ສະຫງວນລິຂະສິດ © ສະຖານີ ວິທະຍຸກະຈາຍສຽງແຫ່ງຊາດລາວ

ວິທະຍຸກະຈາຍສຽງແຫ່ງຊາດລາວ

Lao National Radio

ຊົມເຊີຍ ວັນສ້າງຕັ້ງວິທະຍຸກະຈາຍສຽງແຫ່ງຊາດລາວ ຄົບຮອບ 60 ປີ
(13 ສິງຫາ 1960-13 ສິງຫາ 2020) ຢ່າງສຸດໃຈ

ເມືອງປາກທາ ສະເຫຼີມສະຫຼອງວັນແພດລາວ ວັນທີ 18 ມິຖຸນາ ແລະ ວັນຕ້ານໄຂ້ຍຸງລາຍອາຊຽນ 15 ມິຖຸນາ 2020.

ວັນທີ 18 ມິຖຸນາ 2020 ນີ້ ເມືອງປາກທາ ແຂວງບໍ່ແກ້ວ ສະເຫຼີມສະຫຼອງວັນແພດລາວ ຄົບຮອບ 55 ປີ ( 18 ມິຖຸນາ 1965-2020 ) ແລະ ວັນຕ້ານໄຂ້ຍຸງລາຍອາຊຽນ ຄົບຮອບ 9 ປີ ຂຶ້ນທີ່ສະໂມສອນຂອງເມືອງ ໂດຍການເປັນປະທານ ພ້ອມທັງປາໄສເອກະສານຂອງທ່ານ ນາງ ຈັນສຸກ ວັນນະວົງ ຄະນະປະຈຳພັກເມືອງ ຮອງເຈົ້າເມືອງປາກທາ, ມີບັນດາຄະນະປະຈຳພັກ, ກຳມະການພັກເມືອງ, ຫົວໜ້າ-ຮອງຫົວໜ້າຫ້ອງການ, ສອງກອງບັນຊາການ ທະຫານ, ຕຳຫຼວດ, ແພດ, ໝໍ, ອຳນາດການປົກຄອງ ແລະ ຄູ-ອາຈານ ຕະຫຼອດຮອດນ້ອງນັກຮຽນເຂົ້າຮ່ວມຮັບຟັງ.

ທ່ານ ນາງ ຈັນສຸກ ວັນນະວົງ ຄະນະປະຈຳພັກເມືອງ ຮອງເຈົ້າເມືອງປາກທາໃຫ້ຮູ້ວ່າ: ວັນແພດລາວ ແມ່ນວັນສ້າງຕັ້ງຂຶ້ນເພື່ອໃຫ້ທົ່ວປວງຊົນທັງຊາດ, ຄົນເຈັບ, ຄອບຄົວ ແລະ ຢາດຕິພີ່ນ້ອງຂອງຄົນເຈັບໄດ້ສະເເດງຄວາມຮູ້ບຸນຄຸນ, ກະຕັນຍູກະຕະເວທີຕໍ່ແພດທີ່ໄດ້ທຳການກວດ, ບົ່ງມະຕິພະຍາດປິ່ນປົວບົວລະບັດຮັກສາສຸຂະພາບ ແລະ ບໍລິການດ້ານອື່ນໆ ທີ່ພົວພັນເຖິງສຸຂະພາບຄົນເຈັບ, ວັນແພດລາວ ເປັນວັນຂີດໝາຍແຫ່ງການເຕີບໃຫຍ່ຂະຫຍາຍຕົວຂອງເຫຼົ່າຮົບເສນາຮັກ ແລະ ອີງໃສ່ນະໂຍບາຍຂອງພັກ, ສູນກາງແນວລາວສ້າງຊາດຈຶ່ງໄດ້ມີມະຕິຕົກລົງສ້າງພະແນກສາທາລະນະສຸກສູນກາງແນວລາວສ້າງຊາດ ໃນວັນທີ 18 ມິຖຸນາ 1965 ວັນແພດລາວເປັນຂີດໝາຍແຫ່ງການກຳນົດຂອງກົດໝາຍວ່າດ້ວຍການປິ່ນປົວ ສະບັບປັບປຸງ ໝວດທີ 10 ມາດຕາ 76 ໄດ້ກຳນົດເອົາວັນທີ 18 ມິຖຸນາ ເປັນວັນແພດລາວ, ວັນແພດລາວ ແມ່ນວັນໜຶ່ງທີ່ເປັນປະຫວັດສາດອັນລ້ຳຄ່າຂອງຂະແໜງສາທາລະນະສຸກ ເປັນວັນສ້າງຂະບວນການຕ່າງໆ ເພື່ອລະນຶກເຖິງຜົນງານ ແລະ ສັນລະເສີນຄຸນງາມຄວາມດີຂອງແພດລາວໃນສະໄໜຕໍ່ສູ້ກູ້ຊາດ ກໍ່ຄືສະໄໜປົກປັກຮັກສາ ແລະ ສ້າງສາປະເທດຊາດ ການສະເຫຼີມສະຫຼອງວັນດັ່ງກ່າວຍັງເປັນການປຸກຈິດສຳນຶກໃຫ້ພະນັກງານແພດ,ໝໍ, ພະຍາບານ, ພະນັກງານສາທາລະນະສຸກລາວຮູ້ສືບທອດຮ່ຳຮຽນເອົາແບບຢ່າງຂອງແພດໝໍ ແລະພະນັກງານສາທາລະນະສຸກຮຸ່ນກ່ອນ ອອກແຮງຝຶກຝົນຫຼໍ່ຫຼອມຕົນເອງໃຫ້ພຽບພ້ອມໄປດ້ວຍຄຸນສົມບັດ, ຈັນຍາທຳວິຊາຊີບ ແລະ ຄວາມຊຳນິຊຳນານງານທາງດ້ານວິຊາສະເພາະ ເພື່ອກາຍເປັນແພດແຫ່ງຊາດ, ແພດປະຊາຊົນໃຫ້ສົມກຽດສັກສີທີ່ວ່າ: ເປັນນັກຮົບເສື້ອຂາວ ປະຕິວັດລາວ, ຄະນະດຽວກັນກໍ່ເປັນການເປີດຂະບວນການຕ້ານໄຂ້ຍຸງລາຍຂອງເມືອງປາກທາ ຕິດພັນກັບວັນຕ້ານໄຂ້ເລືອດອອກອາຊຽນໃນມື້ນີ້ ກໍ່ເພື່ອເຮັດໃຫ້ການຖະແຫຼງຈາກຕາ ໄດ້ຜັນຂະຫຍາຍ, ຈັດຕັ້ງປະຕິບັດຢ່າງຕໍ່ເນື່ອງ ແລະ ປຸກຈິດສຳນຶກໃຫ້ທຸກຄົນພາຍໃນເມືອງປາກທາເຂົ້າໃຈ, ຮູ້ຈັກວິທີການທຳລາຍໜອນນ້ຳແຫຼ່ງເພາະພັນຂອງຍຸງລາຍເຮັດຢ່າງເປັນປົກກະຕິໂດຍການປະຕິບັດ 5 ປໍ ປາບໄຂ້ເລືອດອອກ ໂອກາດດັ່ງກ່າວທ່ານ ນາງ ຈັນສຸກ ວັນນະວົງ ຮອງເຈົ້າເມືອງປາກທາກໍ່ໄດ້ກ່າວເປີດຂະບວນການຕ້ານໄຂ້ຍຸງລາຍຕິດພັນກັບວັນຕ້ານໄຂ້ເລືອດອອກອາຊຽນ ຄົບຮອບ 9 ປີ ຢ່າງເປັນທາງການ.

ຂ່າວ: ວັນນະເດດ ວິໄລຄຸນ