ວັນທີ 5 ພຶດສະພາ 2024 ນີ້ຢູ່ທີ່ຫ້ອງວ່າການເມືອງຄໍາເກີດ ແຂວງບໍລິຄໍາໄຊ ໄດ້ຈັດກອງປະຊຸມປຶກສາຫາລືວຽກງານຄຸ້ມຄອງໄພພິບັດຂັ້ນເມືອງ ໂດຍການເປັນປະທານຂອງທ່ານ ບຸນຍົມ ຫຼວງບຸນມາ ຄະນະປະຈຳພັກເມືອງ, ຫົວໜ້າຄະນະຈັດຕັ້ງເມືອງ.
ທ່ານ ຄໍາວິໄລ ອານຸສອນພົງສະຫວັນ ຫົວໜ້າຫ້ອງການ ແຮງງານ ແລະ ສະຫວັດດີການສັງຄົມເມືອງ ຕາງໜ້າຄະນະຄຸ້ມຄອງໄພພິບັດຂັ້ນເມືອງໄດ້ລາຍງານ ການຈັດຕັ້ງປະຕິບັດວຽກງານໄພພິບັດປີ 2023 ເຊິ່ງທ່ານໃຫ້ຮູ້ວ່າ: ໃນ 2023 ຜ່ານມາ ຫຼາຍເມືອງຂອງແຂວງບໍລິຄຳໄຊ ໄດ້ເກີດມີສະພາບໄພນ້ຳຖ້ວມ ,ດິນເຊາະເຈື່ອນ,ດິນສະໄລ້, ຕົ້ນໄມ້ຫັກທັບທາງເຮັດໃຫ້ການສັນຈອນຖືກຕັດຂາດໂດຍສະເພາະ ເສັ້ນທາງເລກ 8A, 1E ແລະ ເສັ້ນທາງເຂົ້າບ້ານຈຳນວນໜຶ່ງ.
ສະເພາະ ເມືອງຄຳເກີດ ມີຄວາມເສຍຫາຍທັງໜົດ 54.054.673.000 ກີບ. ໃນນັ້ນບ້ານທີ່ຖືກນ້ຳຖ້ວມມີຈຳນວນ 35 ບ້ານ,ຖ້ວມໜັກ 5 ບ້ານ. ຈໍານວນຫຼັງຄາເຮືອນທີ່ຖືກນ້ໍາຖ້ວນ 468 ຫຼັງຄາ, 556 ຄອບຄົວ, 3,124 ຄົນ ມີເຮືອນຖືກດີນເຈື່ອນທັບ 1 ຫຼັງ ແລະ ນ້ຳເຊາະເຈື່ອນ 2 ຫຼັງ ( ຢູ່ບ້ານແກ້ງບິດ ). ເນື້ອທີ່ທໍາການຜະລິດ 2.801 ເຮັກຕ່າ (ເນື້ອທີ່ນາ 1.296 ຮຕ, ສວນມັນຕົ້ນ 1.470 ຮຕ, ພືດອື່ນໆ 35 ຮຕ); ສັດລ້ຽງຕາຍທັງໝົດ 2.245 ໂຕ; (ຄວາຍ 10; ງົວ 44 ໝູ; ແບ້ 133 ໂຕ; ສັດປີກ 1.982 ໂຕ), ໜອງປາເປ່ເພ 113 ໜອງ, ເສັ້ນທາງ 8A ຖືກນ້ຳຖ້ວມ 7 ຈຸດ ແລະ 1E ມີນຳ້ຖ້ວມ 3 ຈຸດ, ແລະ ອື່ນໆ.
ຈາກນັ້ນ ຄະນະຜູ້ແທນກອງປະຊຸມກໍ່ໄດ້ສະເໜີລາຍງານ ແລະ ແລກປ່ຽນປະກອບຄໍາຄິດເຫັນ ເພື່ອເຮັດໃຫ້ການແກ້ໄຂ, ການຟື້ນຟູ ແລະ ການຕອບໂຕ້ໄພພິບັດໃນຕໍ່ໜ້າໃຫ້ໄດ້ດີຂຶ້ນ ທັນກັບເວລາ ແລະ ເຝົ້າລະວັງ, ກຽມພ້ອມຮັບມືກັບໄພທຳມະຊາດທີ່ອາດຈະເກີດຂຶ້ນໃນຕໍ່ໜ້າ.
ຂໍ້ມູນຂ່າວ: ວິເສດສັກ
