ເມືງພູວົງ ແຂວງອັດຕະປື ປ່ອຍປາ ລົງສູ່ແຫລ່ງນໍ້າທໍາມະຊາດ ໃນວັນທີ 12 ກໍລະ ກົດ 2024 ທີ່ເຂື່ອນຝາຍນ້ຳລົ້ນຫ້ວຍເຕວ ບ້ານວັງຍາງ ເນື່ອງໃນໂອກາດ ວັນປ່ອຍປາ ແລະ ອະນຸລັກສັດນ້ຳ ແຫ່ງຊາດ ໂດຍການເຂົ້າຮ່ວມ ຂອງທ່ານ ນາງ ບຸນນານ ບຸນນະແສງ ຫົວໜ້າຄະນະຈັດຕັ້ງແຂວງ.
ທ່ານ ເພັດສະຫວັນ ສີກຸນລະບຸດ ຫົວໜ້າຫ້ອງການ ກະສິກຳ ແລະ ປ່າໄມ້ເມືອງພູວົງ ໄດ້ລາຍງານຜົນຂອງການຈັດຕັ້ງປະຕິບັດວຽກງານການປ່ອຍປາ ໃນປີຜ່ານມາ ແລະ ແຜນການປະຕິບັດໃນປີ 2024 ເພື່ອເຮັດໃຫ້ເນື້ອໃນຈິດໃຈຂອງວັນດັ່ງກ່າວໄດ້ຮັບການເສີມຂະຫຍາຍເຂົ້າສູ່ຊີວິດຕົວຈິງຂອງພໍ່ແມ່ປະຊາຊົນ, ແລະ ປູກຈິດສຳນຶກ ໃຫ້ນັກຮົບປັນຍາຊົນຮັບຮູ້ເຂົ້າໃຈ ສູ່ຊີວິດຕົວຈິງ ຢ່າງເປັນຂະບວນການຟົດຟື້ນ ແລະ ກວ້າງຂວາງໃນທົ່ວປວງຊົນ ສືບທອດກັນໄປຈົນເຊັ່ນລູກເຊັ່ນຫລານ. ເມືອງພູວົງ ເປັນເມືອງໜຶ່ງທີ່ຍັງມີຄວາມອຸດົມສົມບູນ ໄປດ້ວຍຊັບພະຍາກອນທຳມະ ຊາດ ໂດຍສະເພາະແມ່ນ້ຳລຳເຊ, ຫ້ວຍ, ຮ່ອງ, ຄອງ, ບຶງ ເຊິ່ງເປັນບ່ອນຊອກຢູ່ທຳມາຫາກິນຂອງພໍ່ເເມ່ປະຊາຊົນ ໃນອະດີດກໍຄືປັດຈຸບັນ ເພື່ອເຮັດໃຫ້ປາ ແລະ ສັດນ້ຳ ມີຄວາມຍືນຍົງ ທັງເປັນການຮັບປະກັນ ໃຫ້ມີອາຫານພຽງພໍກັບຄວາມຕ້ອງການຂອງສັງຄົມ.
ສຳລັບການປ່ອຍປາ ໃນປີຜ່ານມາ ທົ່ວເມືອງ ໄດ້ເຜີຍແຜ່, ປະກາດນຳໃຊ້ກົດລະບຽບການຄຸ້ມຄອງວັງສະຫງວນ, ການຫາປາເຂດອະນຸຍາດຢ່າງເຂັ້ມງວດ ໂດຍໄດ້ປ່ອຍປາທັງໝົດ 370.000 ໂຕ ຖ້າທຽບໃສ່ແຜນການປ່ອຍ 300.000 ໂຕ ເຫັນວ່າປະຕິບັດລື່ນແຜນ 23,3% ພ້ອມທັງຊູກຍູ້ປະຊາຊົນຊື້ປາມາປ່ອຍລ້ຽງໃນໝອງດິນ 235 ໜອງປ່ອຍປາທັງໝົດ 350.000 ໂຕ. ສ່ວນແຜນປ່ອຍ ແລະ ແຜນລ້ຽງປາ ໃນປີ 2024 ນີ້ ທົ່ວເມືອງໃຫ້ໄດ້ 500.000 ໂຕ, ເຊິ່ງໃນນີ້, ໄດ້ປ່ອຍລົງສູ່ເຂື່ອນຝາຍຕັນນ້ຳຫ້ວຍເຕວບ້ານວັງຍາງ ຈຳນວນ 200.000 ໂຕ, ພະເເນກກະສິກຳ- ປ່າໄມ້ແຂວງ 4.000 ໂຕ, ປະຊາຊົນປ່ອຍປາລ້ຽງໃນໜອງແຕ່ລະບ້ານປະມານ 300.000 ໂຕ ແລະ ປະຊາຊົນຍັງສືບຕໍ່ໃນການ ປ່ອຍປາເພີ່ມຕື່ມອີກ ໃຫ້ສຳເລັດຕາມເປົ້າໝາຍ.
ຂ່າວ-ພາບ: ສິງໂຕ
