ສານປະຊາຊົນສູງສຸດ (ສປສສ) ຈັດກອງປະຊຸມເຜີຍແຜ່ ເຊື່ອມຊຶມ ແລະ ຜັນຂະຫຍາຍທິດຊີ້ນຳຂອງ ສະຫາຍ ທອງລຸນ ສີສຸດິດ, ເລຂາທິການໃຫຍ່ ຄະນະບໍລິຫານງານສູນກາງພັກ ປະທານປະເທດ ແຫ່ງ ສປປ ລາວ ຕໍ່ກອງປະຊຸມສະຫຼຸບວຽກງານການເງິນທົ່ວປະເທດປະຈຳປີ 2023 ໃນວັນທີ 15 ມີນານີ້ ທີ່ສປສສ, ໃຫ້ກຽດເຜີຍແຜ່ໂດຍ ສະຫາຍ ນາງ ວຽງທອງ ສີພັນດອນ ຄະນະເລຂາທິການສູນກາງພັກ ປະທານສານປະຊາຊົນສູງສຸດ.
ສະຫາຍ ນາງ ວຽງທອງ ສີພັນດອນ ໄດ້ເຜີຍແຜ່ເອກະສານບົດໂອ້ລົມຂອງສະຫາຍ ເລຂາທິການໃຫຍ່ ຄະນະບໍລິຫານງານພັກ ຕໍ່ກອງປະຊຸມສະຫຼຸບວຽກງານການເງິນທົ່ວປະເທດ ປະຈຳປີ 2023 ແລະ ທິດທາງປີ 2024 ເພື່ອໃຫ້ຄະນະພັກໄດ້ຮັບຮູ້, ເຂົ້າ ໃຈ ແລະ ກຳແໜ້ນຈິດໃຈຊີ້ນຳຂອງຂັ້ນເທິງ ແລະ ຊີ້ນຳການຄົ້ນຄວ້າ ແລະ ຜັນຂະຫຍາຍອອກເປັນແຜນງານ, ນະໂຍບາຍອັນລະ ອຽດ ກ່ຽວກັບວຽກງານການເງິນ, ເງິນຕາ ກໍຄືສ້າງເສດຖະກິດ ເອກະລາດ ເປັນເຈົ້າຕົນເອງ.
ໃນປີ 2023 ຜ່ານມາ ຂະແໜງການເງິນໄດ້ມີຄວາມພະຍາຍາມຍົກສູງປະສິດທິພາບຂອງການຄຸ້ມຄອງງົບປະມານແຫ່ງລັດອັນໄດ້ປະກອບສ່ວນຊຸກຍູ້ການພັດທະນາເສດຖະກິດ-ສັງຄົມ, ຍົກ ສູງວິໄນແຜນການ-ການເງິນ ແລະ ມີຄວາມພະຍາຍາມສູງໃນການ ປັບປຸງກົນໄກ ແລະ ລະບຽບການຕ່າງໆ ເພື່ອແກ້ໄຂຄວາມຫຍຸ້ງ ຍາກດ້ານເສດຖະກິດ-ການເງິນ ຕາມວາລະແຫ່ງຊາດ ໄດ້ກຳນົດອອກ. ພ້ອມນັ້ນກໍໄດ້ຄົ້ນຄວ້າສ້າງ, ປັບປຸງ ແລະ ຜັນຂະຫຍາຍບັນດາກົດໝາຍ, ນິຕິກຳໃຕ້ກົດໝາຍຢ່າງເປັນລະບົບຄົບຊຸດ ແລະ ຄົບຖ້ວນຂຶ້ນກວ່າເກົ່າ ຊຶ່ງເປັນເຄື່ອງມືສຳຄັນໃນການຊຸກຍູ້ ແລະ ປັບປຸງກົນໄກການຄຸ້ມຄອງການເງິນ ແຫ່ງລັດຕາມທິດຫັນເປັນທັນສະໄໝ, ສົ່ງເສີມການດຳເນີນທຸລະກິດ-ການລົງທຶນ ຂອງເອກະຊົນພາຍໃນ ແລະ ຕ່າງປະເທດ ໃຫ້ມີຄວາມສະດວກຂຶ້ນ ທັງປະກອບສ່ວນຢ່າງຕັ້ງໜ້າ ເຂົ້າໃນການປະຕິບັດເປົ້າໝາຍການພັດ ທະນາແບບຍືນຍົງ ແລະ ຍຸດທະສາດເພື່ອການເຕີບໂຕສີຂຽວ.
ພິເສດແມ່ນການປະຕິບັດຄາດໝາຍໃນການນຳເອົາປະເທດພວກເຮົາອອກຈາກສະຖານະພາບປະເທດດ້ອຍພັດທະນາ ກໍຈະກາຍເປັນຮູບປະຖຳໃນ 3-4 ປີຕໍ່ໜ້ານີ້.
ຂ່າວ-ພາບ: ສປສສ
