ວິທະຍຸກະຈາຍສຽງແຫ່ງຊາດລາວ

Lao National Radio

ຕັ້ງໜ້າຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XI ຂອງພັກ ເຂົ້າສູ່ຊີວິດຈິງ
ເມືອງຄອບ ຈັດບຸນນະມັດສະການພະທາດປວກ ຕິດພັນກັບການເປີດປີທ່ອງທ່ຽວລາວ 2024
ຕາມແຫລ່ງຂ່າວຈາກເມືອງຄອບໃຫ້ຮູ້ວ່າ: ເມືອງຄອບ ແຂວງໄຊຍະບູລີ ຈັດບຸນນະມັດສະການພະທາດປວກ ຕິດຜັນກັບການເປີດປີທ່ອງທ່ຽວລາວ ປະຈໍາປີ 2024 ຂອງເມືອງ ໃນວັນທີ 16 ມີນາ2024 ໂດຍມີ ທ່ານ ເພັດພິໄຊ ສູນວິໄລ ຮອງເຈົ້າແຂວງ, ປະທານຄະນະສະມາຊິກສະພາປະຊາຊົນແຂວງ, ມີນັກທ່ອງທ່ຽວທັງພາຍໃນ ແລະ ຕ່າງປະເທດເຂົ້າຮ່ວມ.
ທ່ານ ສະໝັກ ລິດສະຖານ ຮອງເຈົ້າເມືອງໆຄອບ, ປະທານຈັດບຸນນະມັດສະການພະທາດປວກ ໃຫ້ຮູ້ວ່າ: ຄະນະຮັບຜິດຊອບຈັດບຸນນະມັດສະການພະທາດປວກ ໄດ້ແບ່ງຄວາມຮັບຜິດ ຊອບກະກຽມຄວາມພ້ອມດ້ານຕ່າງໆ ໂດຍໄດ້ສຸມໃສ່ຂະບວນການຮອບດ້ານ ເຊັ່ນ: ຂະບວນການປ້ອງກັນຄວາມສະຫງົບ, ນໍາພາຂະບວນການອະນາໄມປະດັບປະດາຕົບແຕ່ງ, ແສງ, ສີ, ສຽງ, ຂະບວນສິລະປະ-ວັນນະຄະດີ, ຂະບວນກ້ອນກໍາລັງແຕ່ລະບ້ານ ແລະ ອື່ນໆ. ເຊິ່ງບຸນນະມັດສະການພະທາດປວກປີນີ້, ໄດ້ກໍານົດກິດຈະກໍາຕ່າງໆຄື: ພິທີທາງສາສະໜາ, ຂະ ບວນແຫ່ກ້ອນກໍາລັງ ແລະ ປະດັບປະດາແສງສີຕ່າງໆ, ການສະແດງສິລະປະ-ວັນນະຄະດີ ແລະ ປະກວດນາງສາວງາມ, ປະກວດອາຫານພື້ນບ້ານ ແລະ ການວາງສະແດງສິນຄ້າ.
ພະທາດປວກຕາມຕໍານານກ່າວໄວ້ວ່າ: ມີນົກອິນຊີສອງຜົວເມຍໄດ້ຄາບກະດູກຂອງພະເຈົ້າອົງໜຶ່ງມາແຕ່ເມືອງລານັນທາ ປະເທດອິນເດຍ ມາຈັບຢູ່ຕົ້ນໂພ ບ່ອນທາດປວກຕັ້ງຢູ່ປະຈຸບັນ ແລະວາງກະດູກໄວ້ເທິງຕົ້ນໂພນັ້ນ ແລ້ວພາກັນໄປກິນນໍ້າຢູ່ໜອງເທົາ ເມື່ອກັບມາຫາຕົ້ນໂພແລ້ວບໍ່ເຫັນກະດູກ ດັ່ງນັ້ນນົກອິນຊີສອງຜົວເມຍ ຈຶ່ງເຊີນເອົານົກຕ່າງໆນັບໝື່ນໂຕມາຊອກຊ່ວຍແຕ່ບໍ່ເຫັນ.
ຂະນະນັ້ນ ມີນາຍພານຄົນໜຶ່ງ ໄປລ່າສັດຢູ່ບໍລິເວນນັ້ນ ເຫັນປວກຈໍານວນຫລວງຫລາຍ ພາກັນຂົນດິນມາເຮັດຈອມປວກ ແລະເຫັນກະດູກອັນໜຶ່ງທີ່ປວກກໍາລັງຂົນດິນມາຖົມ ເມື່ອເຫັນເຫດການຄືແນວນັ້ນ ນາຍພານຄົນນັ້ນຈຶ່ງໄປລາຍງານເຫດການປະຫລາດນັ້ນຕໍ່ເຈົ້າເມືອງຢູ່ບ້ານດົງຖໍ້າທອງ ເຊິ່ງແມ່ນບ້ານມ່ວງໃນປະຈຸບັນ ຈາກນັ້ນພະຍາຈຶ່ງແຕ່ງອາມາດ 3ຄົນໄປເບິ່ງ ກໍເຫັນປວກພວມຂົນດິນມາເຮັດຈອມປວກສູງພຽງແອວ.
ເມື່ອເຫັນເຫດການຄືແນວນັ້ນ ອາມາດທັງ 3 ກໍກັບເມືອລາຍງານຕໍ່ເຈົ້າເມືອງ ແລະເຈົ້າເມືອງຈຶ່ງໄດ້ນໍາພາບ່າວໄພ່ລາຊະດອນເມືອງຂອມໄຂ ເຊິ່ງແມ່ນເມືອງຄອບໃນປະຈຸບັນ ໄປກໍ່ທາດກວມຈອມປວກນັ້ນ ແລະໄດ້ເອົາແກ້ວ, ເງິນ, ຄໍາ, ເຄື່ອງຂອງມີຄ່າບັນຈຸໄວ້ໃນທາດນັ້ນ ໃນປີ 1536 ເຊິ່ງກໍ່ດ້ວຍດິນຈີ ແລະປູນຂາວ ຂະໜາດກວ້າງ 4 ວາ ສູງ 2ວາເຄິ່ງ .
ໃນປີ 1920 ຊາວເມືອງຄອບ ໄດ້ປະຕິສັງຂອນພະທາດປວກໃຫ້ມີຄວາມສວຍງາມ ແລະໃຫ່ຍກວ່າເກົ່າ ເຊິ່ງມີລວງກວ້າງ 12 ແມັດ, ສູງ 14,90 ແມັດ ໂດຍຖືເອົາທາດອົງນີ້ ເປັນທາດຫລັກເມືອງ .