ເນື່ອງຈາກຝົນຕົກຕິດຕໍ່ກັນມາເປັນເວລາຫລາຍມື້ ເຮັດໃຫ້ນໍ້າມະ-ນໍ້າລອງ ແລະ ສາຍຫ້ວຍນໍ້າຕ່າງໆ ຕາມທາງເລກທີ 17B ມີລະດັບນໍ້າສູງຂຶ້ນຢ່າງຕໍ່ເນື່ອງ.
ອົງການປົກຄອງເມືອງ ໄດ້ແຈ້ງເຕືອນມາຍັງພໍ່ແມ່ປະຊາຊົນທີ່ອາໄສລຽບຕາມແຄມສາຍນໍ້າມະ-ນໍ້າລອງ ໃຫ້ມີສະຕິເຝົ້າລະວັງຕໍ່ການປ່ຽນແປງຂອງສະພາບດິນຟ້າອາກາດ ຕິດຕາມລະດັບນໍ້າມະ, ນໍ້າລອງ ແລະ ນໍ້າຫ້ວຍຕ່າງໆ ທີ່ອາດຈະສູງຂຶ້ນ ເຖິງເຂດອັນຕະລາຍ ເພື່ອປ້ອງກັນຄວາມເສຍຫາຍ ແລະ ຮັບມືກັບໄພພິບັດທີ່ອາດຈະເກີດຂຶ້ນໃຫ້ທັນເວລາ ພ້ອມກັນຕິດຕາມຂ່າວການປ່ຽນແປງຂອງສະພາບດິນຟ້າອາກາດ ຈາກກົມອຸຕຸນິຍົມ ແລະ ອຸທົກກະສາດ, ຈາກວິທະຍຸ, ລະບົບໂທລະໂຄ່ງ ແລະ ສື່ສັງຄົມອອນລາຍຕ່າງໆ ທີ່ເປັນທາງການ ແລະ ໜ້າເຊື່ອຖື, ໃຫ້ແຕ່ລະບ້ານເອົາໃຈໃສ່ຈັດຕັ້ງພັດປ່ຽນກັນເວນຍາມຕະຫລອດ 24 ຊົ່ວໂມງ, ເກັບມ້ຽນເຄື່ອງຂອງທີ່ມີຄ່າ, ສັດລ້ຽງ ໄປໄວ້ບ່ອນທີ່ສູງ ແລະ ປອດໄພ.
ຕາມການລາຍງານຂອງ ຫ້ອງການ ໂຍທາທິການ ແລະ ຂົນສົ່ງເມືອງໃຫ້ຮູ້ວ່າ: ໃນລະຫວ່າງວັນທີ 20-22 ສິງຫາ 2024 ເສັ້ນທາງ ລະຫວ່າງ ເມືອງລອງ-ເມືອງສິງ ແລະ ເມືອງລອງ-ຊຽງກົກ ມີບວກຂຸມນ້ອຍ-ໃຫຍ່ຫລາຍຈຸດ ແລະ ຂາດເປັນບາງຊ່ວງ ເຊັ່ນ: ຈຸດບ້ານຫົວຂົວ ໄດ້ມີດິນເຈື່ອນ ນໍ້າໄຫລຊຸຖ້ວມທາງ, ຈຸດລະຫວ່າງກາງບ້ານສີວິໄລ ຫາບ້ານຫ້ວຍໝໍ້ ສາຍນໍ້າມະໄຫລເຊາະ ເຮັດໃຫ້ເສັ້ນທາງເຈື່ອນ ແລະ ຂາດ ຊຶ່ງລົດບັນທຸກບໍ່ສາມາດສັນຈອນໄປ-ມາໄດ້ ພ້ອມນີ້, ດິນເຈື່ອນທັບຖົມເສັ້ນທາງຫລາຍຈຸດ ເຮັດໃຫ້ທາງມື່ນ ເປັນຕົ້ນ ເສັ້ນທາງລະຫວ່າງ ເມືອງລອງ-ຊຽງກົກ ບໍ່ສາມາດທຽວໄດ້ເປັນບາງບ່ອນ. ນອກຈາກນັ້ນ, ເສັ້ນທາງ ເຂົ້າຫາແຕ່ລະກຸ່ມບ້ານ ກໍມີຫລາຍຈຸດຫລາຍບ່ອນທີ່ບໍ່ສະດວກໃນການເດີນທາງ.
ປັດຈຸບັນ, ພາກສ່ວນທີ່ກ່ຽວຂ້ອງຂອງເມືອງ ພວມດໍາເນີນການແກ້ໄຂຈຸດທາງຂາດ ເພື່ອໃຫ້ສາມາດນໍາໃຊ້ ແລະ ທຽວໄປ-ມາໄດ້ເປັນປົກກະຕິ. ສຳລັບການເດີນ ທາງທີ່ມີຄວາມຈໍາເປັນ ຂຶ້ນເໜືອ-ລ່ອງໃຕ້ ກໍໃຫ້ມີສະຕິຄ່ອຍໄປຄ່ອຍມາ ກວດກາສະພາບເຕັກນິກຂອງລົດ, ຕິດຕາມສະພາບເສັ້ນທາງໃຫ້ດີ ເພື່ອບໍ່ໃຫ້ເສຍເວລາໃນການເດີນທາງ ແລະ ຮັບປະກັນຄວາມປອດໄພ.
ຂ່າວ-ພາບ: ອຸທາ ພົນທາວີ
