ສະຫງວນລິຂະສິດ © ສະຖານີ ວິທະຍຸກະຈາຍສຽງແຫ່ງຊາດລາວ

ວິທະຍຸກະຈາຍສຽງແຫ່ງຊາດລາວ

Lao National Radio

ຊົມເຊີຍ ວັນສ້າງຕັ້ງວິທະຍຸກະຈາຍສຽງແຫ່ງຊາດລາວ ຄົບຮອບ 60 ປີ
(13 ສິງຫາ 1960-13 ສິງຫາ 2020) ຢ່າງສຸດໃຈ

ເມືອງຍອດອູສຳເລັດກອງປະຊຸມໃຫຍ່ ຜູ້ແທນອົງຄະນະພັກເມືອງ ຄັ້ງທີ່ IX

ພາຍຫຼັງທີ່ໄດ້ດຳເນີນກອງປະຊຸມໃຫຍ່ ຜູ້ແທນອົງຄະນະພັກເມືອງຍອດ​ອູ ຄັ້ງທີ່ IX ມາເປັນເວລາ 2 ວັນ ຈຶ່ງໄດ້ສຳເລັດລົງຢ່າງຈົບງາມ ໃນວັນທີ 28 ກຸມພາ 2020 ນີ້, ທີ່ສະໂມສອນໃຫ​ຍ່ຂອງເມືອງຍອດ​ອູ ໂດຍການເປັນປະທານຂອງສະຫາຍ  ສົມ​ຫັວງ ສຸມ​ວີ​ໄລ ກຳມະການພັກແຂວງ, ເລຂາຄະນະບໍລິຫານງານພັກເມືອງ, ເຈົ້າເມືອງໆ​ຍອດ​ອູ, ເປັນກຽດເຂົ້າຮ່ວມຂອງສະຫາຍ ຄຳຜອຍ ວັນນະສານ ຮັກສາການເລຂາພັກແຂວງ, ເຈົ້າແຂວງໆຜົ້ງສາລີ, ມີສະຫາຍ ທອງ​ສະ​ຫວັນ ທຳ​ມະ​ວົງ ກຳມະການປະຈຳພັກແຂວງ, ປະ​ທານ​ແນວ​ລາວ​ສ້າງ​ຊາດ​ແຂວງ, ທັງເປັນຜູ້ຊີ້ນຳວຽກງານຮອບດ້ານຂອງເມືອງ​ຍອດ​ອູ, ມີບັນດາທ່ານຈາກພາກສ່ວນທີ່ກ່ຽວຂ້ອງ, ແຂກເຊີນ ແລະ ຜູ້ແທນສົມບູນເຂົ້າຮ່ວມທັງໝົດ 145 ສະຫາຍ, ຍິງ 23 ສະຫາຍ, ທີ່ເປັນຕົວແທນໃຫ້ແກ່ສະມາຊິກພັກ, ທີ່ມາຈາກຄະນະພັກຮາກຖານ ແລະ ໝ່ວຍພັກທົ່ວເມືອງຍອດ​ອູທັງໝົດ 1.456 ສະຫາຍ, ຍິງ 436 ສະ​ຫາຍ.

ໃນກອງປະຊຸມໄດ້ສະຫຼູບຕີລາຄາຄືນການຈັດຕັ້ງປະຕິບັດ ມະຕິກອງປະຊຸມໃຫຍ່ ຄັ້ງທີ VIII ຂອງອົງຄະນະພັກເມືອງຍອດ​ອູ ຕະຫຼອດໄລຍະ 5 ປີຜ່ານມາເຫັນວ່າມີຜົນສໍາເລັດຫຼາຍດ້ານເປັນຕົ້ນທົ່ວເມືອງ ຍອດ​ອູ ແມ່ນມີສະຖຽນລະພາບທາງດ້ານການເມືອງອັນໜັກແໜ້ນ, ທົ່ວສັງຄົມມີຄວາມສະຫງົບ ແລະ ມີຄວາມເປັນລະບຽບຮຽບຮ້ອຍ, ເສດຖະກິດ – ສັງຄົມ ມີການຂະຫຍາຍຕົວດ້ວຍຈັງຫວະຕໍ່ເນື່ອງ ແລະ ມີທ່ວງທ່າໃໝ່ທີ່ດີ, ປະຊາຊົນບັນດາເຜົ່າມີຄວາມສາມັກຄີປອງດອງ, ພື້ນຖານໂຄງລ່າງຂອງເມືອງກໍ່ໄດ້ຮັບການປັບປຸງ, ຊີວິດການເປັນຢູ່ຂອງປະຊາຊົນກໍ່ໄດ້ຮັບການແກ້ໄຂດີຂຶ້ນເປັນກ້າວໆ, ອັດຕາສ່ວນຄວາມທຸກຍາກໄດ້ຫຼຸດໜ້ອຍຖອຍລົງເທື່ອລະກ້າວ. ​ໃນກອງປະຊຸມໄດ້ຮັບຟັງການປະກອບຄຳຄິດຄໍາເຫັນຈາກຜູ້ຕາງໜ້າຈາກຫຼາຍພາກສ່ວນ, ເຊິ່ງສ່ວນຫຼາຍໄດ້ລົງເລິກລາຍງານຜົນສໍາເລັດແຫ່ງການຜັນຂະຫຍາຍ ແລະ ຈັດຕັ້ງປະຕິບັດມະຕິກອງປະຊຸມໃຫຍ່ ຄັ້ງທີ VIII ເຂົ້າໃນແຕ່ລະຂົງເຂດວຽກງານກົມກອງ, ຂະແໜງ ການຂອງຕົນເອງ, ອັນໄດ້ເຮັດໃຫ້ກອງປະຊຸມມີເນື້ອໃນສົມບູນຄົບຖ້ວນ ພ້ອມນັ້ນກໍໄດ້ເຫັນພ້ອມ ແລະ ເປັນເອກະສັນກັນຮັບຮອງແຜນພັດທະນາເສດຖະກິດ – ສັງຄົມ 5 ປີ ຕໍ່ ໜ້າ ແຕ່ປີ 2020 – 2024. ເຊິ່ງຈະສູ້ຊົນໃຫ້ເສດຖະກິດເຕີບໂຕໃນລະດັບ 8,09 % ຕໍ່ປີ, ໃນນັ້ນຂົງເຂດກະສິກຳ – ປ່າໄມ້ ເພີ້ມ​ຂຶ້ນ 8,78 %, ອຸດສະຫະກຳ ແລະ ຫັດຖະກຳ ເພີ່ມຂຶ້ນ 8,31 % ແລະ ການບໍລິການເພີ້ມ​ຂຶ້ນ 10,26 % ເຮັດ​ໃຫ້​ໂຄງ​ປະ​ກອບ​ເສດ​ຖະ​ກີດ​ມີ​ການ​ປ່ຽນ​ແປງ​ເຊັ່ນ: ດ້ານກະສີກຳ – ປ່າໄມ້ ກວມ 80,39 %, ອຸດສະຫະກຳ ແລະ ຫັດຖະກຳ ກວມ 4,31 % ແລະ ການບໍລິການກວມ 15,30 %, ລວມຍອດມູນຄ່າລາຍຮັບຮອດປີ 2024 ໃຫ້ບັນລຸ 477,39 ຕື້ກີບ, ສະເລ່ຍໃສ່ຫົວຄົນໝຶ່ງໃຫ້ໄດ້ 12,85 ລ້ານກີບ ຫຼື ເທົ່າກັບ 1.477 ໂດລາຕໍ່ຄົນຕໍ່ປີ. ຮອດ​ປີ 2024 ສູ້​ຊົນ​ເຮັດ​ໃຫ້​ຄອບ​ຄົວ​ທຸກ​ຍາກ​ຫຼຸດ​ລົງ​ໃຫ້​ຍັງ​ເຫຼືອ 41,79%, ບ້ານ​ທຸກ​ຍາກ​ໃຫ້​ຍັງ​ເຫຼືອ 53,94 %, ສ້າງ​ບ້ານ​ພັດ​ທະ​ນາ​ໃຫ້​ໄດ້ 7 ບ້ານ, ສ້າງ​ບ້ານ​ໃຫ​ຍ່​ໃຫ້​ກາຍ​ເປັນ​ຕົວ​ເມືອງ​ນ້ອຍ​ໃນ​ຊົນ​ນະ​ບົດ​ໃຫ້​ໄດ້ 1 ບ້ານ ( ຕາມ​ການ​ປະ​ເມີນ​ດຳ​ລັດ 348/ລບ).

ໃນກອງປະຊຸມໄດ້ສຳຫຼວດຕີລາຄາການເຄື່ອນໄຫວ ຊີ້ນຳໆພາ ຂອງຄະນະບໍລິຫານງານພັກເມືອງ ຊຸດທີ VIII ເຊິ່ງໄດ້ເສີມຂະຫຍາຍມູນເຊຶື້ອຄວາມສາມັກຄີເປັນປຶກແຜ່ນແໜ້ນໜາ ມີຄວາມເດັດດ່ຽວໜຽວແໜ້ນ ມີຄວາມຕັດສິນໃຈສູງຜ່ານຜ່າຄວາມຫຍຸ້ງຍາກນາໆປະການນໍາພາປະຊາຊົນບັນດາເຜົ່າພາຍໃນເມືອງຍອດ​ອູ ເດີນຕາມແນວທາງນະໂຍ ບາຍ ຂອງພັກ ແລະ ບັນລຸຜົນສໍາເລັດຫຼາຍດ້ານ.

ພາບ – ຂ່າວ: ແສງຄຳ ສາລີວັນ