ໃນລະຫວ່າງວັນທີ 21-26 ກໍລະກົດ 2024 ເມືອງຄູນຄຳ ແຂວງຄຳມ່ວນ ໄດ້ຮັບຜົນກະທົບຈາກພະຍຸໝຸນເຂດຮ້ອນ ພຣະພິຣຸນ ເຮັດໃຫ້ຝົນຕົກໜັກຕິດຕໍ່ກັນຫລາຍວັນ. ຄະນະກຳມະ ການຄຸ້ມຄອງໄພພິບັດຂັ້ນເມືອງ ໄດ້ແຕ່ງຕັ້ງຄະນະກໍ່ສ້າງຮາກຖານ ການເມືອງທັງ 4 ເຂດພັດທະນາ ເຄື່ອນໄຫວຮ່ວມກັບອົງການປົກຄອງຂັ້ນບ້ານກະກຽມເຝົ້າລະວັງ ຕິດຕາມນໍ້າຂຶ້ນ-ນໍ້າລົງຕາມສາຂາຕ່າງໆ ຂອງນໍ້າຫີນບູນ ແລະ ໃຫ້ປະຊາຊົນກຽມພ້ອມມີສະຕິຕອບໂຕ້ໄພນໍ້າຖ້ວມ ທີ່ອາດຈະເກີດຂຶ້ນ ໂດຍສະເພາະບັນດາບ້ານທີ່ມີຄວາມສ່ຽງຕາມແຄມນໍ້າຫີນບູນ.
ມາຮອດໃນວັນທີ 26 ກໍລະກົດ ຝົນຍັງສືບຕໍ່ຕົກແຮງເປັນໄລຍະ ບວກກັບນໍ້າທີ່ໄຫລລົງມາຈາກພູ, ສາຍນໍ້າຕ່າງໆ ຂອງນໍ້າຫີນບູນຕອນເທິງມີນໍ້າຖ້ວມຂັງເຊັ່ນ: ເຂດບ້ານພູຊາດ ນໍ້າໄດ້ຖ້ວມຂັງແຄມທາງດຳ ແຕ່ແຄມບ້ານພູຊາດ ຫາ ໂຄ້ງນາພວກ ແລະ ນໍ້າໄດ້ໄຫລເຂົ້າຖ້ວມນາ, ສວນມັນຕົ້ນຂອງປະຊາຊົນຈໍານວນໜຶ່ງ; ເຂດບ້ານໂພນທອງເກົ່າ ນໍ້າຫ້ວຍຍຶ່ງຂຶ້ນລົ້ນຝັ່ງ ໄຫລເຂົ້າຖ້ວມຂັງເນື້ອທີ່ນາປະຊາຊົນ ແລະ ເຮືອນ.
ປະຊາຊົນແຄມທາງດຳມີໄລຍະ 2 ກິໂລແມັດ; ເຂດບ້ານມ່ວນນ້ຳສາງ ນໍ້າສາງໄດ້ລົ້ນຕະຝັ່ງໄຫລເຂົ້າຖ້ວມຂັງທົ່ງນາ ແລະ ເຂດເຂດເຮືອນປະຊາຊົນທີ່ຢູ່ລຽບຕາມແຄມນໍ້າ ແລະ ແຄມທາງດຳກອງລໍພ້ອມທັງໄຫລຂ້າມເສັ້ນທາງດຳແຕ່ບ້ານມ່ວງນໍ້າສາງ ຫາ ບ້ານນາຊ້າງຂ້າມເກົ່າປະມານ 3 ກິໂລແມັດ ແຕ່ການສັນຈອນພາຫະນະລົດຍັງໄປມາໄດ້; ນໍ້າຖ້ວມຂັງເສັ້ນທາງດໍາແຕ່ບ້ານນາຄຳ ຫາ ບ້ານນາກາງ ມີຄວາມຍາວ 4 ກິໂລແມັດ ລົດສີ່ລໍ້ຕໍ່າ, ລົດຈັກບໍ່ສາມາດທຽວໄດ້; ເສັ້ນທາງພູໄຮມີດິນເຈື່ອນລົງມາຖົມເສັ້ນທາງຢູ່ຈຸດດິນເຈື່ອນເກົ່າ ແລະ ຈຸດໃໝ່ກິໂລແມັດທີ່ 46+350 ແລະ ກິໂລແມັດທີ 48+700 ເຂດການກໍ່ສ້າງຂອງບໍລິສັດກໍ່ສ້າງທາງເລກ 8 ສອງຈຸດ ປັດຈຸບັນລົດບໍ່ສາມາດໄປໄດ້ ແລະ ບໍລິສັດກຳລັງຈັດຕັ້ງປະຕິບັດດຸດກວາດເສດຫີນ ແລະ ດິນດັ່ງກ່າວນັ້ນອອກໂດຍໄວຄາດວ່າຕອນແລງຂອງວັນນີ້ລົດສາມາດທຽວໄດ້ປົກກະຕິ.
