ການສົ່ງເສີມການປູກພືດເປັນສິນຄ້າ ຢູ່ເມືອງນາໝໍ້ ແຂວງອຸດົມໄຊ ມີເນື້ອທີ່ທັງໝົດ 6.397.33 ເຮັກຕາ ຜົນຜະລິດ 101.547 ໂຕນ ເທົ່າກັບ 90% ຂອງແຜນປີ ໃນນີ້, ມີສາລີແຂງ, ຢາສູບ, ໝາກງາ, ເດືອຍ, ກ້ວຍຫອມ, ພືດຕະກຸນຖົ່ວ, ພືດຜັກລວມ ແລະ ໄມ້ໃຫ້ໝາກ, ຊຶ່ງພົ້ນເດັ່ນໃນການປູກທີ່ສ້າງລາຍຮັບແກ່ປະຊາຊົນ ແມ່ນຂະບວນການປູກອ້ອຍໃນຈຳນວນ 20 ບ້ານ, ມີເນື້ອທີ່ 1.420 ເຮັກຕາ, ຜົນຜະລິດ 71.000 ກວ່າໂຕນ, ສາມາດສ້າງລາຍຮັບໄດ້ 17.750 ລ້ານກີບ, ປູກສາລີ 3.983 ເຮັກຕາ, ຜົນຜະລິດ 15.973 ໂຕນ ແລະ ປູກຢາງພາລາ 4.664 ເຮັກຕາ, ຜົນຜະລິດ 13.499 ໂຕນ.
ທ່ານ ທອງດຳ ໄຊຍະວົງ ຮອງຫົວໜ້າຫ້ອງການກະສິກຳ ແລະ ປ່າໄມ້ເມືອງນາໝໍ້ ໄດ້ໃຫ້ສຳພາດຕໍ່ນັກຂ່າວ ສະຖານີວິທະຍຸ-ໂທລະພາບແຂວງ ເມື່ອບໍ່ດົນມານີ້ວ່າ: ຂະແໜງກະສິກຳ ແລະ ປ່າໄມ້ ໄດ້ກາຍເປັນຂະແໜງການທີ່ຍູ້ແຮງການພັດທະນາ ຢູ່ເຂດຊົນນະບົດ ຫ່າງໄກສອກຫລີກ ເນື່ອງຈາກວ່າ ປະຊາຊົນລາວ ເຄີຍອາໄສການຜະລິດກະສິກຳ ເພື່ອລ້ຽງຊີບຕົນເອງມາແຕ່ດົນນານແລ້ວ, ໃນໄລຍະຜ່ານມາ ພັກ ແລະ ລັດຖະບານ ໄດ້ສຸມກໍາລັງແຮງ ແລະ ທຶນຮອນ ເພື່ອພັດທະນາຂະແໜງກະສິກໍາ-ປ່າໄມ້, ສົ່ງເສີມປະຊາຊົນ ສຸມໃສ່ການປູກ-ການລ້ຽງ ໃຫ້ກາຍເປັນສິນຄ້າ ເພື່ອແກ້ໄຂຄວາມທຸກຍາກເທື່ອລະກ້າວ. ສຳລັບເມືອງນາໝໍ້ ການຈັດຕັ້ງປະຕິບັດວຽກງານກະສິກຳປ່າໄມ້ ໄລຍະຜ່ານມາ ໂດຍສະເພາະ ການຜະລິດເຂົ້າ ທົ່ວເມືອງມີເນື້ອທີ່ທັງໝົດ 5,086 ເຮັກຕາ, ຜົນຜະລິດ 19.731 ໂຕນ, ໃນນີ້ມີເນື້ອທີ່ການປູກເຂົ້ານາປີ 3.185 ເຮັກຕາ ຜົນຜະລິດ 15.925 ໂຕນ, ເຂົ້າໄຮ່ 1.895 ເຮັກຕາ, ການຜະລິດພືດສະບຽງອາຫານ ມີເນື້ອທີ່ 1.095 ກວ່າເຮັກຕາ, ຜົນຜະລິດໄດ້ 5.700 ກວ່າໂຕນ, ເທົ່າກັບ 102.81% ຂອງແຜນປີ.
ສຳລັບການຈັດຕັ້ງປະຕິບັດໃນລະດູຝົນ ໃນປີ 2024 ນີ້ແມ່ນສຸມໃສ່ການປູກເຂົ້າ ມີເນື້ອທີ່ 6,322.48 ເຮັກຕາ ໃນນີ້, ເຂົ້ານາ 3.245 ເຮັກຕາ, ເຂົ້າໄຮ່ 3.077.48 ເຮັກຕາ ແລະ ການປູກພືດຈຳນວນໜຶ່ງເປັນຕົ້ນ ສາລີແຂງ, ໝາກເດືອຍ, ໝາກງາ ແລະ ອື່ນໆ. ສຳລັບການກະກຽມສົ່ງເສີມການປູກພືດລະດູແລ້ງເປັນສິນຄ້າ ໃນປີນີ້ ໄດ້ສົ່ງເສີມປະຊາຊົນ 6 ບ້ານ 590 ຄອບຄົວ ປູກຢາສູບໃນເນື້ອທີ່ 170.92 ເຮັກຕາ, ສົ່ງເສີມການປູກຖົ່ວເບີ 18 ບ້ານ 419 ຄອບຄົວ ໃນເນື້ອທີ່ 50.3 ເຮັກຕາ, ໝາກອຶ 11 ບ້ານ ມີ 351 ຄອບຄົວ ໃນເນື້ອທີ່ 151.92 ເຮັກຕາ, ແຕງໂມ 5 ບ້ານມີ 231 ຄອບຄົວ ໃນເນື້ອທີ່ 51.2 ເຮັກຕາ. ໂດຍທາງເມືອງໄດ້ເຮັດບົດບັນທຶກ-ສັນຍາກັບບໍລິສັດ ທີ່ມີເຈດຈຳນົງມາລົງທຶນສົ່ງເສີມປະຊາຊົນ ປູກແລ້ວໃຫ້ບໍລິສັດຖອກພັນທະໃຫ້ເມືອງ ແລະ ຫົວໜ່ວຍທຸລະກິດມາເຊົ່າດິນນຳປະຊາຊົນປູກເອງ. ສຳລັບການສົ່ງເສີມການປູກຢາສູບ ມີບໍລິສັດຫົງຖາ ແລະ ບໍລິສັດອາແດງລາວ ເປັນຜູ້ເກັບຊື້.
ຂ່າວ: ຄຳພູສະຫວັນ ເພັນສະຫວັດ
