ໃນວັນທີ 21 ກຸມພາ 2021 ນີ້, ເມືອງທົ່ງມີໄຊໄດ້ຈັດພິທີປ່ອນບັດເລືອກຕັ້ງເອົາ ສະມາຊິກສະພາແຫ່ງຊາດ ຊຸດທີ IX ປະຈໍາເຂດເລືອກຕັ້ງທີ 7 ແຂວງໄຊຍະບູລີ ແລະ ສະມາຊິກສະພາປະຊາຊົນແຂວງ ຊຸດທີ II ປະຈໍາເຂດເລືອກຕັ້ງເມືອງທົ່ງມີໄຊ ຢູ່ແຕ່ລະໜ່ວຍປ່ອນບັດຢ່າງເປັນທາງການ ໂດຍສະເພາະແມ່ນໜ່ວຍເລືອກຕັ້ງບ້ານໃຫຍ່ ແມ່ນຈຸດລວມຂອງເມືອງ ເຊິ່ງຈັດຂຶ້ນຢູ່ທີ່ຫໍປະຊຸມຂອງບ້ານດັ່ງກ່າວ ໂດຍການເຂົ້າຮ່ວມໃຊ້ສິດປ່ອນບັດຂອງທ່ານ ສົມພອນ ໄຊດວງຕາ ກຳມະການພັກແຂວງ ເລຂາຄະນະບໍລິຫານງານພັກເມືອງ ເຈົ້າເມືອງທົ່ງມີໄຊ ມີຄະນະຊີ້ນຳຂັ້ນແຂວງ, ຄະນະກຳມະການເລືອກຕັ້ງຂັ້ນເມືອງ ແລະ ຜູ້ມີສິດປ່ອນບັດພາຍໃນໜ່ວຍເລືອກຕັ້ງບ້ານໃຫຍ່ເຂົ້າຮ່ວມຢ່າງຫຼວງຫຼາຍເຂດເລືອກຕັ້ງເມືອງທົ່ງມີໄຊມີທັງໝົດ 13 ບ້ານ, ປະກອບມີ 165 ໜ່ວຍຄຸ້ມຄອງ, ມີ 2060 ຄອບຄົວ, ມີ 2.334 ຫລັງຄາເຮືອນ, ມີພົນລະເມືອງທັງໝົດ 9.672 ຄົນ, ຍິງ 4.862 ຄົນ, ມີໜ່ວຍເລືອກຕັ້ງທັງໝົດ 17 ໜ່ວຍ, ຜູ້ມີສິດເລືອກຕັ້ງທັງໝົດ 5.925 ຄົນ ຍິງ 2.946 ຄົນການເລືອກຕັ້ງເອົາສະມາຊິກສະພາແຫ່ງຊາດ ແລະ ສະມາຊິກສະພາປະຊາຊົນແຂວງຊຸດນີ້ເປັນເຫດການການເມືອງ ທີ່ມີຄວາມໝາຍຄວາມສຳຄັນທັງເປັນປາງບຸນໃຫຍ່ ສຳລັບປວງຊົນລາວທັງຊາດ, ສຳລັບພົນລະເມືອງລາວທີ່ມີອາຍຸແຕ່ 18 ປີຂຶ້ນໄປ ລ້ວນແຕ່ໄດ້ໃຊ້ສິດຂອງຕົນ ເພື່ອປ່ອນບັດເລືອກຕັ້ງເອົາຜູ້ສະໝັກຮັບເລືອກຕັ້ງທີ່ມີມາດຖານຄົບຖ້ວນ ເຂົ້າໃນສະພາແຫ່ງຊາດ ຊຸດທີ IX ແລະ ສະພາປະຊາຊົນແຂວງ ຊຸດທີ II, ເຊິ່ງເປັນອົງການຕົວແທນແຫ່ງສິດອຳນາດ ແລະ ຜົນປະໂຫຍດຂອງປະຊາຊົນບັນດາເຜົ່າ, ເນື້ອແທ້ຂອງການເລືອກຕັ້ງໃນຄັ້ງນີ້ ແມ່ນການປະຕິບັດແນວທາງປ່ຽນແປງໃໝ່ຢ່າງຮອບດ້ານທີ່ມີຫຼັກການຂອງພັກເຮົາ ປ່ຽນແປງໃໝ່ກ່ຽວກັບການປັບປຸງ, ບູລະນະກົງຈັກແຫ່ງອຳນາດລັດ, ແນໃສ່ເຮັດໃຫ້ອຳນາດລັດ ມີຄວາມໜັກແໜ້ນເຂັ້ມແຂງ, ນຳເອົາຄວາມຄິດ, ຄວາມເຫັນ, ຄວາມມຸ່ງມາດປາຖະໜາ ແລະ ຄຳສະເໜີ ຂອງປະຊາຊົນ ເພື່ອສະເໜີຕໍ່ສະພາແຫ່ງຊາດພິຈາລະນາແກ້ໄຂ ໃຫ້ກາຍເປັນລັດຂອງປະຊາຊົນ, ໂດຍປະຊາຊົນ ແລະ ເພື່ອຜົນປະໂຫຍດຂອງປະຊາຊົນຢ່າງແທ້ຈິງ, ຍັງເປັນບັ້ນດຳເນີນການສຶກສາອົບຮົມການເມືອງແນວຄິດຢ່າງກ້ວາງຂວາງສຳລັບທົ່ວພັກ, ທົ່ວກອງທັບ ແລະ ທົ່ວປວງຊົນລາວທັງຊາດ ເພື່ອຍົກລະດັບຄວາມຮັບຮູ້, ຄວາມຕື່ນຕົວທາງດ້ານການເມືອງ ແລະ ຄວາມເປັນເອກະພາບສູງຕໍ່ແນວທາງ, ແຜນນະໂຍບາຍຂອງພັກ, ລະບຽບການຂອງລັດ, ການປະຕິບັດສິດ ແລະ ພັນທະພື້ນຖານຂອງພົນລະເມືອງລາວ ໃນການໃຊ້ສິດສະໝັກຮັບເລືອກຕັ້ງ ແລະ ປ່ອນບັດເລືອກຕັ້ງ, ທັງຊຸກຍູ້ພາລະກິດປ່ຽນແປງໃໝ່ໃຫ້ສືບຕໍ່ຂະຫຍາຍຕົວກ້າວຂຶ້ນ, ປະກອບສ່ວນອັນສຳຄັນໃນການພັດທະນາປະເທດຊາດໃຫ້ມີຄວາມເຂັ້ມແຂງ, ປະຊາຊົນຮັ່ງມີຜາສຸກ, ສັງຄົມມີຄວາມສີວິໄລ ແລະ ຍຸຕິທຳ.

 

ຂ່າວ ມິກລະຄອນ ຄຳມຸນທາ

Loading...