ສະຫງວນລິຂະສິດ © ສະຖານີ ວິທະຍຸກະຈາຍສຽງແຫ່ງຊາດລາວ

ວິທະຍຸກະຈາຍສຽງແຫ່ງຊາດລາວ

Lao National Radio

ຊົມເຊີຍ ວັນສ້າງຕັ້ງວິທະຍຸກະຈາຍສຽງແຫ່ງຊາດລາວ ຄົບຮອບ 60 ປີ
(13 ສິງຫາ 1960-13 ສິງຫາ 2020) ຢ່າງສຸດໃຈ

ເມືອງປາກຊ່ອງ ຈັດພິທີປູກຕົ້ນໄມ້ສະເຫຼີມສະຫຼອງ ວັນປູກຕົ້ນໄມ້ແຫ່ງຊາດ ວັນທີ 1 ມິຖຸນາ.

ເມືອງປາກຊ່ອງ ຮ່ວມກັບພະແນກກະສິກໍາ ແລະ ປ່າໄມ້ແຂວງຈໍາປາສັກ ຈັດພິທີປູກຕົ້ນໄມ້ສະເຫຼີມສະຫຼອງວັນປູກຕົ້ນໄມ້ແຫ່ງຊາດ ວັນທີ 1 ມິຖຸນາ ໃນຕອນເຊົ້າວັນທີ 15 ມິຖຸນາ 2020 ຢູ່ທີ່ຈຸດທັບອາລັກ (ເຂດສໍາປະທານໂຄງການເຂື່ອນໄຟຟ້າເຊປຽນ-ເຊນໍ້ານ້ອຍ) ທີ່ຂຶ້ນກັບກຸ່ມ 9 ເມືອງປາກຊ່ອງ ແຂວງຈໍາປາສັກ ໂດຍເຂົ້າຮ່ວມມີ ທ່ານ ພິມພອນ ພັນດານຸວົງ ເລຂາພັກເມືອງ #ເຈົ້າເມືອງໆປາກຊ່ອງ. ທ່ານ ປອ ສົມລິດ ວິລະວົງ ຮອງຫົວໜ້າພະແນກກະສິກໍາ ແລະ ປ່າໄມ້ແຂວງ, ພ້ອມດ້ວຍຂະແໜງປ່າໄມ້ ແລະບັນດາຂະແໜງການກ່ຽວຂ້ອງຂອງແຂວງ, ຫ້ອງການອ້ອມຂ້າງເມືອງປາກຊ່ອງຕະຫຼອດອໍານາດການປົກຄອງ ແລະ ປະຊາຊົນບ້ານອ້ອມຂ້າງເຂົ້າຮ່ວມ. ທ່ານ ພິມພອນ ພັນດານຸວົງ ເຈົ້າເມືອງໆປາກຊ່ອງ ໄດ້ກ່າວໄຂພິທີວ່າ:ຈຸດປະສົງໃນການປູກໄມ້ໃນປີນີ້ ເພື່ອປະຕິບັດຍຸດທະສາດພັດທະນາປ່າໄມ້ ຮອດປີ 2020 ທີ່ລັດຖະບານໄດ້ຮັບຮອງ ແລະ ປະກາດໃຊ້ໃນເດືອນສິງຫາ 2005 ໃນການຍົກລະດັບຄວາມປົກຫຸ້ມຂອງປ່າໄມ້ໃຫ້ໄດ້ 70% ໃນປີ 2020 ຂອງເນື້ອທີ່ທົ່ວປະເທດກໍຄືແຂວງຈໍາປາສັກ. ເພື່ອເປັນການປົກປັກຮັກສາປ່າໄມ້ແບບຍືນຍົງເພື່ອການຊົມໃຊ້ພາຍໃນ ແລະ ປຸງແຕ່ງເປັນຜະລິດຕະພັນເພື່ອສົ່ງອອກ. ປະກອບສ່ວນສ້າງລາຍຮັບໃກ້ແກ່ປະຊາຊົນ ແລະ ລາຍຮັບແຫ່ງຊາດ ໄປຄຽງຄູ່ກັບການປົກປັກຮັກສາສະພາບແວດລ້ອມ ເພີ່ມພື້ນທີ່ສີຂຽວໃຫ້ນັບມື້ນັບຫຼາຍ. ຈາກນີ້ກໍເພື່ອສ້າງຜົນງານ ແລະ ຂະບວນການຕ້ອນຮັບກອງປະຊຸມໃຫຍ່ຄັ້ງທີ VIII ຂອງອົງຄະນະພັກແຂວງຈໍາປາສັກທີ່ຈະໄຂຂຶ້ນໃນຕໍ່ໜ້ານີ້.

ສໍາລັບຕົ້ນໄມ້ທີ່ນໍາມາປູກໃນພິທີຄັ້ງນີ້ ມີທັງໝົດ 2000 ຕົ້ນ ໃນນັ້ນຫຼາຍກວ່າໝູ່ແມ່ນຕົ້ນໄມ້ຂະຍູງ, ໄມ້ດູ່ລາຍ, ໄມ້ແຕ່ຄ່າ, ໄມ້ຈໍາປາປ່າ ແລະຕົ້ນໄມ້ເສດຖະກິດຊະນິດອື່ນໆ ຊຶ່ງປູກໃນເຂດປ່າຍອດນໍ້າຂອງເຂື່ອນໄຟຟ້າ ເຊປຽນ-ເຊນໍ້ານ້ອຍ ລວມໃນເນື້ອທີ່ 2 ເຮັກຕາ. ເພື່ອເຮັດໃຫ້ຕົ້ນໄມ້ທີ່ປູກໃນປີນີ້ມີຄວາມຈະເລີນເຕີບໂຕທ່ານ ເຈົ້າເມືອງປາກຊ່ອງ ຍັງໄດ້ຮຽກຮ້ອງໃຫ້ຫ້ອງການກະສິກໍາ ແລະ ປ່າໄມ້, ອໍານາດການປົກຄອງກຸ່ມ, ບ້ານ,ຕະຫຼອດປະຊາຊົນທຸກພາກສ່ວນເປັນເຈົ້າການຮ່ວມກັນປູກ ແລະ ປົກປັກຮັກສາຕົ້ນໄມ້ ແລະ ປ່າໄມ້ໃຫ້ເປັນຂະບວນກ້ວາງຂວາງ. ປູກແລ້ວຕ້ອງແບ່ງງານ ແບ່ງຄວາມຮັບຜິດຊອບໃຫ້ແຕ່ລະພາກສ່ວນໃນການປົກຮັກສາຫົດນໍ້າ, ໃສ່ຝຸ່ນ, ພູນດິນ ເພື່ອໃຫ້ຕົ້ນໄມ້ສົມບູນ ແລະໃຫຍ່ໄວ. ພາຍຫຼັງກ່າວໄຂພິທີປູກຕົ້ນໄມ້ແລ້ວ, ທ່ານເຈົ້າເມືອງປາກຊ່ອງພ້ອມຄະນະ, ຮອງຫົວໜ້າພະແນກກະສິກໍາ ແລະ ປ່າໄມ້ແຂວງ, ບັນດາຂະແໜງການກ່ຽວຂ້ອງຂອງແຂວງ, ເມືອງຕະຫຼອດອໍານາດການປົກຄອງ ແລະ ປະຊາຊົນກໍໄດ້ຮ່ວມກັນປູກຕົ້ນໄມ້ຢ່າງເປັນຂະບວນ.

ຂ່າວ:ເກດສະໜາ ແກ້ວສຸວັນນະແສງ.