ເຝິກອົບຮົມຍົກສູງຄວາມສາມາດພະນັກງານ ເພື່ອກຽມຮັບໃຊ້ກອງປະຊຸມໄອປາ ຄັ້ງທີ 45

ກອງປະຊຸມເຝິກອົບຮົມຍົກສູງຂີດຄວາມສາມາດໃນການກະກຽມເນື້ອໃນ, ເຕັກນິກການພິມ ແລະ ດ້ານພະລາທິການຕ່າງໆ ເພື່ອກະກຽມຄວາມພ້ອມຮັບໃຊ້ກອງປະຊຸມໃຫຍ່ໄອປາຄັ້ງທີ 45 ໄດ້ຈັດຂຶ້ນໃນວັນທີ 20-23 ສິງຫາ 2024 ທີ່ແຂວງວຽງຈັນ ໂດຍການເປັນປະທານຂອງທ່ານ ສັນຍາ ປຣະເສີດ ປະທານກໍາມາທິການການຕ່າງປະເທດ, ເຂົ້າຮ່ວມມີຊ່ຽວຊານທີ່ມາຈາກໂຄງການສ້າງຄວາມເຂັ້ມແຂງໃຫ້ແກ່ສະພາແຫ່ງຊາດ ແລະ ສະພາປະຊາຊົນຂັ້ນແຂວງ (STEPs), ອົງການສະຫະປະຊາຊາດເພື່ອການພັດທະນາ (UNDP) ແລະ ກອງເລຂາຄຸ້ມຄອງແຫຼ່ງທຶນຊ່ວຍ ເຫຼືອລ້າໃຫ້ແກ່ສະພາແຫ່ງຊາດ (ICPMS) ພ້ອມດ້ວຍບັນດາທ່ານຄະນະກົມ, ຄະນະພະແນກ ແລະ ພະນັກງານຈາກແຕ່ລະອະນຸກຳ ມະການທີ່ຈະຮັບໃຊ້ກອງປະຊຸມໃຫຍ່ໄອປາຄັ້ງທີ 45.

ກອງປະຊຸມດັ່ງກ່າວ, ທ່ານ ປອ. ນາງ ສູນທອນ ໄຊຍະຈັກ ຮອງປະທານສະພາແຫ່ງຊາດ ໄດ້ໃຫ້ກຽດມີຄໍາເຫັນໂອ້ລົມ ເຊິ່ງໄດ້ເນັ້ນໜັກເຖິງຄວາມຈຳເປັນ ແລະ ຄວາມສຳຄັນຂອງການເຝິກອົບຮົບໃນຄັ້ງນີ້ ແລະ ຮຽກຮ້ອງໃຫ້ບັນ ດາສໍາມະນາກອນເອົາໃຈໃສ່ຮໍ່າຮຽນ, ແລກປ່ຽນປະສົບການ ແລະ ຖອດຖອນບົດຮຽນນໍາບັນດາຊ່ຽວຊານທີ່ມີປະສົບການສູງຈາກກອງເລຂາໄອປາ ແລະ ບາງປະເທດອາຊຽນ ເຊັ່ນ: ສສ.ຫວຽດນາມ, ຟີລິບປິນ, ໄທ ແລະ ມາເລເຊຍ ເພື່ອເຮັດໃຫ້ ການຮັບໃຊ້ກອງປະຊຸມໃຫຍ່ໄອປາຄັ້ງທີ 45 ທີ່ ສປປລາວ ເປັນເຈົ້າພາບ ໄດ້ຮັບຜົນສໍາເລັດສູງສຸດ, ອັນຈະເປັນການຍົກສູງຖານະບົດບາດຂອງ ສປປລາວ ໃນເວທີພາກພື້ນ ແລະ ສາກົນ ໃຫ້ສູງຂຶ້ນຢ່າງບໍ່ຢຸດຢັ້ງ.

ໃນການເຝິກອົບຮົມ, ສໍາມະນາກອນໄດ້ຮຽນຮູ້ບັນຫາສໍາຄັນຄື: ຄວາມເປັນມາຂອງໄອປາ; ການກະກຽມກອງປະ ຊຸມສາກົນ ໂດຍສະເພາະກອງປະຊຸມໄອປາ; ປະສົບການຂອງລັດຖະສະພາໃນປະເທດອາຊຽນ; ບົດສະເໜີກ່ຽວກັບກອງປະຊຸມສະມັດຊາໃຫຍ່ໄອປາຄັ້ງທີ 45: ວາລະ, ຂັ້ນຕອນ ແລະ ຫຼັກການ; ປະສົບການໃນການຈັດກອງປະຊຸມກໍາມາທິການສະມາຊິກລັດຖະສະພາເພດຍິງ ແລະ ສະມາຊິກລັດຖະ ສະພາໜຸ່ມຂອງໄອປາ; ຄວາມເຂົ້າໃຈກ່ຽວກັບມະຕິຂອງກອງປະ ຊຸມໄອປາ: ຈຸດປະສົງ, ຄວາມເປັນມາ, ໂຄງສ້າງ, ຂັ້ນຕອນ ແລະ ບົດອະທິບາຍ ເພື່ອຍົກສູງປະສິດທິພາບຂອງການເຝິກ ອົບຮົມ. ບັນດາສໍາມະນາກອນຍັງໄດ້ແບ່ງກຸ່ມເພື່ອເຝິກການເຮັດບົດບາດຂອງເຈົ້າໜ້າທີ່ໃນການອໍານວຍຄວາມສະດວກກອງປະຊຸມໄອປາ ເຊັ່ນ: ການກະກຽມແຜນວຽກຕ່າງໆກ່ອນກອງປະຊຸມຂອງແຕ່ລະອະນຸກໍາມະການ, ການກະກຽມມະຕິກອງປະຊຸມໄອປາ ແລະ ບົດອະທິບາຍ, ການກໍານົດເອກະສານ ແລະ ອຸປະກອນ, ການກະກຽມຮ່າງມະຕິ ແລະ ໜ້າວຽກຕ່າງໆຂອງຄະນະຮັບຜິດ ຊອບ ແລະ ອື່ນໆ. ບັນດາສໍາມະກອນໄດ້ມີຄວາມຫ້າວຫັນເອົາໃຈໃສ່ຮຽນຮູ້ ແລະ ເຝິກເຮັດຕົວຈິງກັບວິທະຍາກອນ ເພື່ອແລກປ່ຽນປະສົບການ ແລະ ສາມາດນໍາເອົາບົດຮຽນຈາກການເຝິກອົບຮົມຄັ້ງນີ້ ໝູນໃຊ້ເຂົ້າໃນການຮັບໃຊ້ການເປັນເຈົ້າພາບກອງປະຊຸມໃຫຍ່ສະມັດຊາລັດຖະສະພາລະຫວ່າງຊາດອາຊຽນ ຄັ້ງທີ 45 ໃຫ້ສໍາເລັດຜົນຕາມລະດັບຄາດໝາຍທີ່ວາງໄວ້.

(ຂ່າວ: ບຸນເກີດ ວົງໄຊຍາ, ພາບ: ນາງ ສຸພາວັນ ຫອມສະນິດ)