ວັນທີ 1 ມີຖຸນາ 2024 ເມືອງທຸລະຄົມ ແຂວງວຽງຈັນ ຈັດການແຂ່ງຂັນກິລາເຮືອຊ່ວງ 12 ສີພາຍ ຊີງຂັນທ່ານເຈົ້າແຂວງໆວຽງຈັນ ຢູ່ທີ່ຫາດບ້ານຕານປ່ຽວ ເມືອງທຸລະຄົມ, ໃຫ້ກຽດເຂົ້າຮ່ວມຂອງທ່ານ ຄຳພັນ ສິດທິດຳພາ ເຈົ້າແຂວງວຽງຈັນ, ທ່ານນາງ ວົງເດືອນ ວັດຕະໂສ ເຈົ້າເມືອງທຸລະຄົມ, ພ້ອມດ້ວຍຄະນະກິລາເຮືອຊ່ວງ ແລະ ມວນຊົນເຂົ້າຮ່ວມ.
ງານແຂ່ງຂັນຊ່ວງເຮືອ 12 ສີພາຍ ຄັ້ງນີ້ແມ່ນອົງການປົກຄອງແຂວງວຽງຈັນ, ເມືອງທຸລະຄົມ ແລະ ບໍລິສັດ ນໍ້າເພັດຈະເລີນຊັບ ຈຳກັດຜູ້ດຽວ ຮ່ວມກັນຈັດຂຶ້ນ ເພື່ອສ້າງຂະບວນການຂໍ່ານັບຮັບຕ້ອນ ວັນສໍາຄັນທາງປະຫວັດສາດຂອງຊາດຄື: ວັນປູກຕົ້ນໄມ້ແຫ່ງຊາດ, ວັນເດັກນ້ອຍສາກົນ, ວັນສິ່ງແວດລ້ອມໂລກ, ວັນສິ່ງແວດລ້ອມແຫ່ງຊາດ, ວັນອະນຸລັກສັດນໍ້າ-ສັດປ່າ, ກະຕຸ້ນປີທ່ອງທ່ຽວລາວ-ທ່ອງທ່ຽວ ແຂວງວຽງຈັນ ກໍ່ຄື ເມືອງທຸລະຄົມ ພ້ອມທັງເປັນການຂ່ຳນັບຊົມເຊີຍ ກອງປະຊຸມໃຫຍ່ສາມຂັ້ນຂອງພັກ ໃຫ້ເປັນປາງບຸນໃຫຍ່ ເຕັມໄປດ້ວຍບັນຍາກາດຟົດຟື້ນ.
ໃນງານຄັ້ງນີ້ ມີເຮືອຊ່ວງທີ່ມາຈາກພາຍໃນແຂວງ ແລະ ຕ່າງແຂວງເຂົ້າຮ່ວມ ຈໍານວນ 48 ຄະນະ.
ຜົນການແຂ່ງຂັນ:
– ອັນດັບທີ1 ໄດ້ແກ່ ເຮືອນາວາສັກສິດ ໄດ້ຮັບເງິນສົດ 30.000.000 ກີບ, ຂັນເງິນ 1 ໜ່ວຍ (ຂັນໝູນວຽນ) ພ້ອມຂັນກິລາ.
– ອັນດັບທີ2 ໄດ້ແກ່ເຮືອ ຮ້ານອາຫານຫອມແກ້ມແຄມງື່ມ ໄດ້ຮັບເງິນສົດ 20.000.000 ກີບ ພ້ອມຂັນກິລາ1ໜ່ວຍ.
– ອັນດັບທີ3 ໄດ້ແກ່ເຮືອ ນ້ອງມີໂຊກຂອງຂັວນ ໄດ້ຮັບເງິນສົດ 15.000.000 ກີບ ພ້ອມຂັນກິລາ 1 ໜ່ວຍ.
– ອັນດັບທີ 4 ໄດ້ແກ່ເຮືອ ພອນສະຫວັນ ໄດ້ຮັບລາງວັນເງິນສົດ 10.000.000 ກີບ ພ້ອມຂັນກິລາ.
ໃຫ້ກຽດມອບໂດຍທ່ານເຈົ້າແຂວງ, ເຈົ້າເມືອງ ແລະ ການນຳຄົນອື່ນໆຕາມລຳດັບ.
ພາຍໃນງານດັ່ງກ່າວ ໃນພາກເຊົ້າ ຍັງມີພິທີປ່ອຍປາລົງສູ່ທຳມະຊາດ (ນ້ຳງື່ມ) ເມືອງ ທຸລະຄົມ ແຂວງວຽງຈັນ ຈຳນວນ 18.000 ໂຕ ເພື່ອເປັນການອະນຸລັກປົກປັກຮັກສາສິ່ງແວດລ້ອມ, ຊີວະນາໆພັນໃຫ້ມີຄວາມຍືນຍົງຄົງຕົວທາງທຳມະຊາດ.
ຂ່າວ: ບຸນທະວີ ພົມມະສິດ
