ໃນຕອນບ່າຍ ວັນທີ 6 ມິຖຸນາ 2024 ຜ່ານມານີ້ ຢູ່ທີ່ ສະໂມສອນເມືອງຕົ້ນເຜິ້ງ ແຂວງ ບໍ່ແກ້ວ ໄດ້ຈັດພິທີເຊັນບົດບັນທຶກຄວາມເຂົ້າໃຈ (MOU )ສຶກສາຄວາມເປັນໄປໄດ້ຂອງໂຄງການ ສໍາປະທານດິນລັດ ເພື່ອສ້າງເປັນເປັນເຂດການຄ້າ, ການທ່ອງທ່ຽວ ແລະ ສະຖານີຂົນສົ່ງໂດຍສານ ຢູ່ ບ້ານ ໃຫຍ່ຕົ້ນເຜິ້ງ ໂດຍການເຂົ້າຮ່ວມເປັນປະທານຂອງທ່ານ ເຄື່ອນເພັດ ວົງຈັນ ຮອງເຈົ້າແຂວງ, ຜູ້ຊີ້ນໍາຂົງເຂດເສດຖະກິດ ແຂວງບໍ່ແກ້ວ.
ຮ່ວມລົງນາມໃນພິທີໂດຍ ທ່ານ ສຸລິຍາ ຫຼ້າໂພທອງ ຮັກສາການຫົວໜ້າຫ້ອງການ ແຜນການ ແລະ ການລົງທຶນເມືອງ ກັບ ທ່ານ ອຸທິດ ນັນທະວົງ ປະທານບໍລິສັດ NTV ມາຍນິ້ງ ຈໍາກັດ, ທ່ານ ສຸພັດ ເພັດອາລຸນ ປະທານບໍລິສັດ ເພັດອາລຸນກຣຸບ ຈໍາກັດ.
ທ່ານ ບຸນໄຊ ບຸນທະນາ ຮອງຫົວໜ້າ ຫ້ອງການແຜນການ ແລະ ການລົງທຶນ ໄດ້ໃຫ້ຮູ້ວ່າ : ໂດຍປະຕິບັດຕາມກົດໝາຍວ່າດ້ວຍການສົ່ງເສີມການລົງທຶນ, ຂໍ້ຕົກລົງຂອງ ທ່ານເຈົ້າແຂວງ ເລກທີ 620/ຈຂ.ບກ, ຂໍ້ຕົກລົງຂອງທ່ານ ເຈົ້າເມືອງ ເລກທີ 139/ຈມ.ຕຜ ວ່າດ້ວຍການອະນຸມັດ ໃຫ້ອົງການປົກຄອງເມືອງ ຕົ້ນເຜິ້ງ ເຊັນບົດບັນທຶກຄວາມເຂົ້າໃຈ (MOU ) ສຶກສາຄວາມເປັນໄປໄດ້ ຂອງການດໍາເນີນກິດຈະການ ດ້ານບໍລິການ ແລະ ການທ່ອງທ່ຽວ ເຊິ່ງໄດ້ມີ 02 ບໍລິສັດ ໄດ້ສໍາປະທານດິນລັດ ພາຍໃນບ້ານໃຫຍ່ຕົ້ນເຜິ້ງ ໄດ້ແກ່ ບໍລິສັດ NTV ມາຍນິ້ງ ຈໍາກັດ ຕ້ອງການສໍາປະທານເນື້ອທີ່ທັງໝົດ 1.057 ເຮັກຕາ ເພື່ອກໍ່ສ້າງໂຮງແຮມລະດັບ 03 ດາວ, ຊຸບເປີ້ມາເກັດຂາຍເຄື່ອງຄົບວົງຈອນ ແລະ ໂຊລູມຂາຍລົດໃຫຍ່ ແລະ ບໍລິສັດ ເພັດອາລຸນ ກຣຸບ ຈໍາກັດ ຕ້ອງການສໍາປະທານ ເນື້ອທີ່ທັງໝົດ 1.057 ເຮັກຕາ ເພື່ອກໍ່ສ້າງສະຖານີຂົນສົ່ງໂດຍສານ ( ຄິວລົດ ), ຮ້ານຂາຍເຄື່ອງ ແລະ ຮ້ານອາຫານ ແລະ ບ້ານພັກ. ແຕ່ລະຝ່າຍ ມີຄວາມຮັບຮູ້ນໍາກັນ, ຕົກລົງເປັນເອກະພາບກັນສ້າງບົດບັນທຶກຂຶ້ນ ເພື່ອສໍາຫຼວດ, ອອກແບບ, ຂຽນບົດວິພາກເສດຖະກິດເຕັກນິກ,ບົດປະເມີນຜົນກະທົບຕໍ່ສິ່ງແວດລ້ອມ ແລະ ອື່ນໆໃຫ້ລະອຽດ, ຖືກຕ້ອງຕາມລະບຽບການ ພາຍຫຼັງສໍາເລັດແລ້ວ ໃຫ້ສະເໜີຫາ ເມືອງ-ແຂວງ ເພື່ອຂໍອອກຂໍ້ຕົກລົງ ອະນຸມັດເຊັນສັນຍາເຊົ່າສໍາປະທານ.
ຈາກນັ້ນ ໄດ້ເຊັນບົດບັນທຶກຄວາມເຂົ້າໃຈ (MOU ) ລະຫວ່າງ ຫ້ອງການແຜນການ ແລະ ການລົງທຶນເມືອງຕົ້ນເຜິ້ງ ກັບ ຜູ້ປະກອບການທັງ 02 ບໍລິສັດ ໄດ້ແກ່: ປະທານບໍລິສັດ NTV ມາຍນິ້ງ ຈໍາກັດ ແລະ ປະທານບໍລິສັດ ເພັດອາລຸນ ກຣຸບ ຈໍາກັດ ໂດຍສ່ອງໜ້າເປັນສັກຂີພິຍານ ຈາກຄະນໍາຂອງແຂວງ, ຂອງເມືອງ ແລະ ຜູ້ເຂົ້າຮ່ວມພິທີໃນຄັ້ງນີ້.
ພາບ-ຂ່າວ : ນ. ຈອມແສງ ແສນປະເສີດ.
