ໃນຕອນບ່າຍວັນທີ 19 ມັງກອນ 2021 ຜ່ານມາ, ຢູ່ທີ່ສະໂມສອນເມືອງຍອດອູ, ແຂວງຜົ້ງສາລີ ໄດ້ຈັດກອງປະຊຸມ ເຜີຍແຜ່, ເຊື່ອມຊຶມນິຕິກໍາ, ການເລືອກຕັ້ງສະມາຊິກສະພາແຫ່ງຊາດ ຊຸດທີ IX ແລະ ສະມາຊິກສະພາປະຊາຊົນແຂວງ ຊຸດທີ II ໃຫ້ຜູ້ມີສິດເລືອກຕັ້ງ. ເປັນກຽດເຂົ້າຮ່ວມເປັນປະທານໂດຍ ທ່ານ ທອງສະຫວັນ ທໍາມະວົງ ກໍາມະການປະຈໍາພັກແຂວງ, ປະທານແນວລາວສ້າງຊາດແຂວງ, ມີບັນດາຄະນະບໍລິຫານງານພັກເມືອງໆຍອດອູ, ມີທ່ານ ຄໍາຕຸ່ນ ວົງສາ ຄະນະປະຈໍາສະພາປະຊາຊົນແຂວງ, ປະທານຄະນະກໍາມະການວັດທະນະທໍາ-ສັງຄົມ ແລະ ບັນດາເຜົ່າສະພາປະຊາຊົນແຂວງ ພ້ອມດ້ວຍສະມາຊິກຄະນະກໍາມະການເລືອກຕັ້ງຂັ້ນເມືອງ ຕະຫຼອດຮອດພະນັກງານຫຼັກແຫຼ່ງເຂົ້າຮ່ວມ ຈໍານວນ 94 ທ່ານ, ຍິງ 24 ທ່ານ.

ໃນກອງປະຊຸມໄດ້ຮັບຟັງການເຜີຍແຜ່ບັນດາເອກະສານສໍາຄັນກ່ຽວກັບການເລືອກຕັ້ງສະມາຊິກສະພາແຫ່ງຊາດ ຊຸດທີ IX ແລະ ສະມາຊິກສະພາປະຊາຊົນແຂວງ ຊຸດທີ II ເປັນຕົ້ນແມ່ນ : ມະຕິຂອງກົມກາງເມືອງສູນກາງພັກ ສະບັບເລກທີ 118/ກມສພ, ລົງວັນທີ 07 ກັນຍາ 2020 ວ່າດ້ວຍການເພີ່ມທະວີການຊີ້ນໍາ-ນໍາພາ ຂອງຄະນະພັກຕໍ່ການເລືອກຕັ້ງສະມາຊິກສະພາແຫ່ງຊາດ ຊຸດທີ IX ແລະ ສະມາຊິກສະພາປະຊາຊົນແຂວງ ຊຸດທີ II, ເອກະສານກ່ຽວກັບການເສີມຂະຫຍາຍສິດເປັນເຈົ້າຂອງປະຊາຊົນ ເຂົ້າໃນການເລືອກຕັ້ງສະມາຊິກສະພາແຫ່ງຊາດ ຊຸດທີ IX ແລະ ສະມາຊິກສະພາປະຊາຊົນແຂວງ ຊຸດທີ II, ເອກະສານກ່ຽວກັບໂຄງປະກອບ-ບຸກຄະລາກອນ ເພື່ອເລືອກເຟັ້ນເອົາຜູ້ທີ່ມີມາດຖານເງື່ອນໄຂລົງສະໝັກເລືອກຕັ້ງ, ເອກະສານກ່ຽວກັບກົດໝາຍວ່າດ້ວຍສະພາແຫ່ງຊາດ ສະບັບເລກທີ 64/ສພຊ, ລົງວັນທີ 09 ທັນວາ 2015 ແລະ ກົດໝາຍວ່າດ້ວຍ ສະພາປະຊາຊົນຂັ້ນແຂວງ ສະບັບເລກທີ 65/ສພຊ, ລົງວັນທີ 10 ທັນວາ 2015. ທັງນີ້ກໍ່ເພື່ອເປັນການສຶກສາອົບຮົມ, ຊຸກຍູ້ປຸກລະດົມໃຫ້ສະມາຊິກພັກ, ພະນັກງານລັດຖະກອນ ແລະ ພໍ່ແມ່ປະຊາຊົນບັນດາເຜົ່າ ມີຄວາມຮັບຮູ້, ເຂົ້າໃຈກ່ຽວກັບສິດເປັນເຈົ້າໃຫ້ດີຂຶ້ນກ່ວາເກົ່າ ພ້ອມທັງຕື່ນຕົວເປັນເຈົ້າການນໍາໃຊ້ສິດຂອງຕົນເຂົ້າໃນການເລືອກຕັ້ງສະມາຊິກສະພາແຫ່ງຊາດ ຊຸດທີ IX ແລະ ສະມາຊິກສະພາປະຊາຊົນແຂວງ ຊຸດທີ II ເຮັດໃຫ້ການເລືອກຕັ້ງໃນຄັ້ງນີ້ ດໍາເນີນໄປດ້ວຍບັນຍາກາດເບີກບານມ່ວນຊື່ນ, ຖືກຕ້ອງຕາມກົດໝາຍ, ປະຢັດ ແລະ ປະຕິບັດໃຫ້ໄດ້ 03 ຄາດໝາຍໃຫຍ່ຄື : ຜູ້ມີສິດປ່ອນບັດ ຕື່ນຕົວສະໝັກໃຈໄປໃຊ້ສິດເລືອກຕັ້ງໃຫ້ໄດ້ ຮ້ອຍສ່ວນຮ້ອຍ, ຮັບປະກັນບໍ່ໃຫ້ມີບັດຕາຍ ຮ້ອຍສ່ວນຮ້ອຍ, ແຕ່ລະໜ່ວຍປ່ອນບັດ ແລະ ເຂດເລືອກຕັ້ງ ຕ້ອງຮັບປະກັນໃຫ້ມີຄວາມສະຫງົບປອດໄພໃນວັນເລືອກຕັ້ງໃຫ້ໄດ້ ຮ້ອຍສ່ວນຮ້ອຍ.

ຂ່າວ: ພອນສະໄໝ (ປກສ ແຂວງຜົ້ງສາລີ)

Loading...