ເມືອງປາກທາ ໄດ້ຮັບຜົນກະທົບນ້ຳຖ້ວມຊຸ ຖ້ວມເນື້ອທີ່ນາ ແລະ ຊົນລະປະທານ ເສຍຫາຍ 22 ບ້ານ

ທ່ານ ຄໍາຜະຫຍາ ພົມປັນຍາ ຮອງເຈົ້າແຂວງໆບໍ່ແກ້ວ ທັງເປັນປະທານ ຄະກໍາມະການຄຸ້ມຄອງໄພພິບັດຂັ້ນແຂວງ ພ້ອມດ້ວຍຄະນະ ລົງຢ້ຽມຢາມ ໃຫ້ກໍາລັງໃຈປະ ຊາຊົນທີ່ຖືຜົນກະທົບນ້ຳຖ້ວມເນື້ອທີ່ນາ ພ້ອມທັງລົງກວດກາເບິ່ງຄວາມເສຍຫາຍຕົວຈິງ ຢູ່ບ້ານກ້ອນຕື່ນ, ບ້ານປາກໂຊະ, ບ້ານປາງສາ ແລະ ບ້ານດົງ ເມືອງປາກທາ ແຂວງບໍ່ແກ້ວ ໃນວັນທີ 25 ສິງຫາ 2024 ຜ່ານມາ.

ທ່ານ ຄໍາເຄື່ອງ ພົມວິສັກ ຫົວໜ້າຫ້ອງການແຮງງານ ແລະ ສະຫວັດດີການສັງ ຄົມ ເມືອງປາກທາ ໄດ້ລາຍງານວ່າ: ເມືອງປາກທາ ໄດ້ຮັບຜົນກະທົບນ້ຳຖ້ວມຊຸ ໃນລະຫວ່າງວັນທີ 21-22 ສິງຫາ 2024 ທີ່ຜ່ານມາ, ຊຶ່ງການສໍາຫລວດເບື້ອງຕົ້ນແມ່ນ ນໍ້າຫ້ວຍຊຸນອງ ຖ້ວມເນື້ອທີ່ນາ ແລະ ຊົນລະປະທານ ເສຍຫາຍ 22 ບ້ານ. ສະເພາະ ກຸ່ມບ້ານກ້ອນຕື່ນ ຄື: ບ້ານກ້ອນຕື່ນ ເສຍຫາຍ 147 ຄອບຄົວ, ບ້ານປາກໂຊະ 24 ຄອບຄົວ, ບ້ານປາງສາ 27 ຄອບຄົວ ແລະ ບ້ານດົງ 33 ຄອບຄົວ.

ສ່ວນບ້ານຈຽງຕອງ ຍັງບໍ່ສາມາດເຂົ້າເຖິງໄດ້ ເສັ້ນທາງຖືກຕັດຂາດຫລາຍຈຸດ, ລະບົບນໍ້າລິນ ມີຄວາມເສຍຫາຍ ປະຊາຊົນບໍ່ມີນໍ້າລິນໃຊ້, ຊຶ່ງການສໍາຫລວດ ຜົນເສຍຫາຍລະອຽດ ພາກສ່ວນທີ່ກ່ຽວຂອງຍັງເລັ່ງລົງພື້ນທີ່ເກັບກໍາຂໍ້ມູນລະອຽດ, ບາງພື້ນທີ່ຍັງບໍ່ທັນສໍາຫລວດໄດ້ ເນື່ອງຈາກນໍ້າຍັງຖ້ວມສູງ, ສ່ວນເສັ້ນທາງລະຫວ່າງ ປາກທາ-ບ້ານຫ້ວຍແອ່ນ ລົດໃຫຍ່ບໍ່ສາມາດສັນຈອນໄປ-ມາໄດ້ ເພາະມີດິນເຈື່ອນຖົມໜ້າທາງ ນັບແຕ່ທ່າຂ້າມບັກ ບ້ານປາກທາ ໄປຫາແຕ່ລະບ້ານ ແມ່ນມີຄວາມຫຍຸ້ງຍາກ, ເສັ້ນທາງທີ່ເປ່ເພ ການແກ້ໄຂຍັງບໍ່ທັນສໍາເລັດ ເນື່ອງຈາກຍັງມີຝົນຕົກລິນ ແລະ ຕົກໜັກ ຈຶ່ງບໍ່ສາມາດ ແກ້ໄຂໄດ້ທັນຕາມສະພາບການ.

ພ້ອມນີ້, ຍັງໄດ້ສະເໜີ ໃຫ້ການນຳຂັ້ນແຂວງຊ່ວຍເຫລືອ ແລະ ຟື້ນຟູເນື້ອທີ່ນາ, ສ້ອມແປງລະບົບຊົນລະປະທານ, ລະບົບນໍ້າລິນ ແລະ ສະໜອງແນວພັນພືດ ເພື່ອປູກທົດແທນ ພ້ອມທັງຊ່ວຍເຫລືອບັນເທົາທຸກ ໃຫ້ຄອບຄົວທີ່ໄດ້ຮັບຜົນກະທົບ ຕາມຄວາມເໝາະສົມ.

ໂອກາດນີ້, ທ່ານ ຄໍາຜະຫຍາ ພົມປັນຍາ ໄດ້ມີຄໍາເຫັນຢື້ຢາມຖາມຂ່າວ ພໍ່ແມ່ປະຊາຊົນ ພ້ອມທັງສະແດງຄວາມເສຍໃຈ ຕໍ່ກັບຜົນເສຍຫາຍທີ່ເກີດໃນຄັ້ງນີ້ ພ້ອມທັງຮຽກຮ້ອງໃຫ້ພໍ່ແມ່ປະຊາຊົນ ຈົ່ງເປັນເຈົ້າການຊ່ວຍເຫລືອກັນໃນເບື້ອງຕົ້ນ ເພື່ອຟື້ນຟູ ແລະ ປູກພືດທົດແທນເນື້ອທີ່ນາ ທີ່ໄດ້ຮັບຄວາມເສຍຫາຍເລັກນ້ອຍ ແລະ ເອົາໃຈໃສ່ບົວລະບັດຮັກສາເຂົ້າທີ່ຍັງເຫລືອ ພ້ອມທັງເນັ້ນໜັກໃຫ້ຄະນະຮັບຜິດຊອບ ຂະແໜງການທີ່ກ່ຽວຂ້ອງ ໃຫ້ເອົາໃຈໃສ່ ສົມທົບກັບຄະນະບ້ານ ແລະ ພໍ່ແມ່ປະຊາຊົນ ເພື່ອເກັບກໍາຂໍ້ມູນຜົນເສຍຫາຍລະອຽດ ເພື່ອສະຫລຸບລາຍງານ ໃຫ້ຖືກຕ້ອງ ແລະ ວ່ອງໄວ ເພື່ອຊ່ວຍເຫລືອປະຊາຊົນໃນທຸກດ້ານ.

ໂອກາດດັ່ງກ່າວ, ຮອງເຈົ້າແຂວງບໍ່ແກ້ວ ໄດ້ມອບເຄື່ອງບັນເທົາທຸກ ໃຫ້ປະຊົນທີ່ໄດ້ຮັບຜົນກະທົບດັ່ງກ່າວ ພ້ອມທັງລົງເບິ່ງພື້ນທີ່ນາຕົວຈິງຂອງປະຊາຊົນທີ່ໄດ້ຮັບຄວາມເສຍຫາຍ ຕື່ມອີກ.

ຂ່າວ: ບຸນເພັງ ທຸມມະວົງ