ວັນທີ 2 ພະຈິກ 2022, ທ່ານ ຜົດໄຊ ສີຈັນ ຮອງຫົວໜ້າຫ້ອງການກະສິກຳ ແລະ ປ່າໄມ້ ເມືອງຊານໄຊ ແຂວງອັດຕະປື ໄດ້ໃຫ້ຮູ້ວ່າ: ປີ 2022 ເມືອງຊານໄຊ ໄດ້ ວາງແຜນການຜະລິດເຂົ້າເພື່ອຮັບປະກັນດ້ານສະບຽງອາຫາ ໃນເນື້ອທີ່ທັງໝົດ 3.185 ເຮັກຕາ,ຜ່ານການຈັດຕັ້ງປະຕິບັດມີເນື້ອທີ່ເກັບກ່ຽວຕົວຈິງທັງໝົດ 2.992 ເຮັກ ຕາ,ໃນນີ້ເນື້ອທີ່ເຂົ້ານາປີ ມີ 1.516 ເຮັກ ຕາ,ເນື້ອທີ່ເຂົ້າໄຮ່ ມີ 1.476 ເຮັກຕາ,ເຊິ່ງການເກັບກ່ຽວທັງເຂົ້ານາປີ ແລະ ເຂົ້າໄຮ່ ແມ່ນໄດ້ເລີ່ມແຕ່ຕົ້ນເດືອນຕຸລາເປັນຕົ້ນມາ ຮອດປະຈຸບັນແມ່ນສໍາເລັດໄປແລ້ວ 60% ຂອງເນື້ອທີ່ທັງໝົດ ແລະ ຄາດວ່າການເກັບກ່ຽວຈະໃຫ້ສໍາເລັດໃນທ້າຍເດືອນພະຈິກນີ້,ຄາດຄະແນຜົນຜະລິດທັງນາປີ ແລະ ໄຮ່ ຈະໄດ້ປະມານ 7.700 ກວ່າໂຕນ,ສະເລ່ຍໃສ່ຫົວຄົນໄດ້ 280 ກິໂລຕໍ່ຄົນ ແລະ ທຽບໃສ່ພົນລະເມືອງພາຍໃນເມືອງແມ່ນສາມາດກຸ້ມກິນ 12 ເດືອນ .
ທ່ານ ຜົດໄຊ ສີຈັນ ຮອງຫົວໜ້າຫ້ອງການກະສິກຳ ແລະ ປ່າໄມ້ ເມືອງຊານໄຊ ໄດ້ໃຫ້ຮູ້ຕື່ມວ່າ: ເພື່ອຮັບປະກັນດ້ານສະບຽງອາຫານ ໃຫ້ພຽງພໍກັບຄວາມຕ້ອງການຂອງການບໍລິໂພກ ນັ້ນໃນລະດູຝົນຜ່ານມາທາງຫ້ອງການກະສິກໍາ ແລະ ປ່າໄມ້ເມືອງ ຍັງໄດ້ຊຸກຍູ້ປະຊາຊົນທໍາການຜະ ລິດ ປູກຝັງ-ລ້ຽງສັດ ,ໂດຍການແຕ່ງຕັ້ງພະນັກງານ ວິຊາການລົງຕິດຕາມ ເພື່ອໃຫ້ການແນະນໍາປະຊາຊົນ ໃນຂອດຂອງການປູກ-ການລ້ຽງ ໃຫ້ຖືກກັບຕິກຕິກ ເພື່ອຍົກສະມັດຕະພາບຜົນຜະລິດ,ເຊິ່ງເຫັນວ່າປະຈຸບັນຈໍານວນສັດລ້ຽງ ແລະ ເນື້ອທີ່ການປູກພຶດຕ່າງໆ ຢູ່ພາຍໃນເມືອງຊານໄຊ ແມ່ນມີທ່າອ່ຽງຈໍານວນເພີ່ມຂື້ນ.
ຂ່າວ: ວັດທະນາ
