ໃນວັນທີ 28 ມິຖຸນາ 2024 ທີ່ ທະນາຄານແຫ່ງ ສປປ ລາວ (ທຫລ) ຈັດກອງປະຊຸມ ເຜີຍແຜ່, ປຶກສາຫາລືການຜັນ ຂະຫຍາຍ ມະຕິ 04/ກມສພ ແລະ ມະຕິ 05/ລບ ວ່າດ້ວຍເສດຖະກິດເອກະລາດເປັນເຈົ້າຕົນເອງ ໃນໄລຍະໃໝ່ ເປັນແຜນວຽກປະຕິບັດຕົວຈິງຂອງຂະແໜງການທະນາຄານ ຂຶ້ນ, ໂດຍການໃຫ້ກຽດເປັນປະທານຂອງທ່ານ ບຸນເຫຼືອ ສິນໄຊວໍຣະວົງ ເລຂາຄະນະບໍລິຫານງານພັກ ທຫລ, ຜູ້ວ່າການ ທຫລ, ຄະນະບໍລິຫານງານພັກ ທຫລ, ຄະນະໜ່ວຍພັກ, ຄະນະພັກຮາກຖານ, ຄະນະກົມ-ທຽບເທົ່າ, ສາຂາປະຈໍາພາກ ທຫລ ແລະ ຕາງໜ້າຈາກບັນດາທະນາຄານ ທຸລະກິດລັດ ເຂົ້າຮ່ວມ 150 ສະຫາຍ.
ຈຸດປະສົງຂອງການຈັດກອງປະຊຸມໃນຄັ້ງນີ້ ເພື່ອເຜີຍແຜ່ເອກະສານສຳຄັນເປັນຕົ້ນແມ່ນ: 1. ເຜີຍແຜ່ແຈ້ງການຂອງຄະນະຈັດຕັ້ງສູນກາງພັກ ເລກທີ 122/ຄຈສພ ລົງວັນທີ 15 ພຶດ ສະພາ 2024, ເຜີຍແຜ່ເອກະສານຄວາມເຂົ້າໃຈກ່ຽວກັບກອງປະຊຸມໃຫຍ່ 3 ຂັ້ນ ຂອງພັກ, ເຜີຍແຜ່ເອກະສານຍົກສູງຄວາມສາມາດນໍາພາ ແລະ ຄວາມເປັນແບບຢ່າງນຳໜ້າຂອງພັກ; 2. ເຜີຍແຜ່ເອກະສານຕັ້ງໜ້າຝຶກຝົນຫຼໍ່ຫຼອມຄຸນທາດການເມືອງ ແລະ ຄຸນສົມບັດສິນທຳປະຕິວັດ, ເຜີຍແຜ່ເອກະສານເດັດດ່ຽວແກ້ໄຂປະກົດການຫຍໍ້ທໍ້ ໃນຖັນແຖວພະນັກງານ, ສະມາຊິກພັກ; 3. ສະເໜີເອກະສານຜັນຂະຫຍາຍມະຕິ 04/ກມສພ ລົງວັນທີ 11 ເມສາ 2024 ແລະ ມະຕິ 05/ລບ ລົງວັນທີ 21 ພຶດສະພາ 2024 ກ່ຽວກັບເອກະສານການສ້າງເສດຖະກິດເປັນເຈົ້າຕົນເອງ ໃນໄລຍະໃໝ່; 4. ລາຍງານສະພາບການຜັນຂະຫຍາຍ ມະຕິ 04/ກມສພ ແລະ ມະຕິ 05/ລບ ເຂົ້າໃນວຽກງານຂອງ ທຫລ (ໂດຍສັງເຂບ) ແລະ 5. ເຜີຍແຜ່ເຊື່ອມຊຶມມະຕິກອງປະຊຸມຄົບຄະນະ ຄັ້ງທີ 8 ສະໄໝທີ XI ຂອງສູນກາງພັກ. ຊຶ່ງເຫັນວ່າ: ເອກະສານແມ່ນມີຄວາມສໍາຄັນ ແລະ ຈໍາເປັນທີ່ສຸດ ເພື່ອສ້າງຄວາມເຂົ້າໃຈທີ່ເລິກເຊິ່ງ ໃຫ້ແກ່ຄະນະພັກ-ຄະນະນໍາຢູ່ແຕ່ລະຮາກຖານພັກ ທີ່ຂຶ້ນກັບອົງຄະນະພັກ ທຫລ ທີ່ຈະໄດ້ນໍາເອົາເນື້ອໃນຈິດໃຈເອກະສານດັ່ງກ່າວໄປຄົ້ນຄວ້າເຊື່ອມຊຶມ ແລະ ຜັນຂະຫຍາຍເຂົ້າສູ່ເນື້ອໃນກອງປະຊຸມໃຫຍ່ຂອງແຕ່ລະຮາກຖານພັກໃຫ້ມີຄຸນນະພາບ.
ຂ່າວ-ພາບ: ສົມພິດ ທຳມະວົງ
