ກອງປະຊຸມໃຫຍ່ຜູ້ແທນອົງຄະນະພັກເມືອງຈຳປາສັກຄັ້ງທີ VIII ໄຂຂຶ້ນຢ່າງເປັນທາງການ ໃນ ວັນທີ 13 ມັງກອນ 2020, ຢູ່ທີ່ສະໂມສອນຂອງເມືອງ. ໂດຍການໃຫ້ກຽດເຂົ້າຮ່ວມຂອງ ສະຫາຍ ບຸນຖອງ ດີວິໄຊ ກຳມະການສູນກາງພັກ ເລຂາຄະນະບໍລິຫານງານພັກແຂວງ ເຈົ້າແຂວງໆຈຳປາສັກ, ມີ ສະຫາຍ ນິພອນ ວຽງປະເສີດ ຮອງເລຂາພັກແຂວງ, ຫົວໜ້າຄະນະຈັດຕັ້ງແຂວງ, ສະຫາຍ ໜູຈັນ ຈັນທະພົງ ຄະນະປະຈຳພັກແຂວງ ປະທານກວດກາພັກຫົວໜ້າພະແນກກວດກາລັດ ແຂວງ ຜູ້ຊີ້ນຳເມືອງຈຳປາສັກ,ມີບັນດາຄະນະບໍລິຫານງານພັກແຂວງ,ສະຫາຍເລຂາພັກເມືອງ, ເຈົ້າເມືອງ, ບັນດາສະຫາຍໃນຄະນະປະຈຳພັກເມືອງ, ຄະນະພັກເມືອງອອ້ມຂ້າງຈາກ 8 ເມືອງ, 1 ນະຄອນ, ພະນັກງານປະຕິວັດອາວຸໂສບໍານານ, ເລຂາຄະນະພັກຮາກຖານບ້ານກຸ່ມບ້ານທັງໝົດເຂົ້າຮ່ວມ 251 ສະຫາຍ ໃນນັ້ນຜູ້ແທນສົມບູນທີ່ຕາງໜ້າຈາກຮາກຖານພັກທົ່ວເມືອງ 157 ສະຫາຍ. ໃນກອງປະຊຸມໃຫຍ່ຄັ້ງນີ້ ສະຫາຍ ຄຳຕັນ ຊົມພັນດອນ ກຳມະການພັກແຂວງ ເລຂາພັກເມືອງເຈົ້າເມືອງໆຈຳປາສັກໄດ້ກ່າວໄຂກອງປະຊຸມຢ່າງເປັນທາງການໂດຍກ່າວວ່າ: ການດຳເນີນກອງປະຊຸມໃຫຍ່ ຄັ້ງທີ VIII ຂອງຜູ້ແທນອົງຄະນະພັກເມືອງຈຳປາສັກແມ່ນມີຄວາມໝາຍ,ຄວາມສຳຄັນຫຼາຍເພາະໄດ້ຈັດຕັ້ງປະຕິບັດຕາມກົດລະບຽບຂອງພັກກໍຄືຫຼັກການ ແລະ ທິດນຳໃນການກໍ່ສ້າງພັກໃຫ້ມີຄວາມເຕີບໃຫຍ່ເຂັ້ມແຂງພ້ອມທັງມີຄວາມປອດໄສ, ເຂັ້ມແຂງ, ໜັກແໜນ. ຜູ້ແທນກອງປະຊຸມໃຫຍ່ຈະໄດ້ພ້ອມກັນຄົ້ນຄວ້າຮັບຮອງເອົາເອກະສານສຳຄັນທີ່ເປັນຍຸດທະສາດຂອງຄະນະບໍລິຫານງານພັກເມືອງສະໄໝທີ VIII, ຄັດເລືອກເອົາຄະນະບໍລິຫານງານພັກເມືອງຊຸດໃໝ່ ເພື່ອເປັນແກ່ນນຳຂອງອົງຄະນະພັກທີ່ຈະນຳພາຜັນຂະຫຍາຍມະຕິຂອງພັກ ແລະ ປະຕິບັດແຜນພັດທະນາເສດຖະກິດ-ສັງຄົມຕະຫຼອດສະໄໝທີ VIII (ແຕ່ປີ 2020-2024) ໃຫ້ປະກົດຜົນເປັນຈິງຕາມທ່າແຮງທີ່ບົ່ມຊ້ອນຕາມຄຳໂຄງຂອງເມືອງເຊິ່ງເມືອງຈຳປາສັກເປັນເມືອງທີ່ມີທ່າແຮງທາງດ້ານການທ່ອງທ່ຽວດ້ານວັດທະນະທຳວັດຖຸບູຮານໂດຍສະເພາະແມ່ນວັດພູຈຳປາສັກເຊິ່ງແມ່ນມໍລະດົກໂລກຂອງລາວທີ່ສາມາດດຶງດູດນັກທ່ອງທ່ຽວເຂົ້າມາທ່ຽວໃນແຕ່ລະປີເປັນຈຳນວນບໍ່ໜ້ອຍ. ຈາກນີ້ ສະຫາຍ ຄຳຕັນ ຊົມພັນດອນ ເລຂາພັກເມືອງ ເຈົ້າເມືອງໆຈຳປາສັກ ຍັງໄດ້ຜ່ານບົດລາຍງານການເມືອງທັງສອງພາກຍົກໃຫ້ເຫັນຜົນງານອັນພົ້ນເດັ່ນໃນໄລຍະຜ່ານມາຂອງອົງຄະນະພັກເມືອງໃນໄລຍະ 5 ປີທີ່ຜ່ານມາ 2015-2019 ໂດຍຍົກໃຫ້ເຫັນທົ່ວເມືອງມີຄວາມເປັນລະບຽບ,ຮຽບຮອຍ,ມີສະຖຽນລະພາບທາງດ້ານການເມືອງທີ່ໜັກແໜ້ນຮັບປະກັນຄວາມສະຫງົບໂດຍພື້ນຖານ,ດ້ານເສດຖະກິດ-ສັງຄົມ ສືບຕໍ່ຂະຫຍາຍຕົວຢ່າງຕໍ່ເນື່ອງ ໂດຍສະເລ່ຍໃນລະດັບ 6,7 %ຕໍ່ປີ ລວມຍອດຜະລິດຕະພັນ 5 ປີ ປະຕິບັດໄດ້ 3 ພັນ 746 ຕື້ກີບ,ທຽບໃສ່ແຜນລື່ນ 5ກວ່າສ່ວນຮ້ອຍ, ສະເພາະປີ2019 ປະຕິບັດໄດ້ 900 ກ່ວາຕື້ກີບສະເລ່ຍລາຍຮັບຕໍ່ຄົນບັນລຸໄດ້ 13 ລ້ານ 7 ແສນຕໍ່ຄົນຕ່ປີຫຼືເທົ່າກັບ 1 ພັນ 600 ກ່ວາໂດລາສະຫາລັດ,ໂຄງປະກອບເສດຖະກິດກວມຫຼາຍກ່ວາໝູ່ແມ່ນ ຂະແໜງກະສິກຳ45,05%ຮອງລົງມາແມ່ນອຸດສະຫະກຳກວມ 35,17%, ບໍລິການກວມ19,78%, ການລະດົມທຶນເພື່ອພັດທະນາຂອງເມືອງ ເຂົ້າໃສ່ການພັດທະນາບັນລຸ 415 ຕື້ກວ່າກີບ, ທຽບໃສ່ແຜນການປະຕິບັດໄດ້ລື່ນ 2,57%, ໃນນັ້ນທຶນຂອງລັດ 43ຕື້ 600 ລ້ານກີບ,ເອກກະຊົນພາຍໃນແລະຕ່າງປະເທດ 148 ຕື້ 200 ລ້ານກີບ,ທຶນຊ່ວຍເຫຼືອເພື່ອການພັດທະນາ 93 ຕື້ກ່ວາຕື້ກີບ,ສິນເຊື່ອທະນາຄານ 130ຕື້ກ່ວາກີບ,ເຮັດໃຫ້ໂຄງປະກອບເສດຖະກິດຂອງເມືອງຫັນປ່ຽນໄປຕາມທິດທີ່ຕັ້ງໜ້າຕາມທ່າແຮງບົ່ມຊ້ອນຂອງທ້ອງຖິ່ນ. ນອກຈາກນັ້ນໃນກອງປະຊຸມຄັ້ງນີ້ຍັງໄດ້ຜ່ານບົດສະຫຼຸບແຜນພັດທະນະເສດຖະກິດ-ສັງຄົມ 5 ຜ່ານມາ ແລະ ທິດທາງແຜນການ ພັດທະນາເສດຖະກິດ-ສັງຄົມ 5 ປີຕໍ່ໜ້າ 2020-2024 ການປະກອບຄໍາຄິດຄໍາເຫັນຂອງພາກສ່ວນຕ່າງໆເຊັ່ນ: ການນຳພາວຽກງານປ້ອງກັນຊາດ-ປ້ອງກັນຄວາມສະຫງົບໃນຫົວຂໍ້: ເພີ່ມທະວີວຽກງານປ້ອງກັນຊາດ-ປ້ອງກັນຄວາມສະຫງົບຢູ່ຮາກຖານ, ການປະກອບຄຳເຫັນການສ້າງບ້ານໃຫ່ຍໃຫ້ຄ້າຍຄືຕົວເມືອງນ້ອຍໃນຊົນນະບົດ,ການປະກອບຄຳຄິດຄຳເຫັນຂອງຫ້ອງການສາທາລະນະສຸກເມືອງໃນຫົວຂໍ້ການປະຕິບັດຄາດໝາຍ 10ຕົວຊີ້ວັດ ຂອງຂະແໜງສາທາລະນະສຸກ,ການປະກອບຄຳເຫັນຂອງຄອບຄົວຕົວແບບໃນປູກເຂົ້າ ບ້ານກະຕຶບ ແລະ ຄອບຄົວຕົວແບບດ້ານອື່ນໆອີກ. ເພື່ອແນໄສ່ເຮັດໃຫ້ການດໍາເນີນກອງປະຊຸມໃຫຍ່ຜູ້ແທນອົງຄະນະພັກເມືອງຈຳປາສັກ ຄັ້ງທີ 8 ນີ້ ມີເນື້ອໃນອຸດົມສົມບູນ,ກ້ວາງຂວາງເລິກເຊິ່ງ. ກອງປະຊຸມໃຫ່ຍຜູ້ແທນອົງຄະນະພັກເມືອງຈຳປາສັກຈະໄດ້ດຳເນີນໄປເປັນເວລາ 2 ວັນຈິ່ງຈະສຳເລັດ.

ຂຽນ: ນ. ປະພິດ ສີສົມບູນ

Loading...