ວິທະຍຸກະຈາຍສຽງແຫ່ງຊາດລາວ

Lao National Radio

ຕັ້ງໜ້າຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XI ຂອງພັກ ເຂົ້າສູ່ຊີວິດຈິງ
ໃນຕອນເຊົ້າຂອງວັນທີ 6 ມິຖຸນາ 2024 ທີ່ຜ່ານມາ ຢູ່ທີ່ ບ້ານແກ້ງຕາປາ ແລະ ບ້ານ ໜອງໜ້ຽວ ເມືອງບົວລະພາ ແຂວງຄໍາມ່ວນ ໄດ້ຈັດພິທີ ປູກຕົ້ນໄມ້ ແລະ ພິທີປ່ອຍປາຄືນສູ່ທຳມະຊາດ ຂຶ້ນ ໂດຍການເປັນປະທານ ຂອງທ່ານ ຂອງທ່ານ ຄຳໄຜ່ ໄຊລາວັນ ຫົວໜ້າຫ້ອງການກະສິກຳ ແລະ ປ່າໄມ້ເມືອງ, ເຂົ້າຮ່ວມໃນພິທີດັ່ງກ່າວ ທ່ານ ພູສຽງ ສີສູນທອນ ຮອງເຈົ້າເມືອງບົວລະພາ, ມີບັນດາບໍລິສັດຊີວີຄາບອນ ອາໂຄຣຟໍແຣັສທຣີ ຈຳກັດຜູ້ດຽວ, ມີຫົວໜ້າ, ຮອງຫົວໜ້າຫ້ອງການ, ພະນັກງານ ວິຊາການທຸກຂະແໜງການອ້ອມຂ້າງເມືອງແລະ ແຂກຖືກເຊີນ, ເຂົ້າຮ່ວມ.
ທ່ານ ຄຳໄຜ່ ໄຊລາວັນ ຫົວໜ້າຫ້ອງການກະສິກຳ ແລະ ປ່າໄມ້ເມືອງບົວລະພາ ກໍ່ໄດ້ຜ່ານປະຫວັດຄວາມເປັນມາ ຂອງວັນປູກຕົ້ນໄມ້ແຫ່ງຊາດ ວັນທີ 1 ມິຖຸນາ ຂອງທຸກໆປີເປັນວັນປູກຕົ້ນໄມ້ແຫ່ງຊາດ ກໍ່ເນື່ອງຈາກວ່າເດືອນມີຖຸນາ ແມ່ນເດືອນທີ່ກ້າວເຂົ້າສູ່ລະດູຝົນ ເຊິ່ງເປັນລະດູທີ່ພື້ນດິນມີຄວາມຊຸມຊື່ນ ແລະ ເຮັດໃຫ້ຕົ້ນໄມ້ເຕີບໃຫຍ່ຂະຫຍາຍຕົວໄດ້ໄວ ພ້ອມກັນນັ້ນ ກໍ່ເພື່ອເປັນການຟື້ນຟູປ່າໃຫ້ມີເນື້ອທີ່ປົກຫຸ່ມຕະຫຼອດປີ ແລະ ອີກຢ່າງໜຶ່ງກໍ່ເພື່ອເປັນການສ້າງຈິດສຳນຶກ ໃຫ້ກັບພໍ່ແມ່ປະຊາຊົນ ໃຫ້ມີຄວາມເປັນເຈົ້າການ ໃນການອະນຸລັກຮັກສາປ່າໄມ້ ພ້ອມດຽວກັນນັ້ນກໍ່ເພື່ອເຮັດໃຫ້ຂະບວນການປູກຕົ້ນໄມ້ໄດ້ເຄື່ອນໄຫວຢ່າງຕໍ່ເນື່ອງໃນປີ 2024 ແລະ ຕະຫຼອດໄປ ເຊິ່ງເບ້ຍໄມ້ ທີ່ໄດ້ນຳມາປູກມີທັງໝົດ 800 ເບ້ຍ. ໃນນັ້ນໄດ້ຮັບຈາກບໍລິສັດ ຊີວວີຄາບອນ ອາໂຄຣຟໍແຣັສທຣີ ເປັນຜູ້ມອບ ແລະ ປູກໃນພື້ນທີ່ຂອງບໍລິສັດດັ່ງກ່າວ. ຈາກນັ້ນກໍ່ໄດ້ຜ່ານປະຫວັດຄວາມເປັນມາ ແລະ ຄວາມສໍາຄັນຂອງວັນປ່ອຍປາແຫ່ງຊາດ ແລະ ເພື່ອເປັນການປົກປັກຮັກສາສັດນໍ້າ-ສັດປ່າໃຫ້ມີຄວາມຍືນຍົງ ເພື່ອປູກຈິດສຳນຶກໃຫ້ກັບພໍ່ແມ່ປະຊາຊົນໄດ້ເຂົ້າໃຈ ໃນການອານຸລັກປົກປັກຮັກສາສັດນໍ້າ-ສັດປ່າ ໃນລະດູການຂະຫຍາຍພັນ ເພື່ອໃຫ້ສັດນ້ຳ – ສັດປ່າ ມີຄວາມອຸດົມສົມບູນຂຶ້ນເລື້ອຍໆ ພ້ອມກັນນັ້ນຍັງໄດ້ຮຽກຮ້ອງໃຫ້ ທຸກພາກສ່ວນຊ່ວຍກັນປົກປັກຮັກສາສັດນໍ້າ-ສັດປ່າ ຫຼີກລ້ຽງວິທີຫາປາແບບຜິດກົດໝາຍເຊັ່ນ: ການຊ໋ອດປາ, ໃຊ້ລະເບີດ ແລະ ໃຊ້ທາດເບືອປາ ແບບຜິດກົດໝາຍ ທັງນີ້ ກໍ່ເພື່ອເຮັດໃຫ້ສັດນໍ້າ-ສັດປ່າ ພາຍໃນເມືອງບົວລະພາ ໄດ້ຄົງຢູ່ຄຽງຄູ່ກັບລູກຫຼານຂອງພວກເຮົາຕະຫຼອດໄປ ເຊິ່ງປາທີ່ນຳມາປ່ອຍໃນຄັ້ງນີ້ມີຈຳນວນທັງໝົດ 10,000ໂຕ.
ແຂວງຄໍາມ່ວນ