ວັນທີ 20 ພຶດສະພາ 2024 ກະຊວງປ້ອງກັນຄວາມສະຫງົບ ໄດ້ຈັດກອງປະຊຸມເຜີຍແຜ່ເຊື່ອມຊຶມການຜັນຂະຫຍາຍ ແລະ ຈັດຕັ້ງປະຕິບັດ ຂໍ້ຕົກລົງວ່າດ້ວຍການຮ່ວມມື ປະຈໍາປີ 2024 ແລະ ບົດບັນທຶກກອງປະຊຸມ ຄັ້ງທີ 46 ຂອງຄະນະກຳມະການຮ່ວມມືທະວິພາຄີ ລະຫວ່າງລັດຖະບານແຫ່ງ ສປປ ລາວ ແລະ ລັດຖະບານແຫ່ງ ສສ ຫວຽດນາມ ທີ່ໄດ້ລົງນາມຮ່ວມກັນໃນຄັ້ງວັນທີ 07 ມັງກອນ 2024 ທີ່ນະຄອນຮ່າໂນ້ຍ ສສ ຫວຽດນາມ, ເປັນກຽດເຜີຍແຜ່ເອກະສານໂດຍ ພົນໂທ ກົງທອງ ພົງວິຈິດ ກໍາມະການສູນກາງພັກ, ຮອງລັດຖະມົນຕີ ກະຊວງປ້ອງກັນຄວາມສະຫງົບ.
ພົນໂທ ກົງທອງ ພົງວິຈິດ ກ່າວວ່າ: ລັດຖະບານ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ ແລະ ລັດຖະບານ ແຫ່ງ ສາທາລະນະລັດ ສັງຄົມນິຍົມຫວຽດນາມ ສອງຝ່າຍ ໄດ້ຕົກລົງກ່ຽວກັບເນື້ອໃນການຮ່ວມມື ປະຈໍາປີ 2024 ຄື: ຢືນຢັນເປົ້າໝາຍສືບຕໍ່ນໍາເອົາສາຍພົວພັນດ້ານການເມືອງ ເຂົ້າສູ່ລວງເລິກ, ເປັນແກນຫຼັກກຳນົດທິດລວມຂອງການພົວພັນຮ່ວມມື ລະຫວ່າງ ສອງປະເທດ; ສຸມໃສ່ແລກປ່ຽນດ້ານການຮ່ວມມື ໃນບັນດາຍຸດທະສາດ, ແນວທາງ, ນະໂຍບາຍພົວພັນເຖິງຄວາມສະຫງົບ ແລະ ການພັດທະນາຂອງແຕ່ລະປະເທດ; ສືບຕໍ່ຍົກສູງປະສິດທິຜົນຂອງການຄົ້ນຄວ້າປ່ຽນແປງໃໝ່ຮູບແບບການຮ່ວມມື, ຊ່ວຍເຫຼືອເຊິ່ງກັນ ແລະ ກັນ ລະຫວ່າງ ບັນດາກະຊວງ, ຂະແໜງການ, ທ້ອງຖິ່ນ, ໂດຍສະເພາະແມ່ນບັນດາທ້ອງຖິ່ນທີ່ມີຊາຍແດນຮ່ວມກັນ; ສືບຕໍ່ຮັກສາການຢ້ຽມຢາມຂອງການນໍາຂັ້ນສູງ ສອງພັກ, ສອງລັດ; ເປັນເຈົ້າການ, ເພີ່ມທະວີແລກປ່ຽນຂໍ້ມູນຂ່າວສານ, ແບ່ງປັນບົດຮຽນປະສົບການຢູ່ແຕ່ລະຂັ້ນ, ແຕ່ລະຂະແໜງການ ກ່ຽວກັບບັນຫາໃໝ່ ໃນວຽກງານກໍ່ສ້າງພັກ, ສ້າງລະບົບການເມືອງ, ພັດທະນາເສດຖະກິດ-ສັງຄົມ, ຮັບປະກັນສະຖຽນລະພາບດ້ານເສດຖະກິດມະຫາພາກ, ເປີດກວ້າງການພົວພັນ, ເຊື່ອມໂຍງສາກົນ ແລະ ບັນດາບັນຫາໃໝ່; ສອງຝ່າຍ ຍູ້ແຮງວຽກງານໂຄສະນາ, ສຶກສາອົບຮົມກ່ຽວກັບສາຍພົວພັນ ລາວ-ຫວຽດນາມ; ປະສານສົມທົບກັນກໍ່ສ້າງບັນດາກິດຈະການ ແລະ ຮ່ອງຮອຍປະຫວັດສາດ ກ່ຽວກັບສາຍພົວພັນສາມັກຄີພິເສດ ລາວ- ຫວຽດນາມ ຢູ່ແຕ່ລະປະເທດ ໃນນັ້ນ ລວມທັງຮ່ອງຮອຍເສັ້ນທາງໂຮ່ຈີມິນພາກຕາເວັນຕົກຂອງສາຍພູຫຼວງ (ຕອນຢູ່ດິນແດນຂອງລາວ), ເຂດຮ່ອງຮອຍສະຖານທີ່ຈັດກອງປະຊຸມໃຫຍ່ ຄັ້ງທີ I ຂອງພັກປະຊາຊົນ ປະຕິວັດລາວ ຢູ່ເຂດຊາຍແດນ ລະຫວ່າງສອງປະເທດ, ຊຸກຍູ້ຄວາມຄືບໜ້າໂຄງການສວນອຸທິຍານມິດຕະພາບ ລາວ-ຫວຽດນາມ ຢູ່ນະຄອນຫຼວງວຽງຈັນ; ສືບຕໍ່ກວດກາ ແລະ ປະຕິບັດການຍ້ອງຍໍດ້ວຍຫຼຽນກາ, ຫຼຽນໄຊ ໃຫ້ແກ່ບັນດາກົມກອງລວມໝູ່ ແລະ ບຸກຄົນ ທີ່ມີຜົນງານດີເດັ່ນ ທີ່ໄດ້ປະກອບສ່ວນເຂົ້າໃນການປັບປຸງ ແລະ ເສີມຂະຫຍາຍການຮ່ວມມືພິເສດ ລາວ-ຫວຽດນາມ; ແກ້ໄຂຢ່າງທັນການບັນຫາຂໍ້ຫຍຸ້ງຍາກຕ່າງໆ ທີ່ເກີດຂຶ້ນໃນການພົວພັນສອງປະເທດ, ບົນຈິດໃຈສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານ ລາວ-ຫວຽດນາມ, ຫວຽດນາມ-ລາວ.
ພ້ອມດຽວກັນນີ້, ພົນໂທ ກົງທອງ ພົງວິຈິດ ຍັງໄດ້ຍົກໃຫ້ເຫັນຕື່ມອີກກຽ່ວກັບເອກະສານບົດບັນທຶກກອງປະຊຸມ ຄັ້ງທີ 46 ຂອງຄະນະກຳມະການຮ່ວມມືທະວິພາຄີ ລະຫວ່າງລັດຖະບານແຫ່ງ ສປປ ລາວ ແລະ ລັດຖະບານແຫ່ງ ສສ ຫວຽດນາມ ທີ່ໄດ້ລົງນາມຮ່ວມກັນ ໃນຄັ້ງວັນທີ 07 ມັງກອນ 2024 ທີ່ນະຄອນຮ່າໂນ້ຍ ສສ ຫວຽດນາມ, ເຊິ່ງໃນບົດບັດທຶກດັ່ງກ່າວ ສອງຝ່າຍໄດ້ເຫັນດີເປັນເອກະພາບລົງນາມຮ່ວມມືກັນຫຼາຍວຽກງານທີ່ສໍາຄັນ ເພື່ອການສ້າງສາພັດທະນາປະເທດຊາດ ສອງປະເທດ ລາວ-ຫວຽດນາມ, ໃນນີ້, ສອງຝ່າຍ ໄດ້ສືບຕໍ່ປະສານສົມທົບກັນຜັນຂະຫຍາຍເປັນຢ່າງດີ ບັນດາຂໍ້ຕົກລົງການຮ່ວມມື ຂອງສອງປະເທດ ໃນຂົງເຂດປ້ອງກັນຊາດ-ປ້ອງກັນຄວາມສະຫງົບ, ປະກອບສ່ວນເຂົ້າໃນການຮັກສາສະຖຽນລະພາບ, ຄວາມເປັນລະບຽບຮຽບຮ້ອຍທາງສັງຄົມຂອງແຕ່ລະປະເທດ; ສ້າງເສັ້ນຊາຍແດນ ລາວ-ຫວຽດນາມ ເປັນເສັ້ນຊາຍແດນແຫ່ງສັນຕິພາບ, ສະຖຽນລະພາບ, ມິດຕະພາບ ແລະ ພັດທະນາຮອບດ້ານ. ປະສານສົມທົບກັນລາດຕະເວນສອງຝ່າຍ, ຄຸ້ມຄອງ, ປົກປັກຮັກສາເສັ້ນຊາຍແດນ ແລະ ຫຼັກໝາຍຊາຍແດນ ໃຫ້ມີຄວາມແໜ້ນແກ່ນ, ຄວບຄຸມການເຂົ້າ-ອອກເມືອງ ຢູ່ບັນດາດ່ານຊາຍແດນ, ສ້າງເງື່ອນໄຂໃຫ້ແກ່ຄົນ, ພາຫະນະ, ສິນຄ້າຜ່ານດ່ານຊາຍ ແດນ; ກວດກາການເຄື່ອນໄຫວຜ່ານດ່ານຊາຍແດນ, ຄວບຄຸມ ການເຄື່ອນໄຫວຂ້າມຊາຍແດນຢ່າງເຂັ້ມງວດ; ສະກັດກັ້ນການເຄື່ອນໄຫວເຂົ້າ-ອອກເມືອງທີ່ຜິດກົດໝາຍ; ປະສານສົມທົບກັນໃນການຕໍ່ສູ້, ສະກັດກັ້ນກົນອຸບາຍ, ການເຄື່ອນໄຫວມ້າງເພທໍາລາຍຂອງບັນດາອິດທິກຳລັງປໍລະປັກ, ພວກປະຕິການ ໂດຍສະເພາະການເຄື່ອນໄຫວສ້າງຕັ້ງ “ລັດແບ່ງແຍກເອກະລາດ”; ສະກັດກັ້ນອາຊະຍາກຳ, ເປັນຕົ້ນແມ່ນ ອາຊະຍາກຳຂ້າມຊາດ, ຢາເສບຕິດ, ການຄ້າມະນຸດ, ຄ້າຂາຍເຖື່ອນ, ຄຸ້ມຄອງການເຂົ້າ- ອອກເມືອງ, ບັນຫາການຍົກຍ້າຍທີ່ຢູ່ອາໄສແບບຜິດກົດໝາຍ ແລະ ອື່ນໆ ຮັບປະກັນຄວາມສະຫງົບ, ຄວາມປອດໄພ ຂອງສອງປະເທດ.
ທີ່ມາ: ຄວາມສະຫງົບລາວ
