ໃນຕອນບ່າຍວັນທີ 21 ກັນຍາ 2022 ນີ້ ທີ່ເດີນກິລາເດີນຫຍ້າທຽມ ພົງສະຫວັນ ບ້ານພູຖໍ້າພວງ ເມືອງລະຄອນເພັງ ໄດ້ຈັດງານພົບປະ ຊາວຫວຽດນາມທີ່ດໍາລົງຊີວິດ, ເຄື່ອນໄຫວເຮັດທູລະກິດ ແລະຄ້າຂາຍ ຢູ່ເມືອງລະຄອນເພັງ ເພື່ອປະກອບສ່ວນສະເຫຼີມສະຫຼອງປີສະມັກຄີມິດຕະພາບລາວ-ຫວຽດນາມ 2022 ໂດຍການເປັນປະທານ ຂອງທ່ານ ທອງດີ ຈັນທະວົງ ເລຂາພັກເມືອງ ເຈົ້າເມືອງລະຄອນເພັງ, ມີທ່ານຮອງເລຂາພັກເມືອງ, ຮອງເຈົ້າເມືອງ, ຄະນະປະຈໍາພັກເມືອງ, ກໍາມະການພັກເມືອງ, ຫົວໜ້າຫ້ອງການ- ອົງການທຽບເທົ່າ, ນັກທູລະກິດ ແລະຊາວຫວຽດນາມ ທີ່ດໍາລົງຊີວິດ, ເຄື່ອນໄຫວເຮັດທູລະກິດ ແລະຄ້າຂາຍຢູ່ເມືອງລະຄອນເພັງ ເຂົ້າຮ່ວມ.
ໃນໂອກາດໂອ້ລົມຕໍ່ພິທີ ທ່ານ ທອງດີ ຈັນທະວົງ ເຈົ້າເມືອງລະຄອນເພັງ ໄດ້ເລົ່າຄືນມູນເຊື້ອ ວັນສ້າງຕັ້ງສາຍພົວພັນການທູດລາວ-ຫວຽດນາມຄົບຮອບ 60 ປີ (5 ກັນ ຍາ 1962-5 ກັນຍາ 2022) ແລະວັນເຊັນສັນຍາມິດຕະ ພາບ ແລະການຮ່ວມມືລາວ-ຫວຽດນາມຄົບຮອບ 45 ປີ (18 ກໍລະກົດ 1977-18 ກໍລະກົດ 2022) ໂດຍໄດ້ຍົກໃຫ້ເຫັນຄວາມໝາຍສໍາຄັນ, ໝາກຜົນອັນພົ້ນເດັ່ນ ແລະການເສີມຂະຫຍາຍສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີພິເສດ ແລະການຮ່ວມມືຮອບດ້ານລາວ-ຫວຽດ ນາມ ທີ່ປະທານ ໂຮ່ຈິມີນ ຜູ້ນໍາທີ່ຍິ່ງໃຫຍ່ ຂອງປະຊາຊົນຫວຽດນາມ, ປະທານ ໄກສອນ ພົມວິຫານ ແລະປະທານສຸພານຸວົງ ຜູ້ນໍາທີ່ແສນເຄົາລົບຮັກ ຂອງປະຊາຊົນລາວໄດ້ກໍ່ຕັ້ງ ໄດ້ຮັບການຖະໜຸຖະໜອມ, ປົກປັກຮັກສາ ແລະ ເພີ່ມພູນຄູນສ້າງ ໃນບັນດາຮຸ່ນການນຳ, ນັກຮົບປະຕິວັດ ແລະປະຊາຊົນສອງຊາດຕະຫຼອດມາ, ເພື່ອໃຫ້ເຂົາເຈົ້າ ໄດ້ມີຄວາມເອກອ້າງທະນົງໃຈ ແລະ ປະກອບສ່ວນຢ່າງຕັ້ງໜ້າເຂົ້າໃນການເສີມຂະຫຍາຍ ແລະ ເພີ່ມພູນຄູນສ້າງສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານ ລະຫວ່າງສອງພັກ, ສອງລັດ ແລະ ປະຊາຊົນສອງຊາດລາວ – ຫວຽດນາມ ໃຫ້ໝັ້ນຄົງຂະໜົງແກ່ນຕະຫຼອດກາລະນານ.
ຈາກນັ້ນ, ເພື່ອເປັນການຮັດແໜ້ນມິດຕະພາບ ແລະຄວາມສະມັກຄີ ລະຫວ່າງຄະນະນໍາເມືອງ, ອົງການຈັດຕັ້ງຂັ້ນເມືອງ, ນັກທູລະກິດລາວ-ຫວຽດນາມ ໃຫ້ແໜ້ນແຟ້ນຂຶ້ນ ໄດ້ມີການແຂ່ງຂັນກິລາບານເຕະມິດຕະພາບລະຫວ່າງ ທີມຄະນະນໍາ ແລະອົງການຈັດຕັ້ງຂັ້ນເມືອງ ກັບທີມນັກທູລະກິດລາວ-ຫວຽດນາມ ເຊິ່ງຜົນການແຂ່ງຂັນ ທີມນັກທູ ລະກິດລາວ-ຫວຽດນາມເປັນຝ່າຍເອົາຊະນະ ທີມຄະນະນໍາ ແລະອົງການຈັດຕັ້ງເມືອງ 6 ຕໍ່ 5 ປະຕູ ແລະນອກຈາກນີ້, ຍັງໄດ້ມີງານລ້ຽງສັງສັນ ແລະຮ່ວມພາເຂົ້າສະມັກຄີຕື່ມອີກ.
Cr: ສື່ມວນຊົນລະຄອນເພັງ
