ຕອນເຊົ້າວັນທີ 30 ພຶດສະພາ 2024 ເມືອງປາກງື່ມ ນະຄອນຫລວງວຽງຈັນ ໄດ້ຈັດພິທີປູກຕົ້ນໄມ້ ຕາມສອງຟາກທາງ ເຂດບ້ານສ້າງໃສ, ບ້ານໜອງບົວທອງ-ບ້ານໝາກຮຽວ ເພື່ອສ້າງຄວາມສວຍງາມ, ຄວາມຮົ່ມເຢັນ ແລະ ຮັກສາສິ່ງແວດລ້ອມ ລຽບຕາມສອງຟາກທາງ ຈຳນວນ 250 ກວ່າຕົ້ນ ໂດຍມີ ທ່ານ ຄຳໝູນ ຕຽງທະລາດ ເຈົ້າເມືອງປາກງື່ມ, ທ່ານ ທົດສະກັນ ໄກສອນເພັດ ຫົວໜ້າຫ້ອງກະສິກຳ ແລະ ປ່າໄມ້ເມືອງປາກງື່ມ ພ້ອມດ້ວຍພາກສ່ວນກ່ຽວຂ້ອງ ພໍ່ແມ່ປະຊາຊົນພາຍໃນສາມບ້ານ ແລະ ນ້ອງນັກຮຽນເຂົ້າຮ່ວມ.
ທ່ານ ທົດສະກັນ ໄກສອນເພັດ ຫົວໜ້າຫ້ອງກະສິກຳ ແລະ ປ່າໄມ້ເມືອງປາກງື່ມ ໄດ້ໃຫ້ຮູ້ວ່າ: ເພື່ອປະຕິບັດຕາມແຜນພັດທະນາ ໃນການສົ່ງເສີມວຽກງານການປູກປ່າ, ກ້າເບ້ຍ, ສ້າງພື້ນທີ່ສີຂຽວ ເຮັດໃຫ້ສອດຄ່ອງຕາມມະຕິ ວ່າດ້ວຍການພັດທະນາ ນະຄອນຫລວງວຽງຈັນ ໃນໄລຍະໃໝ່ ຕາມທິດພັດທະນາສ້າງ ນະຄອນຫລວງວຽງຈັນ ໃຫ້ເປັນນະຄອນຫລວງ ທີ່ໜ້າຢູ່ ໃຫ້ບັນລຸຕົວຊີ້ວັດ 6 ສ ຄື: ສ ສະຫງົບ, ສ ສະອາດ, ສ ສີຂຽວ, ສ ສະຫວ່າງ, ສ ສະເໜ່ ແລະ ສ ສີວິໄລ.
ໃນຊຸມປີຜ່ານມາ, ເມືອງປາກງື່ມ ໄດ້ຈັດຂະບວນປູກຕົ້ນໄມ້ໃນແຕ່ລະປີ ໂດຍໄດ້ລະດົມພໍ່ແມ່ປະຊາຊົນປູກໄມ້ຕາມເນື້ອທີ່ດິນຂອງຕົນ ເຊິ່ງເນື້ອທີ່ປ່າໄມ້ທົ່ວເມືອງປາກງື່ມ ໃນເມື່ອກ່ອນແມ່ນ 64.609 ເຮັກຕາ, ປັດຈຸບັນຍັງເຫລືອ 28.568 ເຮັກຕາ ຫລື ກວມ 45% ແລະ ໃນຊຸມປີມໍ່ໆມານີ້, ອັດຕາຄວາມປົກຫຸ້ມຂອງປ່າເພີ່ມຂຶ້ນ 10%, ຄາດວ່າຮອດປີ 2025 ຈະສູ້ຊົນໃຫ້ເພີ່ມຂຶ້ນອີກ 15% ລວມເປັນ 70% ຂອງເນື້ອທີ່ທັງໝົດ.
ສຳລັບປີ 2024 ນີ້, ຕົວເລກສູ້ຊົນເມືອງປາກງຶ່ມຈະປູກໄມ້ໃຫ້ໄດ້ 30 ເຮັກຕາ, ຟື້ນຟູປ່າໄມ້ໃຫ້ໄດ້ 100 ເຮັກ, ເກັບແກ່ນໄມ້ໃດ້ 40 ກິໂລ, ຜະລິດເບ້ຍໄມ້ໄດ້ທັງໝົດ 5.500 ເບ້ຍ, ໄມ້ປະດັບ 3.000 ເບ້ຍ ແລະ ໄມ້ອຸດສະຫະກຳ 2.500 ເບ້ຍ ລວມທັງພາກລັດ ແລະ ເອກະຊົນ.
ໃນໂອກາດນີ້, ທ່ານ ຄຳໝູນ ຕຽງທະລາດ ເຈົ້າເມືອງປາກງື່ມ ໄດ້ໃຫ້ຮູ້ວ່າ: ຕົ້ນໄມ້ທີ່ນຳມາປູກໃນຄັ້ງນີ້, ປະກອບມີ ຕົ້ນຄູນ, ໄມ້ມັນປາ, ເປືອຍນໍ້າ, ກາກະເລົາ ລວມທັງໝົດ 250 ກວ່າຕົ້ນ ທັງນີ້, ກໍເພື່ອປູກຊົມໃຊ້, ປູກເປັນຮົ່ມ, ປູກເພື່ອຄວາມສວຍງາມຕາມເສັ້ນທາງ, ເດີ່ນຫຍ້າ, ບ້ານ, ເຮືອນ, ໂຮງໝໍ, ໂຮງຮຽນ, ສວນສາທາລະນະ, ສະຖານທີ່ບໍລິການຕ່າງໆ, ເພື່ອປົກປັກຮັກສາສະພາບແວດລ້ອມ ແລະ ເປັນມໍລະດົກຕົກທອດໃຫ້ແກ່ລູກຫລານ. ພ້ອມນີ້, ທ່ານຍັງໄດ້ຝາກເຖິງພໍ່ແມ່ປະຊາຊົນພາຍໃນບ້ານ ຈົ່ງຊ່ວຍກັນບົວລະບັດຮັກສາ, ເບິ່ງແຍງຕົ້ນໄມ້ດັ່ງກ່າວ ໃຫ້ເຕີບໃຫຍ່, ຖ້າຕົ້ນໄມ້ຂອບເຂດໃດ ປູກແລ້ວຕາຍ ໃຫ້ສະເໜີໃຫ້ບ້ານນັ້ນໆ ນໍາມາປູກທົດແທນຄືນໃໝ່.
