ກອງປະຊຸມເຜີຍແຜ່ປຶ້ມຄູ່ມື ມາດຕະຖານ ຂັ້ນຕອນປະຕິບັດ ການຄຸ້ມຄອງ ການຍຶດຫຼັກຖານ ອາຊະຍາກໍາສັດປ່າ ໃຫ້ເຈົ້າໜ້າທີ່ກວດກາປ່າໄມ້ 10 ແຂວງຄື : ນະຄອນຫຼວງວຽງຈັນ, ຫົວພັນ, ບໍລິຄໍາໄຊ, ໄຊສົມບູນ, ສະຫວັນນະເຂດ, ສາລະວັນ, ເຊກອງ, ຈໍາປາສັກ, ອັດຕະປື ແລະ ແຂວງຄໍາມ່ວນ ໄດ້ຈັດຂຶ້ນໃນວັນທີ 8 ສິງຫາຜ່ານມາ ທີ່ແຂວງຄຳມ່ວນ ໂດຍການເຂົ້າຮ່ວມຂອງ ທ່ານ ເດດສັກດາ ມະນີຄໍາ ຫົວໜ້າພະແແນກກະສິກໍາ-ປ່າໄມ້ແຂວງຄໍາມ່ວນ, ທ່ານ ຄໍາພອນ ມູນລະໄມ ຫົວໜ້າກົມກວດກາປ່າໄມ້, ກະຊວງກະສິກໍາ ແລະ ປ່າໄມ້, ມີທ່ານ ສັນຕິ ໄຊປັນຍາ ຫົວໜ້າອົງການອະນຸລັກສັດປ່າ ປະຈໍາ ສປປ ລາວ (WCS), ມີບັນດາຫົວໜ້າ, ຮອງຫົວໜ້າກອງກວດກາປ່າໄມ້, ເຈົ້າໜ້າທີ່ປ່າໄມ້ ແລະ ຂະແໜງກ່ຽວຂ້ອງເຂົ້າຮ່ວມ.
ທ່ານ ຄໍາພອນ ມູນລະໄມ ໄດ້ມີຄໍາເຫັນວ່າ: ຈຸດປະສົງກອງປະຊຸມຄັ້ງນີ້ ເພື່ອຜ່ານຂໍ້ຕົກລົງ ວ່າດ້ວຍການຮັບຮອງ ແລະ ປະກາດໃຊ້ ປື້ມຄູ່ມື ມາດຕະຖານ ຂັ້ນຕອນປະຕິບັດ ການຄຸ້ມຄອງ ການຍຶດຫຼັກຖານ ອາຊະຍາກຳສັດປ່າ ສະບັບເລກທີ 0994/ກກປມ, ລົງວັນທີ 11 ກໍລະກົດ 2024. ນອກຈາກນີ້, ຍັງເປັນໂອກາດອັນດີ ທີ່ຈະໄດ້ປຶກສາຫາລື ວຽກງານຕ້ານ ແລະ ສະກັດກັ້ນ ອາຊະຍາກໍາ ສັດປ່າ ແລະ ການດຳເນີນຄະດີ ສັດປ່າ ຂອງບັນດາແຂວງໃນໄລຍະຜ່ານມາ ເພື່ອເປັນການຖອດຖອນບົດຮຽນ, ຕີລາຄາ ດ້ານດີ, ດ້ານອ່ອນ ແລະ ຂໍ້ຄົງຄ້າງໃຫ້ສາມາດແກ້ໄຂບັນຫາຊ່ອງວ່າງ ໃນການຈັດຕັ້ງປະຕິບັດວຽກງານ ຢ່າງມີປະສິດທິພາບ-ປະສິດທິຜົນ.
ທ່ານ ຫົວໜ້າກົມກວດກາປ່າໄມ້ ໄດ້ຮຽກຮ້ອງມາຍັງເຈົ້າໜ້າທີ່ປ່າໄມ້ ຈົ່ງພ້ອມກັນນໍາເອົາເນື້ອໃນຈິດໃຈຂອງປື້ມຄູ່ມື ດັ່ງກ່າວໄປຈັດຕັ້ງຜັນຂະຫຍາຍ ນໍາໃຊ້ເຂົ້າໃນວຽກງານຕົວຈິງ, ໃຫ້ໄດ້ຮັບໝາກຜົນ ຕາມຄວາມຮັບຜິດຊອບຂອງຕົນ, ໃນຂອບເຂດທົ່ວປະເທດ. ພ້ອມນີ້ຍັງໄດ້ສະແດງຄວາມຊົມເຊີຍ ຕໍ່ ອົງການອະນຸລັກສັດປ່າ ປະຈຳ ສປປ ລາວ (WCS) ແລະ TRACE ທີ່ໄດ້ສະໜັັບສະໜູນທຶນຮອນ ເຕັກນິກ-ວິຊາການ, ຄວາມຮູ້, ຄວາມສາມາດ ເຂົ້າໃນການສ້າງ ປື້ມຄູ່ມື ມາດຕະຖານ ຂັ້ນຕອນປະຕິບັດ ການຄຸ້ມຄອງ ການຍຶດຫຼັກຖານ ອາຊະຍາກໍາສັດປ່າ ໃຫ້ແກ່ ອົງການສືບສວນ-ສອບສວນຂອງເຈົ້າໜ້າທີ່ປ່າໄມ້ ຈົນສໍາເລັດ, ເຊິ່ງອົງການສືບສວນ-ສອບສວນ ຂອງເຈົ້າໜ້າທີ່ປ່າໄມ້ ແລະ ເຈົ້າໜ້າທີ່ປ່າໄມ້ ໃນຂອບເຂດທົ່ວປະເທດ ຈະໄດ້ນຳໃຊ້ເຂົ້າໃນວຽກງານ ກວດກາ, ສືບສວນ-ສອບສວນ ແລະ ດຳເນີນຄະດີ ກ່ຽວກັບ ສັດນ້ຳ ແລະ ສັດປ່າ, ແນໃສ່ເຮັດໃຫ້ການຄຸ້ມຄອງທາງດ້ານຫຼັກຖານໄດ້ຢ່າງມີປະສິດທິພາບ-ປະສິດທິດຜົນ ສາມາດກ້າວໄປສູ່ ການນຳເອົາຜູ້ກະທຳຜິດມາດຳເນີນຄະດີ ຕາມຂະບວນການຍຸຕິທຳ.
ສໍາລັບຄູ່ມືມາດຕະຖານຂັ້ນຕອນການປະຕິບັດ ການຄຸ້ມຄອງ ການຍຶດຫຼັກຖານ ອາຊະຍາກໍາສັດປ່າປະກອບມີ 2 ພາກ, ມີຈຸດປະສົງເພື່ອສະໜັບສະໜູນ ອົງການສືບສວນ-ສອບສວນ ຂອງເຈົ້າໜ້າທີ່ປ່າໄມ້ ໃນການຄຸ້ມຄອງ ການຍຶດຫຼັກຖານອາຊະຍາກໍາສັດປ່າ, ເພື່ອແນະນໍາ ມາດຕະຖານທີ່ຈໍາເປັນ ສໍາລັບການຍຶດຫຼັກຖານ, ການບັນທຶກ, ການສ້າງເອກະສານ, ການຕິດສະຫຼາກ, ການບັນຈຸຫຸ້ມຫໍ່, ການມອບ – ຮັບ ແລະ ການຄຸ້ມຄອງຫຼັກຖານ ທີ່ເກັບໂຮມໄດ້ ຈາກການຍຶດ ຫຼັກຖານ ອາຊະຍາກໍາສັດປ່າ ໃນການຮັກສາຕ່ອງໂສ້ ການຄຸ້ມຄອງຫຼັກຖານ; ເພື່ອຮັບປະກັນ ໃຫ້ຫຼັກຖານທາງດ້ານວັດຖຸທັງໝົດທີ່ມີ ໄດ້ຖືກບັນທຶກ, ຕິດສະຫຼາກ, ເກັບໂຮມ, ບັນຈຸຫຸ້ມຫໍ່ຢ່າງປອດໄພ ແລະ ຍື່ນສະເໜີ ໃຫ້ສາມາດນໍາໃຊ້ ຢືນຢັນ ຫຼື ໂຕ້ແຍ້ງ ສະຖານະການຂອງເຫດການທີ່ຢູ່ໃນລະຫວ່າງການສືບສວນ-ສອບສວນ. (ໃນກໍລະນີສັດມີຊີວິດ ໃຫ້ປ່ອຍຄືນສູ່ທໍາມະຊາດຕາມລະບຽບການສະເພາະ).
ຂ່າວ : ມະນີວັນ
