ເຜີຍແຜ່ວຽກງານຮ່ວມມືອາຊຽນທາງດ້ານຍຸຕິທໍາ ແລະ ກົດຫມາຍ

ກະຊວງຍຸຕິທຳຈັກກອງປະຊຸມເຜີຍແຜ່ວຽກງານຮ່ວມມືອາຊຽນທາງດ້ານຍຸຕິທໍາ ແລະ ກົດໝາຍ ຂອງ ສປປ ລາວ

ໃນວັນທີ 19 ມິຖຸນາ 2024 ທີ່ນະຄອນຫຼວງວຽງຈັນ ໂດຍການໃຫ້ກຽດເປັນປະທານຂອງ ທ່ານ ເກດສະໜາ ພົມມະວົງ ຮອງຮັດຖະມົນຕີກະຊວງຍຸຕິທຳ.

ຈຸດປະສົງເພື່ອສ້າງຄວາມຮັບຮູ້ ແລະ ຄວາມເຂົ້າໃຈທີ່ດີຂຶ້ນໃຫ້ພະນັກງານຂອງກະຊວງຍຸຕິທໍາ ແຫ່ງ ສປປ ລາວ ກ່ຽວກັບຜົນ ງານ ແລະ ຜົນສໍາເລັດວຽກຮ່ວມມືອາຊຽນ ໃນຂະແໜງການຍຸຕິທໍາ ແລະ ກົດໝາຍ ຊຶ່ງຜູ້ເຂົ້າຮ່ວມໄດ້ຮັບຟັງການເຜີຍແຜ່ກ່ຽວ ກັບຄວາມເປັນມາ ແລະ ຜົນສໍາເລັດອັນພົ້ນເດັ່ນ ທີ່ ສປປ ລາວ ຍາດມາໄດ້ ຈາກການເຂົ້າເປັນສະມາຊິກປະຊາຄົມບັນດາປະຊາ ຊາດອາຊີອາເວັນອອກສຽງໃຕ້ (ອາຊຽນ); ການປະກອບສ່ວນຂອງ ກະຊວງຍຸຕິທໍາ ແຫ່ງ ສປປ ລາວ ໃນການຮ່ວມມືທາງດ້ານຍຸຕິທໍາ ແລະ ກົດໝາຍ ໃນພາກພື້ນອາຊຽນ; ລະບຽບການໃນການນໍາໃຊ້ງົບປະມານການ ເຄື່ອນໄຫວວຽກງານອາຊຽນ ຂອງລັດຖະບານ ແຫ່ງ ສປປ ລາວ ແລະ ນິຕິກຳອື່ນໆ ທີ່ກ່ຽວຂ້ອງກັບການການນໍາໃຊ້ງົບປະມານໃນການເຄື່ອນໄຫວວຽກງານອາຊຽນ ຂອງ ສປປ ລາວ.

ຫຼັງຈາກນັ້ນ, ຜູ້ເຂົ້າຮ່ວມ ກໄດ້ພ້ອມກັນສົນທະນາແລກປ່ຽນຄໍາຄິດຄຳເຫັນຕໍ່ເນື້ອໃນບົດສະເໜີດັ່ງກ່າວທີ່ສາມາດນຳໄປຈັດຕັ້ງປະຕິບັດໄດ້ໃນຕໍ່ໜ້າ ແລະ ເປັນບ່ອນອີງສຳຄັນທາງດ້ານເອກະສານ ໃຫ້ແກ່ພາກສ່ວນທີ່ກ່ຽວຂ້ອງ ໃນການນຳໄປຈັດຕັ້ງປະຕິບັດວຽກງານຂອງຕົນ.

ຂ່າວ-ພາບ ໂດຍ: ຊາຍພິມພອນ ສີຣິວົງໄຊ