ວັນທີ 6 ຕຸລາ 2022 ນີ້ ຢູ່ສະໂມສອນໃຫຍ່ ຂອງເມືອງນ້ຳບາກ ແຂວງຫຼວງພະບາງ ໄດ້ຈັດພິທີປາຖະກະຖາ ມູນເຊືອ ວັນຄູແຫ່ງຊາດ ວັນທີ່ 7 ຕຸລາ ຄົບຮອບ 28 ປີ ຂື້ນ ມີ ທ່ານ ບຸນທັນ ຈັນທະສັກ ຮອງເຈົ້າເມືອງນໍ້າບາກ, ພ້ອມດ້ວຍຜູ້ບໍລິຫານການສຶກສາພາກລັດ-ເອກະຊົນ, ພະນັກງານຄູ ແລະນັກຮຽນ ເຂົ້າຮ່ວມ.
ພິທີ ທ່ານ ບຸນທັນ ຈັນທະສັກ ໄດ້ກ່າວປາຖະກະຖາວ່າ: ຄຳວ່າ ຄູ ແມ່ນຄໍາເວົ້າທີ່ສືບທອດກັນຫຼາຍເຊັ່ນຄົນມາແລ້ວ ຄູໝາຍເຖິງຄົນທີ່ມີຄວາມຮູ້ ແລະປະສົບການ ສາມາດໄປຖ່າຍທອດຄວາມຮູ້-ປະສົບການໄປສູ່ຜູ້ອື່ນ, ຮູບການຖ່າຍທອດຄວາມຮູ້ຈາກຜູ້ຮູ້ໄປສູ່ຜູ້ບໍ່ຮູ້ ເອີ້ນວ່າ: ການສອນ ແລະການຮຽນ. ການພັດທະນາເສດຖະກິດ-ສັງຄົມຂອງຊາດໜຶ່ງ ທີ່ມີຄວາມຈະເລີນຮຸ່ງເຮືອງ ນັ້ນມັນຂຶ້ນກັບຫຼາຍປັດໄຈ, ແຕ່ປັດໄຈທີ່ມີລັກສະນະຕັດສິນກວ່າໝູ່ແມ່ນ ປັດໄຈກ່ຽວກັບຄົນ ເຊິ່ງຄົນນັ້ນປະກອບດ້ວຍຄວາມຮູ້ຄວາມສາມາດ, ແນວຄິດຄຸນສົມບັດ ແລະສຸຂະພາບແຂງແຮງດີ. ແຕ່ແນວຄິດ ຄຸນສົມບັດ ຄວາມຮູ້ຄວາມສາມາດນັ້ນ ມັນບໍ່ແມ່ນຈະເກີດຂຶ້ນໄດ້ເອງຈາກຄົນຜູ່ໃດຜູ່ໜຶ່ງ ຫຼື ເກີດມາແຕ່ກຳເນີດ ແຕ່ຫາກເກີດຂຶ້ນບົນເສັ້ນທາງແຫ່ງການສິດສອນ, ການສຶກສາຮຽນຮູ້ ໂດຍແມ່ນ ຄູ ເປັນປັດໄຈຕັດສິນກວ່າໝູ່ ໃນການສຶກສາກໍ່ຄືການພັດທະນາຄົນ ໃຫ້ມີຄວາມຮູ້ ຄວາມສາມາ, ມີແນວຄິດ ຄຸນສົມບັດທີ່ດີ, ມີລະບຽບວິໃນ ແລະມີສຸຂະພາບແຂງແຮງ ສຳລັບປະເທດລາວ ລັດຖະບານ ໄດ້ໃຫ້ຄວາມສຳຄັນແກ່ ຄູ ຢູ່ສະເໝີ ເພາະ ຄູ ເປັນຜູ້ພັດທະນາຊັບພະຍາກອນມະນຸດ ເພື່ອປະກອບສ່ວນເຂົ້າໃນການພັດທະນາ ເສດຖະກິດ-ສັງຄົມຂອງຊາດ ກໍ່ຄືການພັດທະນາການທ້ອງຖີ່ນຮາກຖານ ໃຫ້ມີທ່າກ້າວຂຶ້ນ, ໃນພິທີ ຜູ້ເຂົ້າຮ່ວມໄດ້ຮັບຊົມການສະແດງຮ້ອງເພງ, ຂັບລຳ ແລະບົດຟ້ອມຈາກນັກຮຽນບາງໂຮງຮຽນຢູ່ພາຍໃນເມືອງ ດ້ວຍຄວາມເບີກບານມວ່ນຊື່ນ.
ຂ່າວ-ພາບ: ພອນສັກ ສິງດາລັກ (ນັກຂ່າວເມືອງນ້ຳບາກ)
