ກະຊວງແຜນການ ແລະ ການລົງທຶນ ແລະ ທະນາຄານພັດທະນາອາຊີ ຫລື ເອດີບີ (ADB) ຈັດເຜີຍແຜ່ແຜນຍຸດທະສາດການຮ່ວມມືລະຫວ່າງ ສປປ ລາວ ແລະ ທະນາຄານພັດທະນາອາຊີ ໄລຍະປີ 2024- 2028 ສະບັບໃໝ່ ເຊິ່ງແຜນຍຸດທະສາດດັ່ງກ່າວ, ມີເປົ້າໝາຍ ແນໃສ່ເສີມສ້າງຄວາມເຂັ້ມແຂງ ໃຫ້ແກ່ພື້ນຖານເສດຖະກິດ ທີ່ກະຈາຍຢ່າງທົ່ວເຖິງ, ຍືນຍົງ ແລະ ພ້ອມຮັບມືກັບການປ່ຽນແປງ ໃນ ສປປ ລາວ.
ທ່ານນາງ ພອນວັນ ອຸທະວົງ ຮອງລັດຖະມົນຕີ ກະຊວງແຜນການ ແລະ ການລົງທຶນ ໄດ້ໃຫ້ຮູ້ວ່າ: ແຜນຍຸດທະສາດການຮ່ວມມື ສະບັບໃໝ່ ແມ່ນສອດຄ່ອງກັບແຜນພັດທະນາເສດຖະກິດ-ສັງຄົມແຫ່ງຊາດ 5 ປີ ຄັ້ງທີ IV ສໍາລັບ ໄລຍະປີ 2020-2025 ຂອງລັດຖະບານລາວ ເຊິ່ງແຜນຍຸດທະສາດດັ່ງກ່າວ, ຈະເປັນເຄື່ອງມືອັນສຳຄັນຂອງລັດຖະບານ ແລະ ADB ໃນການຮ່ວມມື ເພື່ອເລັ່ງບາດກ້າວການພັດທະນາ ຂອງ ສປປ ລາວ ໃຫ້ບັນລຸໄດ້ຕາມເປົ້າໝາຍທີ່ວາງໄວ້. ໃນນັ້ນ, ລວມທັງ ການເຕີບໂຕທາງດ້ານເສດຖະກິດທີ່ຍືນຍົງ, ການປົກປັກຮັກສາສິ່ງແວດລ້ອມ ໄດ້ຮັບການເພີ່ມທະວີ ແລະ ການເພີ່ມທະວີຄວາມເປັນຢູ່ທີ່ດີຂອງປະຊາຊົນລາວ ພາຍໃນປີ 2025 ແລະ ຕໍ່ໆໄປ. ພາຍໃຕ້ແຜນຍຸດທະສາດ 5 ປີ ສະບັບໃໝ່ນີ້, ADB ຈະຮ່ວມມືຢ່າງໃກ້ຊິດກັບລັດຖະບານລາວ ເພື່ອສົ່ງເສີມການເງິນພາກລັດໃຫ້ຍືນຍົງ, ເສີມຂະຫຍາຍການເຂົ້າເຖິງການບໍລິການທີ່ສະເໝີພາບ ແລະ ມີຄວາມກ້າວໜ້າ ໃນການປະຕິບັດງານ ດ້ານການປ່ຽນແປງດິນຟ້າອາກາດ. ແຜນຍຸດທະສາດນີ້, ໄດ້ຮັບການຊຸກຍູ້ດ້ວຍຫົວຂໍ້ການພັດທະນາ ທີ່ກວມໃນທຸກຂະແໜງການ ເຊັ່ນ: ຄວາມສະເໝີພາບບົດບາດລະຫວ່າງ ຍິງ-ຊາຍ, ການປັບປຸງການປົກຄອງບໍລິ ຫານ ແລະ ຄວາມສາມາດຂອງສະຖາບັນ ທີ່ໄດ້ຮັບການປັບປຸງດີຂຶ້ນ, ຄວາມພ້ອມຮັບມືກັບໄພພິບັດ ແລະ ສະພາບການປ່ຽນແປງດິນຟ້າອາກາດ ທີ່ເຂັ້ມແຂງຂຶ້ນ, ພ້ອມທັງ ການຮ່ວມມື ແລະ ການເຊື່ອມໂຍງກັນໃນພາກພື້ນທີ່ເພີ່ມຫລາຍຂຶ້ນ.
ໂອກາດດຽວກັນ, ທ່ານນາງ ໂຊໂນມິ ທະນາກະ ຫົວໜ້າສຳນັກງານ ADB ປະຈຳ ສປປ ລາວ ກໍໄດ້ກ່າວວ່າ: ແຜນຍຸດທະສາດການຮ່ວມມືກັບປະເທດ ສຳລັບ ສປປ ລາວ ຂອງ ADB ສະບັບໃໝ່ ແມ່ນໄດ້ຖືກອອກແບບມາເພື່ອຊ່ວຍໃຫ້ປະເທດ ສາມາດຮັບມືກັບສິ່ງທ້າທາຍທາງດ້ານເສດຖະກິດ ແລະ ການເງິນ ເພື່ອສ້າງການເຕີບໂຕຢ່າງທົ່ວເຖິງ ແລະ ຍືນຍົງ ໂດຍເນັ້ນໜັກເຖິງຄວາມສຳຄັນຂອງຄວາມໝັ້ນຄົງ ຂອງເສດຖະກິດມະຫາພາກ, ການສະໜອງການບໍລິການດີທີ່ໄດ້ຮັບການປັບປຸງດີຂຶ້ນ ແລະ ຄວາມພ້ອມຮັບມືກັບສະພາບການປ່ຽນແປງດິນຟ້າອາກາດ ເຊິ່ງເປັນເສົາຄໍ້າແກ່ການຮ່ວມມືຂອງພວກເຮົາ; ແຜນຍຸດທະສາດດັ່ງກ່າວ, ໄດ້ແນະນໍາບັນດາມາດຕະການຮອບດ້ານເພື່ອຊຸກຍູ້ການເງິນພາກລັດ ໃຫ້ຍືນຍົງ, ໝູນໃຊ້ການໃຫ້ກູ້ຢືມແບບມີເງື່ອນໄຂສິດທິພິເສດ (Concessional loan), ທຶນຊ່ວຍເຫລືອລ້າ ແລະ ທຶນຊ່ວຍເຫລືອທາງດ້ານວິຊາການ. ຄວາມພະຍາຍາມດັ່ງກ່າວ, ແນໃສ່ເສີມຂະຫຍາຍທ່າແຮງຄວາມສາມາດ ຂອງລັດຖະບານ ໃນການຄຸ້ມຄອງໜີ້ສິນ, ການປະຕິຮູບລັດວິສາຫະກິດ, ການຄຸ້ມຄອງການເງິນພາກລັດ ແລະ ເພື່ອຮັບປະກັນໃຫ້ການນຳໃຊ້ທຶນສາທາລະນະຢ່າງມີປະສິດທິຜົນ ແລະ ມີຄວາມຮັບ ຜິດຊອບ.
ໃນການປະຕິບັດຄໍາໜັ້ນສັນຍາກ່ຽວກັບ ວຽກການປ່ຽນແປງດິນຟ້າອາກາດ ໃຫ້ມີຄວາມກ້າວໜ້າ, ແຜນຍຸດທະສາດ ຈະສະໜັບສະໜູນ ຢ່າງເຫັນຄວາມສໍາຄັນໃນການສະໜອງທຶນຮອນ ແລະ ສະຕິປັນຍາ ເຂົ້າໃສ່ທຸກຂະແໜງການທີ່ສຳຄັນເຊັ່ນ: ກະສິກຳ, ການຄຸ້ມຄອງຊັບພະຍາກອນທຳມະຊາດ, ການບໍລິຫານຈັດການກັບມົນລະພິດ ແລະ ສິ່ງເສດເຫລືອ ແລະ ການຄຸ້ມຄອງຄວາມສ່ຽງຈາກໄພພິບັດ ໂດຍເນັ້ນໜັກເຖິງຄວາມສໍາຄັນຂອງພະລັງ ງານທົດແທນ, ໃນແຜນຍຸດທະສາດ ຍັງພະຍາຍາມຊຸກຍູ້ການລົງທຶນໃສ່ພາກເອກະຊົນ ດ້ານພະລັງງານລົມ ແລະ ພະ ລັງງານແສງຕາເວັນ ເພື່ອຊຸກຍູ້ບັນດາຄຳໝັ້ນສັນຍາ ວ່າດ້ວຍການປ່ຽນແປງດິນຟ້າອາກາດ ໃຫ້ມີຄວາມກ້າວໜ້າ ຕາມການປະກອບສ່ວນຂອງປະເທດທີ່ໄດ້ກຳນົດໄວ້ໃນສັນຍາ ປາຣີ ແລະ ເພື່ອປັບປຸງການເຂົ້າເຖິງການບໍລິການ ທີ່ເທົ່າທຽມກັນ, ແຜນຍຸດທະສາດຈະສຸມໃສ່ການແກ້ໄຂຊ່ອງຫວ່າງໃນການຮັກສາ ຂະພາບ, ການສຶກສາ ໂດຍການຍົກສູງຄຸນນະພາບ ແລະ ການສົ່ງເສີມການພັດທະນາທັກສະຕ່າງໆ. ສຳລັບ ຂໍ້ລິເລີ່ມມີເປົ້າໝາຍ ແນໃສ່ຊ່ວຍໃຫ້ລະບົບການປະກັນສຸຂະພາບເຂັ້ມແຂງຂຶ້ນ, ຕອບສະໜອງຕໍ່ສິ່ງທ້າທາຍຕໍ່ຄວາມໝັ້ນຄົງ ດ້ານສະບຽງອາຫານ ໂດຍໂອນເງິນບົນເງື່ອນໄຂທີ່ລະອຽດອ່ອນທາງໂພຊະນາການ ແລະ ເພີ່ມທະວີການພັດທະນາລະບົບຕ່ອງໂສ້ມູນຄ່າທຸລະກິດກະສິກຳ.
ຂ່າວ: ທະນູທອງ
ພາບ: ອ່າຍຄຳ
