັນຕົ້ນ ຂອງ ສປປ ລາວ ຢູ່ໃນຕ່ອງໂສ້ມູນຄ່າເພີ່ມລະດັບພາກພື້ນ” ໃນວັນທີ 10 ພຶດສະພາ 2024 ຜ່ານມາ ໂດຍການເປັນປະທານຂອງ ທ່ານນາງ ຈັນສຸກ ແສງພະຈັນ ຮອງລັດຖະມົນຕີກະຊວງອຸດສາຫະກຳ ແລະ ການຄ້າ (ອຄ).
ທ່ານ ນາງ ຈັນສຸກ ແສງພະຈັນ ໄດ້ໃຫ້ຮູ້ວ່າ: ໂຄງການຄົ້ນຄວ້າບົດບາດຂອງອຸດສາຫະກຳປຸງແຕ່ງມັນຕົ້ນ ຂອງ ສປປ ລາວ ຢູ່ໃນຕ່ອງໂສ້ມູນຄ່າເພີ່ມລະດັບພາກພື້ນ ແມ່ນໄດ້ຮັບການສະໜັບສະໜູນຈາກມະຫາວິທະຍາໄລ ມິຊີແກນ ປະເທດສະຫະລັດອາເມລິກາ ພາຍໃຕ້ PRCI ໂດຍມີຈຸດປະສົງ ເພື່ອສຶກສາເຖິງບົດບາດຂອງອຸດສາຫະກໍາປຸງແຕ່ງມັນຕົ້ນ ຂອງ ສປປ ລາວ ຢູ່ໃນຕ່ອງໂສ້ມູນຄ່າເພີ່ມລະດັບພາກພື້ນ ເຊິ່ງອຸດສາຫະກໍາປຸງແຕ່ງຜະລິດຕະ ພັນຈາກກະສິກໍາ ໂດຍສະເພາະມັນຕົ້ນ ແມ່ນໜຶ່ງໃນອຸດສາຫະກໍາທີ່ສໍາຄັນ ປະກອບສ່ວນເຂົ້າໃນໂຄງປະກອບເສດຖະກິດ-ສັງຄົມ, ຕິດພັນກັບການສ້າງວຽກເຮັດງານທໍາ ແລະ ຫລຸດຜ່ອນຄວາມທຸກຍາກຂອງປະຊາຊົນ. ປັດຈຸບັນ, ການຄົ້ນຄວ້າດັ່ງກ່າວ, ໄດ້ສໍາເລັດ ແລະ ໄດ້ຮັບການປະກອບຄໍາເຫັນຈາກຜູ້ຊ່ຽວຊານຈາກພາຍນອກແລ້ວ.
ກອງປະຊຸມຄັ້ງນີ້, ເພື່ອນໍາສະເໜີຜົນການຄົ້ນຄວ້າດັ່ງກ່າວ ແລະ ແລກປ່ຽນທາງດ້ານວິຊາການ ເພື່ອເປັນຂໍ້ມູນໃນການປັບປຸງ ແລະ ສະເໜີແນະທາງດ້ານນະໂຍບາຍ ໃນການສົ່ງເສີມບົດບາດຂອງຂະ ແໜງອຸດສາຫະກໍາປຸງແຕ່ງມັນຕົ້ນຂອງ ສປປ ລາວ ເພື່ອເຂົ້າຮ່ວມຕ່ອງໂສ້ມູນຄ່າເພີ່ມ ໃນລະດັບພາກພື້ນ ໃຫ້ເກີດປະໂຫຍດສູງສຸດ ເຊິ່ງໄດ້ນໍາສະເໜີກ່ຽວກັບໂຄງການຄົ້ນຄວ້າດ້ານນະໂຍບາຍ, ການສ້າງຄວາມອາດສາມາດ ແລະ ການກະທົບຕໍ່ການຈັດຕັ້ງປະຕິບັດວຽກງານໃນ ສປປ ລາວ, ພ້ອມທັງ ຈັດເວທີສໍາມະນາເຜີຍແຜ່ບົດຄົ້ນຄວ້າ ໃນຫລາຍຫົວຂໍ້ສຳຄັນ ເປັນຕົ້ນ ຄົ້ນຄວ້າບົດບາດຂອງອຸດສາຫະກຳປຸງແຕ່ງມັນຕົ້ນຂອງ ສປປ ລາວ ຢູ່ໃນຕ່ອງໂສ້ງມູນຄ່າເພີ່ມລະດັບພາກພື້ນ ໂດຍລົງເລິກກ່ຽວກັບສະພາບທົ່ວໄປຂອງອຸດສາຫະກຳປຸງແຕ່ງມັນຕົ້ນ, ບົດຮຽນທີ່ຜ່ານມາ ແລະ ທົບທວນຄືນທິດສະດີ. ນອກຈາກນັ້ນ, ຍັງໄດ້ແລກປ່ຽນບົດບາດຂອງອຸດສາຫະກຳປຸງແຕ່ງມັນຕົ້ນຂອງ ສປປ ລາວ ຢູ່ໃນຕ່ອງໂສ້ມູນຄ່າເພີ່ມລະດັບພາກພື້ນ ກ່ຽວກັບວິທີການສຶກສາ, ການວິເຄາະ ແລະ ຜົນການສຶກສາ.
ອີງຕາມສະຖິຕິ ພື້ນທີ່ປູກມັນຕົ້ນແມ່ນເພີ່ມຂຶ້ນຈາກ 100.000 ເຮັກ ໃນປີ 2020 ເປັນ 249.279 ເຮັກຕາ ໃນປີ 2023, ມູນຄ່າການສົ່ງອອກ ເພີ່ມຂຶ້ນຈາກ 193 ລ້ານໂດລາ ເປັນ 333 ລ້ານໂດລາ ໂດຍປະຊາຊົນລາວ ນິຍົມປູກມັນຕົ້ນ ສ່ວນໃຫຍ່ແມ່ນຢູ່ບັນດາແຂວງພາກກາງ ແລະ ພາກໃຕ້ ທີ່ມີຊາຍແດນຕິດກັບປະເທດເພື່ອນບ້ານ ຍ້ອນຄວາມຕ້ອງການຂອງຕະຫລາດ ແລະ ລາຄາສູງ. ການສົ່ງເສີມການປູກຢູ່ທ້ອງຖິ່ນສ່ວນຫລາຍ ແມ່ນສົ່ງຂາຍມັນແຫ້ງ ແລະ ມັນດິບຜ່ານພໍ່ຄ້າ ແລະ ຂາຍໂດຍກົງໃຫ້ໂຮງງານ ເພື່ອປຸງແຕ່ງເປັນແປ້ງມັນຕົ້ນ ເພື່ອຈໍາໜ່າຍທັງພາຍໃນ ແລະ ສົ່ງອອກ ຕ່າງປະເທດ ຄື: ປະເທດໄທ, ສສ ຫວຽດນາມ ແລະ ສປ ຈີນ.
ຂໍ້ມູນ-ພາບ: ໄພວັນ ສູນສະຖິຕິ ແລະ ຂໍ້ມູນຂ່າວສານ ຫອຄ
