ວິທະຍຸກະຈາຍສຽງແຫ່ງຊາດລາວ

Lao National Radio

ຕັ້ງໜ້າຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XI ຂອງພັກ ເຂົ້າສູ່ຊີວິດຈິງ
ປັດຈຸບັນ, ເມືອງປາກງື່ມ, ນະຄອນຫລວງວຽງຈັນ ເອົາໃຈໃສ່ເຝົ້າລະວັງ ແລະ ສະກັດກັ້ນໄຟໄໝ້ລາມປ່າ ຢ່າງເຂັ້ມງວດ ໂດຍສຸມໃສ່ 5 ບ້ານທີ່ຢູ່ລຽບຕາມປ່າສະຫງວນແຫ່ງຊາດພູເຂົາຄວາຍເນື່ອງຈາກເຄີຍເກີດໄຟໄໝ້ລາມປ່າຢູ່ເຂດນີ້ມາກ່ອນ.
ທ່ານ ຄໍາໜູນ ຕຽງທະລາດ ເຈົ້າເມືອງໆປາກງື່ມ ໃຫ້ສໍາຜ່ານຕໍ່ນັກຂ່າວວິທະຍຸກະຈາຍສຽງແຫ່ງຊາດລາວ ວ່າ: ປັດຈຸບັນ ເຖີງວ່າສະພາບອາກາດຮ້ອນອົບເອົ້າ ແຕ່ບໍ່ທັນມີສະພາບໄຟໄໝ້ລາມປ່າເກີດຂຶ້ນຢູ່ເມືອງປາກງື່ມ ຍ້ອນປີນີ້ມີຝົນຕົກແຕ່ຕົ້ນປີ, ບວກກັບຄະນະຮັບຜິດຊອບ ຕ້ານ ແລະ ສະກັດກັ້ນໄຟໄໝ້ລາມປ່າ ໄດ້ເອົາໃຈໃສ່ລົງໂຄສະນາໃຫ້ປະຊາ ຊົນຮັບຮູ້ ແລະ ເຂົ້າໃຈ ຜົນເສຍຫາຍຈາກໄຟໄໝ້ລາມປ່າ ຈາກການຖາງປ່າຈຸດໄຮ່, ຈຸດປ່າເພື່ອລ່າສັດ ແລະ ຈຸດຄັງຂະ ຫຍາຍພື້ນທີ່ ແລະ ອື່ນໆ. ພ້ອມນັ້ນ ຍັງໄດ້ກະກຽມຄວາມພ້ອມ ຮັບມືກັບໄຟໄໝ້ລາມປ່າ ດ້ວຍການຫັນເອົາພະນັກງານໄປປະຈຳແຕ່ລະຈຸດ ໂດຍເລັ່ງໃສ່ ມີ 5 ບ້ານທີ່ມີຄວາມສ່ຽງ ຄື: ທ່າກົກໄຮ, ບ້ານໂນນ, ຊຽງແລທ່າ, ຊຽງແລນາ ແລະ ບ້ານເວີນກະເບົາທີ່ຢູ່ລຽບຕາມປ່າສະຫງວນແຫ່ງຊາດ ພູເຂົາຄວາຍ ກໍ່ຄື ສວນອຸທິຍານແຫ່ງຊາດ.
ທ່ານໃຫ້ຮູ້ຕື່ມວ່າ: ຄຽງຄູ່ກັບການເອົາໃຈໃສ່ປ້ອງກັນໄຟໄໝ້ລາມປ່າ, ອົງການປົກຄອງເມືອງ ໄດ້ໂຄສະນາແນະນໍາໃຫ້ປະຊາຊົນເອົາໃຈໃສ່ປ້ອງກັນອັກຄີໄພຈາກໄຟຟ້າ ແລະ ຝືນດັງຕ່າງໆ ເພື່ອຮັບປະກັນບໍ່ໃຫ້ມີອັກຄີໄພເກີດຂຶ້ນ ເຊິ່ງຈະສົ່ງຜົນກະທົບຕໍ່ຊັບສິນ ແລະ ຊີວິດຂອງປະຊາຊົນ.
Cr: ຂ່າວອອນລາຍ, ວສລ