ວິທະຍຸກະຈາຍສຽງແຫ່ງຊາດລາວ

Lao National Radio

ຕັ້ງໜ້າຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XI ຂອງພັກ ເຂົ້າສູ່ຊີວິດຈິງ
ຕອນບ່າຍວັນທີ 20 ກັນຍາ 2022 ທ່ານດວງຕາ ສຸລິວົງ ເຈົ້າເມືອງຈັນທະບູລີ ປະທານ ຄະນະກໍາມະການຈັດງານ ບຸນອອກພັນສາປະວໍລະນາ ແລະ ບູນຊ່ວງເຮືອປະຈຳປີ 2022 ໄດ້ຖະແຫລງຕໍ່ສື່ມວນຊົນ ເຖິງການກະກຽມຄວາມພ້ອມດ້ານຕ່າງໆ ໃນການຈັດ ບຸນອອກພັນສາປະວໍລະນາ ແລະ ບູນຊ່ວງເຮືອປະຈຳປີ 2022 ທ່ານເຈົ້າເມືອງຈັນທະບູລີ ກ່າວວ່າ: ໃນນາມ ປະທານ ຄະນະກໍາມະການຈັດງານບຸນ ມີຄວາມພາກພູມໃຈເປັນຢ່າງຍິ່ງ ທີິ່ໄດ້ຕາງໜ້າ ໃຫ້ແກ່ຄະນະຈັດງານ ບຸນອອກພັນສາປະວໍລະນາ ແລະ ບູນຊ່ວງເຮືອປະຈຳປີ 2022 ນີ້: ຂໍຖະແຫຼງຜ່ານສື່ມວນຊົນ ໃຫ້ທຸກທ່ານໄດ້ຮັບຊາບ, ເຊິ່ງການຈັດງານບຸນອອກພັນສາ ປະວໍລະນາ ແລະ ບຸນຊ່ວງເຮືອ ໃນປີນີ້ ແມ່ນພວກເຮົາໄດ້ຈັດໃຫຍ່ສະນັ້ນ; ພື້ນທີິ່ຈັດງານບຸນ ການຂາຍສິນຄ້າຜະລິດຕະພັນຕ່າງໆ, ກໍານົດໃຫ້ຂາຍແຕ່ພາຍໃນຂອບເຂດສວນເຈົ້າອານຸວົງ ແລະ ຂອບເຂດພາຍນອກຈໍານວນໜຶ່ງ, ເຊິ່ງລາຍລະອຽດຂອງງານບຸນ ພວກເຮົາໄດ້ກໍານົດດັ່ງນີ້:
I ຈຸດປະສົງຄາດໝາຍລວມ.
1. ເພື່ອເປັນການຮັກສາແລະເສີມຂະຫຍາຍງານບຸນປະເພນີທີ່ເຄີຍສຶບທອດກັນມາແຕ່ບູຮານນະການໃຫ້ດຳລົງຄົງຢູ່ນຳຊາວລາວຕະຫຼອດໄປ.
2. ເພື່ອເປັນການສົ່ງເສີມ,ໂຄສະນາ, ວາງສະແດງແລະ ຈໍາໜ່າຍສິນຄ້າ ເພື່ອເຮັດໃຫ້ຜະລິດຕະພັນສິນຄ້າພາຍໃນ ໃຫ້ນັບມື້ເຕີບໃຫຍ່ຂະຫຍາຍຕົວຢ່າງກວ້າງຂວາງ ແລະ ໄດ້ມີໂອກາດເສີມຂະຫຍາຍທ່າແຮງບົ່ມຊ້ອນຂອງສິນຄ້າດັ່ງກ່າວ ເພື່ອໃຫ້ປະຊາຊົນລາວບັນດາເຜົ່າທີ່ມາທ່ຽວງານບຸນໄດ້ຊື້, ໄດ້ຂາຍ, ໄດ້ແລກປ່ຽນຜະລິດຕະພັນພາຍໃນ ແລະ ທັງເປັນການສົ່ງເສີມການທ່ອງທ່ຽວພາຍໃນ ລາວທ່ຽວລາວ.
3. ເພື່ອຮັກສາໄດ້ຄວາມສາມັກຄີ ແລະ ສົ່ງເສີມການທ່ອງທ່ຽວ ຢູ່ ເມືອງຈັນທະບູລີ ກໍ່ຄື ຢູ່ໃນນະຄອນຫຼວງວຽງຈັນ ໃຫ້ກວ້າງຂວາງ ແລະ ເປັນຂະບວນຟົດຟື້ນ.
II. ບັນດາເນື້ອໃນແລະກິດຈະກຳການເຄື່ອນໄຫວ ໃນງານບຸນອອກພັນສາປະວໍລະນາ ແລະ ບູນຊ່ວງເຮືອ ປະຈຳປີ20202 ເມືອງຈັນທະບູລີນະຄອນຫຼວງວຽງຈັນເຊິ່ງມີທັງໝົດ 7 ກິດຈະກຳດັ່ງນີ້:
1) ກິດຈະກຳ ທາງດ້ານສາດສະໜາແລະຮີດຄອງປະເພນີ:
①. ໃນຕອນເຊົ້າວັນທີ5/10/2020; ເວລາ6:30 ໂມງ, ຕອນເຊົ້າ:ມີການຄອບໄຄ່ວສະຖານທີ່ສັກສິດ.
②. ເລີ່ມເວລາ 3:00 ໂມງ, ຕອນເຊົ້າ ຂອງວັນທີ10/10/2020 ເປັນຕົ້ນໄປຈະໄດ້ມີພິທີຄື:
 ເຂດວັດວາອາຣາມ:
– ເວລາ: 3:00-4:00ໂມງ ( ຕອນເຊົ້າ ): ພຣະອາຈານມີພິທີສູດອອກພັນສາ ປະວໍລະນາ.
– ເວລາ: 7:00 ໂມງ ( ຕອນເຊົ້າ ): ພິທີຕັກບາດຖວາຍສັງຄະທານຕາມປະເພນີລາວ.
– ເວລາ: 19:00-19:40 ໂມງ: ມີພິທີວຽນທຽນ, ໄຫຼເຮືອໄຟໂຄກ.
 ເຂດສວນເຈົ້າອານຸວົງ ແລະ ຜາມໄຊ (ທ່າວັດຈັນ):
– ເວລາ 20:00 ໂມງ ເປັນຕົ້ນໄປ ມີການຄົບງັນ, ຈຸດບັ້ງໄຟພຸ, ໄຟດອກ ແລະ ບັ້ງໄຟຕະໄລ່.
– ມີການ ສະແດງ ສີລະປະວັນນະຄະດີ ຈາກພາກສ່ວນ ໂຮງຮຽນຢູ່ພາຍໃນເມືອງຈັນທະບູລີຈຳນວນໜຶ່ງ.
 ເຂດແຄມຂອງທ່າວັດຈັນ:
– ມີການໄຫລເຮືອໄຟ ແລະບໍ່ອານຸຍາດໃຫ້ອອກໄປໄຫຼຢູ່ກາງຂອງ.
2) ກິດຈະກໍາ ການຊ່ວງເຮືອ ໃນວັນທີ 11/10/2022:
– ກິດຈະກໍາການແຂ່ງຂັນຊ່ວງເຮືອທີ່ທ່າວັດຈັນ ປະຈຳປີ2022ແມ່ນຈະຈັດການແຂ່ງຂັນຢູ່ທີ່ທ່າວັດຈັນ ເມືອງຈັນທະບູລີ ຈະໄດ້ຊ່ວງເຮືອປະເພນີຍິງ, ປະເພນີຊາຍ, ເຮືອສູດຊາຍ ( ຖ້າຫາກມີນ້ຳຫຼາຍ ), ກໍລະນີມີນ້ໍາໜ້ອຍຈະໄດ້ຍ້າຍໄປແຂ່ງຂັນຢູ່ຕໍ່ໜ້າໂຮງແຮມແລນມາກ.
– ເລີ່ມແຕ່ເວລາ 08:30 ໂມງ( ຕອນເຊົ້າ ) ເປັນຕົ້ນໄປ ເລີ່ມຊ່ວງເຮືອ, ເວລາ 16:00 ໂມງ ມອບລາງວັນເຮືອຊ່ວງ.
– ຖ້າມີນ້ຳໜ້ອຍ ແມ່ນຈະໄດ້ຈັດການຊ່ວງເຮືອ 12 ສີພາຍ ໃນວັນທີ 10/10/2022 ຢູ່ບຸ່ງ ທີ່ທ່າວັດຈັນ ເມືອງຈັນທະບູລີ ເພື່ອໃຫ້ຖືກຕ້ອງຕາມຮີດຄອງປະເພນີ. ເລີ່ມແຕ່ ເວລາ 9:00 ໂມງ ຮອດ 15 ໂມງ ແມ່ນສຳເລັດການແຂ່ງຂັນ.
 ຄາດຄະເນ ຈຳນວນເຮືອເຂົ້າຮ່ວມການແຂ່ງຂັນ ໃນປີ 2022 ນີ້:
– ປະເພດເຮືອ 12 ສີພາຍ ມີປະມານ 8 ລຳ, ເຮືອປະເພນີ ຍິງ 55 ສີພາຍ ປະມານ 4 ລຳ ແລະ ເຮືອປະເພນີ ຊາຍ 55 ສີພາຍ 10 ລຳ.
 ປະເພດຂັນລາງວັນ ແລະ ເງິນສົດ ເຮືອແຕ່ລະປະເພດໄດ້ກຳນົດດັ່ງນີ້:
– ປະເພດເຮືອ 12 ສີພາຍ :
ລາງວັນທີ 1: ຂັນໂລ 1 ໜ່ວຍ, ມູນຄ່າ 1,850,000 ກີບ, ເງິນສົດ: 10,000,000 ກີບ.
ລາງວັນທີ 2:ຂັນໂລ 1 ໜ່ວຍ, ມູນຄ່າ 1,850,000 ກີບ, ເງິນສົດ: 8,000,000 ກີບ.
ລາງວັນທີ 3: ຂັນໂລ 1 ໜ່ວຍ, ມູນຄ່າ 1,850,000 ກີບ, ເງິນສົດ: 6,000,000 ກີບ.
ລາງວັນທີ 4: ບໍ່ມີຂັນ ເງິນສົດ: 4,000,000 ກີບ.
– ປະເພດເຮືອປະເພນີ ຍິງ ແລະ ຊາຍ 55 ສີພາຍ:
ລາງວັນທີ 1: ຂັນເງິນ1 ກີໂລ, ມູນຄ່າ 19,700,000 ກີບ, ເງິນສົດ: 20,000,000 ກີບ.
ລາງວັນທີ 2: ຂັນເງິນ0,75 ກຼາມ, ມູນຄ່າ 15,250,000 ກີບ, ເງິນສົດ: 15,000,000 ກີບ.
ລາງວັນທີ 3: ຂັນເງິນ0,5 ກຼາມ, ມູນຄ່າ 12,000,000 ກີບ, ເງິນສົດ: 10,000,000 ກີບ.
ລາງວັນທີ 4: ບໍ່ມີຂັນ ເງິນສົດ: 6,000,000 ກີບ.
3) ກິດຈະກຳວາງສະແດງສິນຄ້າ:
4) ພາຍໃນງານບຸນພວກເຮົາໄດ້ຈັດໃຫ້ມີການວາງສະແດງແລະຂາຍສິນຄ້າເຄື່ອງທົ່ວໄປທັງພາຍໃນແລະຕ່າງປະເທດ.ໃນນີ້: ໄດ້ເນັ້ນການສົ່ງເສີມຜະລິດຕະພັນ, ສິນຄ້າທີ່ພົ້ນເດັ່ນຂອງທ້ອງຖິ່ນ, ຂອງບ້ານ, ຂອງເມືອງ, ຂອງຄົວຄອບຕົວແບບ, ຄອບຄົວຜະລິດສິນຄ້າໂອດອບ ເພື່ອເປັນສົ່ງເສີມຫົວໜ່ວຍທຸລະກິດຕ່າງໆ.
ຄາດຄະເນຈຳນວນ ຫົວໜ່ວຍທຸລະກິດ, ຫ້າງຮ້ານ ທີ່ມາວາງສະແດງ, ຂາຍສິນຄ້າ ແລະ ຂາຍເຂົ້າຫຼາກ,ປີ້ງໄກ່ 600 ກວ່າຫົວໜ່ວຍ.
ສຳລັບລາຄາ ຄ່າສະຖານທີ່, ຄ່າເກັບມ້ຽນຂີ້ເຫຍື້ອ ແລະ ອື່ນໆ ໄດ້ໃຫ້ຜູ້ສຳປະທານກຳນົດ ໂດຍໄດ້ເຫັນດີເປັນເອກະພາບຈາກຄະນະກຳມະການຈັດງານ ( ສ່ວນລາຍລະອຽດແມ່ນພວກເຮົາໄດ້ກຳນົດໄວ້ຢູ່ໃນລະບຽບການຄຸ້ມຄອງຕາງຫາກແລ້ວ.
5) ກິດຈະກຳປ້ອງກັນຊາດ-ປ້ອງກັນຄວາມສະຫງົບ:
ພວກເຮົາໄດ້ຖືສໍາຄັນ ຕໍ່ກັບວຽກງານປ້ອງກັນຄວາມສະຫງົບປອດໄພຮອບດ້ານ ໂດຍໃຫ້ມີການຈັດຕັ້ງການປ້ອງກັນເວນຍາມ ແລະປະຈຳການຕະຫຼອດ 24 ຊົ່ວໂມງຢູ່ຕາມບ້ານ, ສຳນັກງານ, ອົງການ ທົ່ວເມືອງໃຫ້ມີຄວາມສະຫງົບປອດໄພ 100% ເຊິ່ງກຳນົດຈຸດປ້ອງກັນ38ຈຸດ, ໃນນີ້: ຈຸດປ້ອງກັນວົງໃນ19 ຈຸດແລະວົງນອກ19 ຈຸດແລະປ້ອມແຈ້ງເຫດ (1191)2 ຈຸດ, ມີສູນກ້ອງວົງຈອນ ເພື່ອຕິດຕາມ ຢູ່ຫ້ອງການສວນເຈົ້າອານຸວົງ ແລະ ຜາມກໍາມະການ,ມີກໍາລັງປ້ອງກັນທັງໝົດມີ 828ຄົນ,ໃນນີ້ ກໍາລັງຊາວໜຸ່ມ 300 ຄົນ,
6) ກິດຈະກຳວຽກງານການອານາໄມທຳຄວາມສະອາດ:
ຊຸກຍູ້ຂະບວນການອອກແຮງງານອະນາໄມ ສະຖານທີ່ຈັດງານ ແລະ ຂອບເຂດພາຍນອກຈໍານວນໜຶ່ງ ໃຫ້ມີຄວາມສະອາດ ແລະສວຍງາມ.
ສໍາລັບຢູ່ໃນບໍລິເວນງານບຸນທ່າວັດຈັນ ໄດ້ມີ ບໍລິສັດ ຜູ້ຮັບເໝົາຄື:ຫ້ອງການ ຄບຕເມືອງຈັນທະບູລີ ແລະ ບໍລິສັດ ອານາໄມເປັນຜູ້ຮັບຜິດຊອບ ໃນການອະນາໄມທໍາຄວາມສະອາດພາຍໃນງານບຸນ.
ພ້ອມນັ້ນ;ພວກເຮົາຍັງຊຸກຍູ້,ແນະນໍາທຸກພາກສ່ວນທີ່ມີຖານສ້າງລາຍຮັບຢູ່ໃນງານບຸນ ຕ້ອງມີຖົງຢາງດໍາເພື່ອໃສ່ເຈ້ຍ,ເສດຖົງຢາງ, ສິ່ງເສດເຫຼືອຕ່າງໆ, ເວລາເລີກງານແຕ່ລະຄືນ ຕ້ອງເຮັດອະນາໄມບໍລິເວນຮ້ານຂອງຕົນເອງແລ້ວເອົາໃສ່ຖົງຢາງດໍາປະໄວ້ຂ້າງຮ້ານ ເພື່ອໃຫ້ພາກສ່ວນອະນາໄມມາເກັບເອົາໄປຖີ້ມ.
ສຳລັບການຂົນສົ່ງຂີ້ເຫຍື້ອ ແມ່ນພາຍຫຼັງເລີກງານບູນ ໃນເວລາ 23:00 ໂມງ ແມ່ນພວກເຮົາເຂົ້າອະນາໄມ ແລະ ໃຫ້ສຳເລັດພາຍໃນ 5: 00 ໂມງ (ຕອນເຊົ້າ).
7) ກິດຈະກຳວຽກງານ ຮັກສາສຸຂະພາບ:
ມີບັນດາເພດໝໍ ປະຈໍາການຢູ່ຜາມຄະນະກຳມະການ 24 ຊົ່ວໂມງ ຕະຫຼອດໄລຍະງານບຸນ ເພື່ອແກ້ໄຂບັນຫາສຸກເສີມ ແຂກຄົນທີ່ມາທ່ຽວງານບູນທີ່ບໍ່ສະບາຍ ໂດຍສະເພາະແມ່ນ ເປັນວິນ, ເກີດອຸປະຕິເຫດ ແລະ ອື່ນໆພ້ອມນີ້ໄດ້ລົງກວດກາ ປະເພດອາຫານ ແລະ ເຄື່ອງດື່ມ ໃຫ້ຮັກສາໄດ້ທາງຄຸນນະພາບ, ຮັກສາໄດ້ຄວາມສະອາດ, ສິນຄ້າບໍ່ໝົດອາຍຸ.
😎 ວຽກງານປະຊາສຳພັນ:
ມີໂທລະໂຄ່ງ ປະຈຳງານບຸນ ນັບແຕ່ມື້ຈັດງານຈົນເຖິງມື້ປິດງານ ເພື່ອຮັບໃຊ້ວຽກງານປະຊາສຳພັນຕ່າງໆ, ເຊິ່ງພວກເຮົາໄດ້ຕິດຕັ້ງໂທລະໂຄ່ງ ມີ 12ຈຸດ.
III. ການກໍານົດວັນ, ເວລາ ແລະຂອບເຂດສະຖານທີ່ຂອງການຈັດງານ:
ກ. ດ້ານກຳນົດເວລາຈັດງານບຸນຢ່າງເປັນທາງການ 4 ວັນ, ແຕ່ວັນທີ 8-11/10/2022.
ຂ. ສະຖານທີ່ການຈັດງານບຸນ:
1. ຂອບເຂດບໍລິເວນພື້ນທີ່ຈັດງານບຸນອອກພັນສາປະວໍລະນາແລະຊ່ວງເຮືອປະຈໍາປີ2022 ທີ່ທ່າວັດຈັນ: ທາງດ້ານເໜືອໃຫ້ກຳນົດເອົາຈຸດປ່ອຍເຮືອເຂດບ້ານສີຖານເໜືອເມືອງສີໂຄດຕະບອງລົງໄປຫາຜາມໄຊໜ້າວັດຈັນ.
2. ສະຖານທີ່ວາງສະແດງ-ຂາຍສິນຄ້າ: ແມ່ນຂອບເຂດສວນເຈົ້າອານຸວົງ ແລະເສັ້ນທາງເຈົ້າຟ້າງຸ່ມທັງ 2 ຟາກນັບແຕ່ໂຮງແຮມລ້ານຊ້າງຂຶ້ນມາຫາສາມແຍກປາກປາສັກແລະເສັ້ນທາງດ້ານໜ້າແລະດ້ານຫຼັງໂຮງຮຽນປາກປ່າສັກ.( ແຕ່ພວກເຮົາໄດ້ຈົ່ງທາງເຂົ້າ-ອອກ) ໃຫ້ມວນຊົນແລະລົດການນຳເຂົ້າມາໄດ້ຢ່າງສະດວກ.
3. ເສັ້ນທາງ 4 ແຍກທະນາຄານພັດທະນາລາວລົງມາສີ່ແຍກໄຟແດງສີຫອມ,ສາມແຍກໄຟແດງວັດອິນແປງເສັ້ນທາງເສດຖາທິລາດ ໄປຫາສີ່ແຍກໄຟແດງ ວັດສີສະເກດ ເປັນບ່ອນຈອດລົດຈັກ ແລະ ລົດໃຫຍ່ ບາງຈຸດ.
4. ສຳລັບການສຳປະທານງານບຸນພວກເຮົາໄດ້ຕົກລົງມອບໃຫ້ກຸ່ມບໍລິສັດດາວເຮືອງ ແລະວິສາຫະກິດສ່ວນບຸກຄົນຮ້ານອາຫານຟຸຈິວະຣະເປັນຜູ້ຮັບເໝົາ ໃນການຈັດງານໃນປີນີ້.
5. ສຳລັບສະຖານທີ່ຈອດລົດຂອງການນຳ, ຄະນະກຳມະການຮັບຜິດຊອບງານບຸນ, ແຂກຖືກເຊີນແມ່ນກຳນົດເອົາເສັ້ນທາງເຈົ້າອານຸວົງໃໝ່ ( ແຄມຂອງ ) ນັບແຕ່ຈຸດທາງເຂົ້າຈົນຮອດອານຸສາວະລີເຈົ້າອານຸວົງ ( ສະເພາະລົດທີ່ມີ P ເທົ່ານັ້ນ ).
6. ກຳນົດເວລາເຂົ້າ-ອອກຂອງລົດຊາວຄ້າຂາຍຢູ່ງານບຸນແມ່ນອະນຸຍາດໃຫ້ເຂົ້າໄດ້ແຕ່ເວລາ4:00-6:00ໂມງເຊົ້າແລະຕອນກາງຄືນແມ່ນອະນຸຍາດໃຫ້ເຂົ້າໄດ້ເວລາ24:00 ໂມງເປັນຕົ້ນໄປ.
7. ເວລາປິດເສັ້ນທາງການສັນຈອນຊົ່ວຄາວຢູ່ໃນຂອບເຂດການຈັດງານບຸນແມ່ນເລີ່ມແຕ່ເວລາ6:00 ໂມງເຊົ້າຫາ 24:00 ໂມງກາງຄືນ.
IV. ບັນດາຂໍ້ຫ້າມຕ່າງໆໃນການເຂົ້າຮ່ວມງານບຸນ:
1. ຫ້າມບໍ່ໃຫ້ມີການໂຄສະນາທຸກຮູບແບບທີ່ຜິດຕໍ່ກົດໝາຍຂອງສປປລາວ.
2. ຫ້າມຂາຍຫຼືນໍາເອົາອາວຸດທຸກປະເພດລວມທັງ: ພ້າ, ມີດ, ງ້າວ, ໜ້າເກັກ, ກະຖູນ, ສະໜັບມື, ໂຄມໄຟລອຍແລະປະເພດມີຄົມຕ່າງໆເຂົ້າໄປໃນງານໂດຍເດັດຂາດເວັ້ນເສຍແຕ່ເຈົ້າໜ້າທີ່ທີ່ໄດ້ຮັບອານຸຍາດ.
3. ຫ້າມນໍາເອົາຢາເສບຕິດ, ທາດເບື່ອ, ສານເຄມີທີ່ອອກລິດທາງປະສາດທຸກຊະນິດ, ສິ່ງທີ່ພາໃຫ້ເກີດສຽງດັງເກີນຂອບເຂດ, ບັ້ງກະໂພກເຂົ້າມາຈູດແລະວາງຂາຍພາຍໃນງານຢ່າງເດັດຂາດ.
4. ຫ້າມນຳເອົາພະລິດຕະພັນທີ່ລອກແບບສິ້ນລາວຫຼື ເຄື່ອງນຸ່ງລາວນຳເອົາມາຂາຍ-ຈຳໜ່າຍ ພາຍໃນງານ ຢ່າງເດັດຂາດ.
5. ຫ້າມວາງ, ຂາຍເຄື່ອງແລະນຳເຄື່ອງສຽງອອກມາໂຄສະນາສິນຄ້າຢູ່ນອກບໍລິເວນຮ້ານ ເກີນຂອບເຂດ ທີ່ຄະນະກໍາມະການຈັດງານ ໄດ້ກຳນົດໃຫ້.
6. ຫ້າມຂາຍ ແລະນຳເອົາຜະລິດຕະພັນວັດທະນະທໍາລາມົກ ເຊັ່ນ: ແຜ່ນຊີດີ ( CD , DVD ) ລາມົກແລະ ຮູບພາບລາມົກຕ່າງໆ ເຂົ້າມາວາງຂາຍຢູ່ໃນງານຢ່າງເດັດຂາດ.
7. ຫ້າມຫຼີ້ນການພະນັນທຸກປະເພດ ແລະອາລະວາດຕີກັນ ຢ່າງເດັດຂາດ.
8. ຫ້າມຂາຍເຄື່ອງຊະຊາຍໂດຍບໍ່ໄດ້ຮັບອານຸຍາດຈາກຄະນະກໍາມະການຈັດງານຕະຫຼາດນັດ, ງານບຸນອອກພັນສາປະວໍລະນາ ປະຈຳປີ 2022 ທີ່ທ່າວັດຈັນ ເມືອງຈັນທະບູລີນະຄອນຫຼວງວຽງຈັນ.
9. ຫ້າມດື່ມສິ່ງມຶນເມົາເກີນຂອບເຂດ ຖ້າຜູ້ໃດລະເມີດຈະຖືກເຈົ້າໜ້າທີ່ກ່າວເຕືອນຫຼືນໍາຕົວໄປພັກຜ່ອນໄວ້ກ່ອນ.
10. ຫ້າມບຸກຄົນ, ນິຕິບຸກຄົນ, ສໍານັກງານອົງການປົກຄອງບ້ານກີດຂວາງການຈັດສັນສະຖານທີ່ວາງສະແດງຂາຍສິນຄ້າຂອງຄະນະກຳມະການຈັດງານຕະຫຼາດນັດ.
11. ຫ້າມຕອກເຫຼັກຫຼືສິ່ງຂອງຕ່າງໆ ໃສ່ພື້ນທີ່ຢ່າງເດັດຂາດ.
12. ຫ້າມແຈກຢາຍແຜ່ນພັບຫຼືແຜ່ນເຈ້ຍໂຄສະນາສິນຄ້າຕ່າງໆຢູ່ພາຍໃນງານບຸນ.
13. ຫ້າມຜູ້ສຳປະທານສະຖານທີ່ງານບຸນມອບສະຖານທີ່ໃຫ້ແກ່ຜູ້ສຳປະທານອື່ນຈັບຈອງຕໍ່ເດັດຂາດ.
14. ຫ້າມມີການໂຄສະນາສິນຄ້າໂດຍການເຕັ້ນໂຊນາງສາວແລະບໍ່ໃຫ້ມີມິນິຄອນເສີດ.
V. ວິທີຈັດຕັ້ງປະຕິບັດ.
ພວກເຮົາໄດ້ແຕ່ງຕັ້ງຄະນະກຳມະການຮັບຜິດຊອບຊີ້ນຳລວມເຊິ່ງມີ 11 ທ່ານໂດຍແມ່ນເຈົ້າເມືອງເປັນປະທານຈັດງານບຸນ, ນອກຈາກນີ້ພວກເຮົາຍັງໄດ້ແຕ່ງຕັ້ງບັນດາອານຸກຳມະການຊ່ວຍວຽກຕ່າງໆ, ເຊິ່ງມີທັງໝົດ9ອານຸກຳມະການຄື:
 ອານຸກຳມະການ ເສດຖະກິດ, ຈັດສັນສະຖານທີ່ວາງສະແດງ ແລະກວດກາສິນຄ້າ.
 ອານຸກຳມະການ ຮັກສາຄວາມສະອາດ.
 ອານຸກຳມະການ ທາງດ້ານ ສາສະໜາ ແລະຮີດຄອງປະເພນີ.
 ອານຸກຳມະການ ຖະແຫຼງຂ່າວ,ວັດທະນະທຳ-ທ່ອງທ່ຽວ,ໂຄສະນາປະຊາສຳພັນ.
 ອານຸກຳມະການ ກິລາ ແລະຈັດການແຂ່ງຂັນເຮືອຊ່ວງ.
 ອານຸກຳມະການ ປ້ອງກັນຊາດ-ປ້ອງກັນຄວາມສະຫງົບພາຍໃນງານ-ນອກງານ.
 ອານຸກຳມະການພິທີການແລະຮັບແຂກ.
 ອານຸກຳມະການ ຮັກສາສຸຂະພາບ.
 ອານຸກຳມະການ ກອງເລຂາ
ພ້ອມນີ້: ພວກເຮົາໄດ້ແຕ່ງຕັ້ງຈຸປະຈຳການໃນແຕ່ລະວັນ ໂດຍເລີ່ມແຕ່ວັນທີ: 8-11/10/2022 ປະຈໍາຢູ່ຜາມກຳມະການ ເພື່ອບັນຊາ, ຕິດຕາມ, ກວດກາເລີ່ມແຕ່ເວລາ 8:30 ແລະມີການຮັບສ່ອງແສງລາຍງານປະຈຳທຸກໆວັນ ເຊິ່ງກຳນົດເອົາເວລາ21:30ໂມງ ຢູ່ຜາມກໍາມະການ.
ທ່ານດວງຕາ ສຸລິວົງ ເຈົ້າເມືອງຈັນທະບູລີ ປະທານ ຄະນະກໍາມະການຈັດງານບຸນ ບຸນອອກພັນສາປະວໍລະນາ ແລະ ບູນຊ່ວງເຮືອປະຈຳປີ 2022ກ່າວມ້ວນທ້າຍວ່າ: ມາເຖິງປະຈຸບັນ ພວກເຮົາມີຄວາມພ້ອມໃນທຸກໆດ້ານເພື່ອກະກຽມເຂົ້າສູ່ງານດັ່ງກ່າວ. ສະນັ້ນທັງໝົດວຽກງານທີ່ໄດ້ແຈ້ງມານັ້ນ; ຈຶ່ງຮຽກຮ້ອງມາຍັງບັນດາທ່ານ ທຸກພາກສ່ວນ, ຕະຫຼອດຮອດພະນັກງານ, ທະຫານ,ຕຳຫຼວດ, ປະຊາຊົນບັນດາເຜົ່າທົ່ວນະຄອນຫຼວງວຽງຈັນຈົ່ງພ້ອມກັນຮ່ວມແຮງຮ່ວມໃຈເປັນເຈົ້າການປະກອບສ່ວນແລະເຂົ້າຮ່ວມງານບຸນອອກພັນສາປະວໍລະນາແລະບູນຊ່ວງເຮືອປະຈໍາປີ2022ທີ່ທ່າວັດຈັນເມືອງຈັນທະບູລີນະຄອນຫຼວງວຽງຈັນດ້ວຍບັນຍາກາດເບີກບານມ່ວນຊື່ນ, ມີສະຕິລະວັງຕົວ, ເປັນເຈົ້າການໃນການປ້ອງກັນຄວາມສະຫງົບ, ຄວາມເປັນລະບຽບຮຽບຮ້ອຍ, ຮັກສາອະນາໄມຄວາມສະອາດ ແລະ ມີສະຕິໃນການປ້ອງກັນ, ຄວບຄຸມການແຜ່ລະບາດ ຂອງພະຍາດ COVID19 ຢ່າງເຂັ້ມງວດ.