ວິທະຍຸກະຈາຍສຽງແຫ່ງຊາດລາວ

Lao National Radio

ຕັ້ງໜ້າຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XI ຂອງພັກ ເຂົ້າສູ່ຊີວິດຈິງ
ກອງປະຊຸມປຶກສາຫາລືວຽກງານການກະກຽມຈັດເທດສະການບຸນຜີໂຂນຕິດພັນກັບການເປີດປີທ່ອງທ່ຽວລາວ ປີ 2024.ຂອງເມືອງປາກລາຍ ແຂວງໄຊຍະບູລີ ຈັດຂື້ນໃນຕອນເຊົ້າວັນທີ 5ກຸມພາ 2024 ທີ່ຫ້ອງປະຊຸມໃຫຍ່ຂອງເມືອງ ພາຍໃຕ້ການເປັນປະທານຂອງທ່ານ ບຸນໝັ້ນ ເສີມມາ ປະທານກວດກາພັກ-ລັດເມືອງ, ມີຄະນະຮັບຜິດຊອບຊີ້ນໍາການຈັດເທດສະການບຸນຜີໂຂນຂັ້ນເມືອງ, ມີຫົວໜ້າ-ຮອງຫົວໜ້າຫ້ອງການ, ອົງການ, ກົມກອງອ້ອມຂ້າງເມືອງ, ນາຍບ້ານເທດສະບານ ແລະ ພະນັກງານຄະນະຮັບຜິດຊອບເຂົ້າຮ່ວມ.
ໃນກອງປະຊຸມຜູ້ເຂົ້າຮ່ວມໄດ້ຮັບຟັງການຜ່ານຂໍ້ຕົກລົງຂອງທ່ານເຈົ້າເມືອງ ວ່າດ້ວຍການແຕ່ງຕັ້ງຄະນະຮັບຜິດຊອບຊີ້ນໍາການຈັດເທດສະການບຸນຜີໂຂນເມືອງປາກລາຍຕິດພັນກັບການເປີດປີທ່ອງທ່ຽວລາວ ປີ 2024. ຈາກນັ້ນ ປະທານກອງປະຊຸມໄດ້ມີຄໍາເຫັນຊີ້ນໍາໃນການກະກຽມວຽກງານຮອບດ້ານໃຫ້ແກ່ການຈັດປີທ່ອງທ່ຽວລາວ 2024 ເປັນຕົ້ນ ການກໍານົດພິທີເປີດ, ບັນດາກິດຈະກໍາການທ່ອງທ່ຽວ, ການສ້າງຂະບວນການດ້ານຕ່າງໆ ໃນການຕ້ອນຮັບປີທ່ອງທ່ຽວ, ການເຊີນແຂກ, ການໂຄສະນາການທ່ອງທ່ຽວ, ການສົ່ງເສີມພາກທຸກລະກິດເຂົ້າຮ່ວມ,ພ້ອມກະກຽມຂື້ນແຜນງົບປະມານຂອງແຕ່ລະອານຸກໍາມະການຮັບໃຊ້ໃນງານ ແລະ ການກໍານົດວັນເວລາທີ່ຊັດເຈນ.
ໃນວາລະກອງປະຊຸມຜູ້ເຂົ້າຮ່ວມໄດ້ພ້ອມກັນປະກອບຄໍາຄິດຄໍາເຫັນ ເພື່ອໃຫ້ການຈັດປີທ່ອງທ່ຽວລາວປີ 2024 ທີ່ເມືອງປາກລາຍ ໄດ້ຮັບຜົນສໍາເລັດ ສາມາດດຶງດູດນັກທ່ອງທ່ຽວເຂົ້າມາທ່ອງທ່ຽວຢູ່ເມືອງໃຫ້ຫຼາຍຂຶ້ນ ເຊິ່ງພິທີເປີດປີທ່ອງທ່ຽວລາວ 2024 ຂອງເມືອງປາກລາຍ ຈະຈັດຂື້ນໃນຕົ້ນເດືອນມີນາ 2024ນີ້
ຂ່າວ: ກ່າ ຄຸດທະວົງສັກ