ສະຫງວນລິຂະສິດ © ສະຖານີ ວິທະຍຸກະຈາຍສຽງແຫ່ງຊາດລາວ

ວິທະຍຸກະຈາຍສຽງແຫ່ງຊາດລາວ

Lao National Radio

ຊົມເຊີຍ ວັນສ້າງຕັ້ງວິທະຍຸກະຈາຍສຽງແຫ່ງຊາດລາວ ຄົບຮອບ 60 ປີ
(13 ສິງຫາ 1960-13 ສິງຫາ 2020) ຢ່າງສຸດໃຈ

ເມືອງງອຍ ໄຂກອງປະຊຸມໃຫຍ່ ອົງຄະນະພັກເມືອງ ຄັ້ງທີ XI

ກອງປະຊຸມໃຫຍ່ຜູ້ແທນອົງຄະນະພັກເມືອງຯງອຍ ຄັ້ງທີ XI ໄດ້ໄຂຂຶ້ນຢ່າງເປັນທາງການ, ໃນວັນທີ່ 25 ທັນວາ2019, ມີ ສະຫາຍ ຄໍາຂັນ ຈັນທະວີສຸກ ກຳມະການສູນກາງພັກ ເລຂາຄະນະບໍລິຫານງານພັກແຂວງ ເຈົ້າແຂວງຫຼວງພະບາງ, ພ້ອມດ້ວຍຜູ້ແທນຮັບເຊີນ ແລະຜູ້ແທນສົມບູນ 127 ສະຫາຍ, ທີເປັນຕົວແທນໃຫ້ແກ່ສະມາຊິກພັກ 1.157 ສະຫາຍ, ທົວເມືອງ.
ສະຫາຍ ຄຳດີ ຈິດຕະປັນຍາ ຮັກສາການເລຂາພັກເມືອງ ໄດ້ກ່າວເປີດກອງປະຊຸມພ້ອມທັງຜ່ານຮ່າງລາຍງານການເມືອງວ່າ: ກອງປະຊຸມໃຫຍ່ຄັ້ງນີ້ ດຳເນີນພາຍໃຕ້ຄໍາຂວັນ ສ້າງເມືອງງອຍໃຫ້ກາຍເປັນເມືອງທ່ອງທ່ຽວທາງດ້ານທໍາມະຊາດ, ປະຫັວດສາດ, ວັດທະ ນະທໍາ ຕິດພັນກັບການຜະລິດກະສິກໍາເປັນສິນຄ້າແບບຍືນຍົງ, ເປັນທາງຜ່ານເຊື່ອມຕໍ່ໄປສູ່ບັນດາເມືອງ, ແຂວງພາກເໜືອ, ນະຄອນດຽນບ່ຽນຟູ ສສ ຫວຽດນາມ ແລະ ເປັນຫົວ ໜ່ວຍເຂັ້ມ ແຂງຮອບດ້ານເທື່ອລະກ້າວ ໂດຍໄດ້ຕີລາຄາຜົນສໍາເລັດ ຂອງການຈັດຕັ້ງປະ ຕິບັດມະຕິກອງປະຊຸມໃຫຍ່ ຄັ້ງທີ X ຂອງສູນກາງພັກ, ມະຕິກອງປະຊຸມໃຫຍ່ຄັ້ງທີ VII ອົງ ຄະນະພັກແຂວງ ແລະມະຕິກອງປະຊຸມໃຫຍ່ຄັ້ງທີ X ຂອງອົງຄະນະພັກເມືອງງອຍ ແຕ່ປີ 2015-2019 ຕະຫຼອດໄລຍະ 5 ປີ ແຫ່ງການນໍາພາວຽກງານຮອບດ້ານ ຂອງອົງຄະນະພັກເມືອງງອຍ ໄດ້ເຮັດໃຫ້ທົ່ວເມືອງມີຄວາມສະຫງົບ, ປອດໄພ, ມີຄວາມເປັນລະບຽບຮຽບ ຮ້ອຍໂດຍພື້ນຖານ, ການພັດທະນາເສດຖະກິດ ເປັນໃຈກາງຕາມທິດຍືນຍົງ ໄດ້ຮັບການ ຈັດຕັ້ງປະຕິບັດຢ່າງຕໍ່ເນື່ອງ, ຍ້ອນທຸກຂົງເຂດວຽກງານໄດ້ຫັນເອົາຄາດໝາຍ ມະຕິກອງປະຊຸມໃຫຍ່ຄັ້ງທີ X ຂອງອົງຄະນະພັກເມືອງ ເປັນແຜນການ, ໂຄງການຈຸດສຸມອັນລະອຽດ ຂອງແຕ່ລະຂົງເຂດວຽກງານ ໄດ້ຮັບການຈັດຕັ້ງປະຕິບັດເປັນຢ່າງດີແຕ່ຫົວທີ, ການປຸກລະດົມ ທຶນ, ລົງທຶນຈາກທຸກພາກສ່ວນ ໄດ້ດໍາເນີນເປັນປົກກະຕິ ແລະ ຖືກທິດ; ທຸລະກິດຂະໜາດນ້ອຍ, ຂະບວນການຜະລິດເປັນສິນຄ້າ, ການປູກຝັງ-ລ້ຽງສັດ, ຫັດຖະກຳໄດ້ຮັບການຊຸກຍູ້ສົ່ງເສີມ, ການພັດທະນາການທ່ອງ ທ່ຽວໄດ້ດໍາເນີນໄປຢ່າງແຂງແຮງ; ການກໍ່ສ້າງພື້ນຖານໂຄງລ່າງ ໄດ້ຮັບການຈັດຕັ້ງປະຕິບັດ ດ້ວຍການນຳໃຊ້ທ່າແຮງບົ່ມຊ້ອນ ຂອງທ້ອງຖິ່ນ ແລະການມີສ່ວນຮ່ວມ ຂອງປະຊາຊົນຢ່າງກ້ວາງຂວາງ, ອັນໄດ້ສ້າງເງື່ອນ ໄຂ, ສິ່ງເອື້ອອຳນວຍ ໃຫ້ແກ່ການພັດທະນາເສດຖະກິດ-ສັງຄົມຂອງເມືອງ ກໍ່ຄືການແກ້ໄຂຄວາມທຸກຍາກຂອງປະຊາຊົນບັນດາເຜົ່າດີຂື້ນເປັນກ້າວໆ; ເສດຖະກິດໄດ້ຂະຫຍາຍຕົວຢ່າງຕໍ່ເນື່ອງ ໃນລະດັບສະເລ່ຍ 7,8% ຕໍ່ປີ, ລວມຍອດຜະລິດຕະພັນພາຍໃນເມືອງ (GDP) ປີ 2019 ບັນລຸໄດ້ 305 ຕຶ້ກີບ, ສະເລ່ຍລາຍຮັບໄດ້ 9.817.000 ກີບຕໍ່ຄົນຕໍ່ປີ ຫຼື ເທົ່າກັບ 1.227 ໂດລາຕໍ່ຄົນຕໍ່ປີ.
ກອງປະຊຸມໃຫຍ່ຜູ້ແທນອົງຄະນະພັກເມືອງງອຍ ຄັ້ງທີ XI ຈະໄດ້ດຳເນີນເປັນເວລາ 2 ວັນ ໂດຍຈະພິຈາລະນາຮັບຮອງເອົາຮ່າງລາຍງານການເມືອງ, ແຜນພັດທະນາເສດ ຖະກິດສັງຄົມຂອງເມືອງໃນ 5 ປີຕໍ່ໜ້າ ທັງຈະໄດ້ປ່ອນບັດເລືອກຕັ້ງ ເອົາຄະນະບໍລິຫານງານພັກເມືອງຊຸດໃໝ່ ແລະເລືອກເອົາຜູ້ແທນສົມບູນ-ສຳຮັງ ໄປຮ່ວມ ກອງປະຊຸມໃຫຍ່ຜູ້ແທນອົງຄະນະພັກແຂວງ ຕື່ມອີີກ.

ຂ່າວ: ອາພຸດເດດ ບຸບຜາ