ກອງປະຊຸມສຳມະນາວິທະຍາສາດສາກົນ ຄັ້ງທີ XI ພາຍໃຕ້ຫົວຂໍ້ ເພີ່ມທະວີການຮ່ວມມື ລາວ ຫວຽດນາມ ແລະ ກຳປູເຈຍ ພາຍໃຕ້ສະພາບໃໝ່ຂອງໂລກ ຈັດຂຶ້ນວັນທີ 25 ກັນຍາ 2024 ທີ່ ນະຄອນຫຼວງວຽງຈັນ ເປັນປະທານຮ່ວມຂອງທ່ານ ກອງແກ້ວ ໄຊສົງຄາມ ປະທານສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ ທ່ານ ຕະ ມິ່ງຕັວນ ຮອງປະທານສະຖາບັນບັນດິດວິທະຍາສາດສັງຄົມຫວຽດນາມ ແລະ ທ່ານ ບັນດິດ ສົກ ໂຕ້ຍ ປະທານລາຊາບັນດິດສະພາກຳປູເຈຍ ມີຮອງຫົວໜ້າສະຖາບັນ ບັນດານັກວິທະຍາສາດ ນັກຄົ້ນຄວ້າ ແລະ ຂະແໜງການກ່ຽວຂ້ອງ ເຂົ້າຮ່ວມ.
ທ່ານ ກອງແກ້ວ ໄຊສົງຄາມ ກ່າວວາ: 3 ປະເທດ ລາວ ຫວຽດນາມ ແລະ ກຳປູເຈຍມີປະຫວັດສາດຮ່ວມກັນມາແຕ່ດຶກດຳບັນ ເປັນປະເທດບ້ານອ້າຍເມືອງນ້ອງ ທີ່ມີການພົວພັນຊ່ວຍເຫຼືອເຊິ່ງກັນ ແລະ ກັນ ມາແຕ່ດົນນານ ພັກ-ລັດຖະບານ ແລະ ປະຊາຊົນ 3 ຊາດ ມີສາຍພົວພັນອັນສະໜິດແໜ້ນ ແລະ ເຄີຍໄປມາຫາສູ່ກັນຢ່າງເປັນປົກກະຕິ ບົນພື້ນຖານຄວາມສາມັກຄີ ຊ່ວຍເຫຼືອຮັກແພງເຊິ່ງກັນ ແລະ ກັນທີ່ຫາໄດ້ຍາກໃນໂລກນີ້ ການພົວພັນຂອງ 3 ຊາດນັບມື້ສືບຕໍ່ເພີ່ມພູນຄູນສ້າງຂຶ້ນເລື້ອຍໆ ໂດຍສະເພາະແມ່ນ 3 ສະຖາບັນຂອງພວກເຮົາ ໄດ້ມີການພົວພັນກັນຢ່າງສະໜິດແໜ້ນເຄີຍໄດ້ຊ່ວຍເຫຼືອເຊິ່ງກັນ ແລະ ກັນ ຮ່ວມມືກັນໃນການຄົ້ນຄວ້າວິທະຍາສາດ ແລະ ຈັດສຳມະນາຮ່ວມກັນຫຼາຍຄັ້ງ ທັງໃນລະດັບພະຫຸພາຄີ ແລະ ທະວີພາຄີ ເຊິ່ງການຈັດກອງປະຊຸມຄັ້ງນີ້ກໍເພື່ອແລກປ່ຽນຂໍ້ມູນ ບົດຮຽນ ແລະ ທັດສະນະເຊິ່ງກັນ ແລະ ກັນ ເພື່ອເປັນການເສີມຂະຫຍາຍສາຍພົວພັນທີ່ດີງາມໃຫ້ນັບມື້ນັບກວ້າງຂວາງ ແລະ ງອກງາມຂຶ້ນເລື້ອຍໆ.
ກອງປະຊຸມສຳມະນາວິທະຍາສາດສາກົນຄັ້ງທີ່ຜ່ານມາ ໄດ້ຈັດຂຶ້ນຢູ່ທີ່ນະຄອນໂຮ່ຈິມິງ ຂອງ ສສ ຫວຽດນາມ ພາຍໃຕ້ຫົວຂໍ້ ການຮ່ວມມືທາງດ້ານການຄ້າ ແລະ ການລົງທຶນລະຫວ່າງລາວ ຫວຽດນາມ ແລະ ກຳປູເຈຍ ບົນພື້ນຖານເສດຖະກິດດິຈິຕອນ ການສຳມະນາວິທະຍາສາດດັ່ງກ່າວ ໄດ້ດຳເນີນໄປດ້ວຍບັນຍາກາດຟົດຟື້ນເຕັມໄປດ້ວຍໄມຕີຈິດ-ມິດຕະພາບ ປະສົບຜົນສຳເລັດ ແລະ ເປັນປະໂຫຍດອັນມະຫາສານໃຫ້ແກ່ລັດຖະບານ 3 ປະເທດ ໃນການວາງນະໂຍບາຍການພັດທະນາຮ່ວມກັນ ພ້ອມກັນນັ້ນໄດ້ຕົກລົງເປັນເອກະພາບສຶບຕໍ່ຈັດກອງປະຊຸມສຳມະນາວິທະຍາສາດ ພາຍໃຕ້ຫົວຂໍ້ ເພີ່ມການຮ່ວມມື ລາວ-ຫວຽດນາມ-ກຳປູເຈຍ ພາຍໃຕ້ສະພາບການໃໝ່ຂອງໂລກ ໂດຍມອບໃຫ້ສະຖາບັນວິທະຍາສາດເສດຖະກິດ ແລະ ສັງຄົມ ແຫ່ງຊາດ ສປປ ລາວ ເປັນເຈົ້າພາບ ຫົວຂໍ້ດັ່ງກ່າວ ເປັນຫົວຂໍ້ວິທະຍາສາດ ໃນລະດັບຍຸດທະສາດກ່ຽວກັບການປ່ຽນແປງສະພາບການເມືອງ-ຄວາມໝັ້ນຄົງໃນລະດັບໂລກ ແລະ ພາກພື້ນ ເປັນສິ່ງທ້າທາຍທີ່ຈະໃຫ້ນັກຄົ້ນຄວ້າ-ນັກວິທະຍາສາດໄດ້ຄົ້ນຄວ້າລົງເລິກວິເຄາະວິໄຈ ແຕ່ລະບັນຫາລະອຽດ ພ້ອມທັງສະເໜີແນະຕ່າງໆໃຫ້ແກ່ພັກກໍຄື ລັດຖະບານໃນການວາງແນວທາງນະໂຍບາຍອັນຖືກຕ້ອງ ແລະ ສອດຄ່ອງກັບສະພາວະຄວາມເປັນຈິງໃນປັດຈຸບັນ.
ກອງປະຊຸມສຳມະນາຄັ້ງນີ້ຈະໄດ້ຄົ້ນຄວ້າມີຄຳຄິດເຫັນ ແລະ ທັດສະນະທ່າອ່ຽງການປ່ຽນແປງຂອງສະພາບການຂອງໂລກໃນຕໍ່ໜ້າ ໂອກາດ ແລະ ສິ່ງທ້າທາຍຂອງ CLV ໃນສະພາບການໃໝ່ຂອງໂລກ ເພີ່ມທະວີການຮ່ວມມືລະຫວ່າງບັນດາປະເທດລາວ ຫວຽດນາມ ແລະ ກຳປູເຈຍ ໃນສະພາບໃໝ່ຂອງໂລກ.
ທີ່ມາ: ວຽງຈັນໃໝ່
