ON AIR

ຟັງວິທະຍຸ FM103.7Mhz ອອນລາຍ
Listen to Radio FM103.7Mhz Online

ເຝິກຊ້ອມໃຫຍ່ງານສະເຫຼີມສະຫຼອງວັນສ້າງຕັ້ງກອງທັບປະຊາຊົນລາວ ຄົບຮອບ 70 ປີ

ໃນຕອນເຊົ້າຂອງວັນທີ 14 ມັງກອນ 2019, ທີ່ວິທະຍາຄານກົມມະດຳ, ນໍ້າຊວງ, ເມືອງນາຊາຍທອງ, ນະຄອນຫລວງວຽງຈັນ, ການເຝິກຊ້ອມໃຫຍ່ພິທີສະເຫຼີມສະຫຼອງວັນສ້າງຕັ້ງກອງທັບປະຊາຊົນລາວ ວັນທີ 20 ມັງກອນ ຄົບຮອບ 70 ປີ ໄດ້ດຳເນີນໄປທາມກາງບັນ ຍາກາດອັນຟົດຟື້ນ ເຊິ່ງສະແດງໃຫ້ເຫັນເຖິງການເຕີບໃຫຍ່ຂະຫຍາຍຕົວ ແລະ ຄວາມເຂັ້ມແຂງຂອງກອງທັບປະຊາຊົນລາວ, ພາຍໃຕ້ການນຳພາອັນປີຊາສາມາດ ແລະ ສະຫຼາດສ່ອງໃສຂອງພັກປະຊາຊົນປະຕິວັດລາວຕະຫຼອດໄລຍະເວລາ 70 ປີຜ່ານມາ. ການເຝິກຊ້ອມໄດ້ເລີ່ມຂຶ້ນຢ່າງເປັນທາງການໃນເວລາ 7 ໂມງໂດຍການເຂົ້າຮ່ວມຂອງ ທ່ານ ທອງລຸນ ສີສຸລິດ, ກຳມະການກົມການເມືອງສູນກາງພັກ ນາຍົກລັດຖະມົນຕີ, ທ່ານ ພັນຄຳ ວິພາວັນ ຜູ້ປະຈຳການຄະນະເລຂາທິການສູນກາງພັກ, ຮອງປະທານປະເທດ, ທ່ານພົນເອກ ຈັນສະໝອນ ຈັນຍາລາດ, ກຳມະການກົມການເມືອງສູນກາງພັກ, ລັດຖະມົນຕີກະຊວງປ້ອງກັນປະເທດ, ພ້ອມດ້ວຍບັນດານາຍ ແລະ ພົນທະຫານຈາກທົ່ວກອງທັບ ກໍ່ຄື ຈາກກະຊວງປ້ອງກັນປະເທດ ແລະ ແຂກຮັບເຊີນຈາກພາກສ່ວນຕ່າງໆ. ການເຝິກຊ້ອມໃຫຍ່ເລີ່ມຕົ້ນດ້ວຍການບັນເລັງເພງຊາດຈາກກອງດຸລິຢາງກອງທັບປະຊາຊົນລາວ; ຫຼັງຈາກນັ້ນ ກໍ່ໄດ້ມີການສະແດງສີລະປະວັນນະຄະດີ 5 ລາຍການ ຈາກກອງສີລະປະກອນກອງທັບປະຊາຊົນລາວ ເຊິ່ງປະກອບມີ ຮ້ອງເພງດ່ຽວຍິງ-ຊາຍ, ຮ້ອງລວມໝູ່, ລວມເຖິງບົດຟ້ອນຕ່າງໆທີ່ສະແດງເຖິງຈິດໃຈຮັກຊາດຮັກປະຊາຊົນຢ່າງສຸດໃຈ; ຕໍ່ຈາກນັ້ນ ກໍ່ແມ່ນການສະແດງສີລະປະຍຸດທະວີທີປ້ອງກັນຕົວ, ຈາກກອງຕີພິເສດ, ການເດີນສວນສະໜາມຈາກກ້ອນກຳລັງຕ່າງໆ, ການສະແດງຊ້ອມເຮືອບິນສູ້ຮົບ, ຂະບວນລົດຫຸ່ມເກາະ, ເຮືອບິນຄວາມໄວສູງ, ລວມເຖິງອາວຸດຍຸດໂທປະກອບຕ່າງໆ ແລະ ການສະແດງການໂດດຈ້ອງ, ການສວນສະໜາມຈາກກ້ອນກຳລັງທະຫານເຫຼົ່າຮົບຕ່າງໆ ພ້ອມດ້ວຍກ້ອນກຳລັງຊາວໜຸ່ມເຍົາວະຊົນ, ນັກຮຽນ, ນັກສຶກສາ ທີ່ເປັນອານາຄົດຂອງຊາດຕື່ມອີກ, ໂດຍການສະແດງທັງຫມົດໃຊ້ເວລາປະມານ 2 ຊົ່ວໂມງເຄິ່ງ. ທ່ານພົນຕີ ສອນທອງ ພົມລາວົງ, ຮອງຫົວໜ້າກົມໃຫຍ່ການເມືອງກອງທັບ ກະຊວງປ້ອງກັນປະເທດ ມີຄຳເຫັນວ່າ: ຕະຫຼອດໄລຍະ 70 ປີຜ່ານມາ, ພະນັກງານນັກຮົບກອງທັບປະຊາຊົນລາວແຕ່ລະລຸ້ນໄດ້ຖືກເຝິກຝົນຫຼໍ່ຫຼອມຢູ່ໃນແປວໄຟປະຕິວັດ ແລະ ໄດ້ເຮັດສຳເລັດໜ້າທີ່ພາລະກຳ ປະຫວັດສາດອັນລໍ້າເລີດທີ່ພັກ ແລະ ປະຊາຊົນ ມອບໝາຍໃຫ້, ສ້າງໜ້າປະຫວັດສາດຫນ້າໃໝ່ ແລະ ຜັນຂະຫຍາຍມູນເຊື້ອອົງອາດກ້າຫານຂອງຊາດລາວວິລະຊົນຢ່າງສະຫງ່າງາມ. ກ່ອນໜ້າທີ່ຈະຈັດການເຝິກຊ້ອມໃຫຍ່ໃນຄັ້ງນີ້, ໃນວັນທີ 13 ມັງກອນ 2019, ກະຊວງປ້ອງກັນປະເທດ ກໍ່ໄດ້ຈັດພິທີປິດການແຂ່ງຂັນກິລາກາຍຍະກຳທົ່ວກອງທັບຄັ້ງທີ 2 ເພື່ອສະເຫຼີມສະຫຼອງວັນສ້າງຕັ້ງກອງທັບປະຊາຊົນລາວ ຄົບຮອບ 70 ປີ ທີ່ເດີ່ນກິລາມະຫາວິທະຍາໄລແຫ່ງຊາດ ວິທະຍາເຂດດົງໂດກ, ໂດຍການເຂົ້າຮ່ວມຂອງທ່ານພົນໂທ ສຸວອນ ເຮືອງບຸນມີ, ກຳມະການສູນກາງພັກ, ຮອງລັດຖະມົນຕີກະຊວງປ້ອງກັນປະເທດ, ຫົວໜ້າກົມໃຫຍ່ເສນາທິການກອງທັບ ພ້ອມດ້ວຍບັນດານາຍ ແລະ ພົນທະຫານທົ່ວກອງທັບ. ການແຂ່ງຂັນກິລາໃນຄັ້ງນີ້ໄດ້ສຳເລັດລົງຢ່າງຈົບງາມ ໂດຍມີ 34 ພາກສ່ວນອ້ອມຂ້າງກອງທັບເຂົ້າຮ່ວມແຂ່ງຂັນ ໃນ 5 ປະເພດກິລາຄື: ບານເຕະຊາຍ, ບານສົ່ງຍິງ-ຊາຍ, ເປຕັງຍິງ-ຊາຍ, ຍິງປືນ ແລະກະຕໍ້, ໃນນັ້ນ ສຳລັບກິລາບານເຕະ: ຊະນະເລີດ ໄດ້ແກ່ກອງບັນຊາການທະຫານແຂວງຈຳປາສັກ, ບານສົ່ງຍິງໃນຮົ່ມ: ຊະນະເລີດກອງພັນໃຫຍ່ 11, ບານສົ່ງຊາຍ: ກົມໃຫຍ່ເສນາທິການກອງທັບ, ກະຕໍ້: ຊະນະເລີດກົມໃຫຍ່ເຕັກນິກ, ເປຕັງຊາຍດ່ຽວ: ຊະນະເລີດກົມໃຫຍ່ເຕັກນິກ, ໂດຍນັກກີລາທີ່ຊະນະເລີດໃນແຕ່ລະປະເພດ ແມ່ນໄດ້ຮັບຫຼຽນຄຳ ພ້ອມດ້ວຍລາງວັນເງິນສົດຈຳນວນໜຶ່ງ