ກອງປະຊຸມສະຫຼຸບການຈັດຕັ້ງປະຕິບັດວາລະແຫ່ງຊາດວ່າດ້ວຍການແກ້ໄຂບັນຫາຢາເສບຕິດໄລຍະປີ ( 2021-2023) ຢູ່ເມືອງລະຄອນເພັງ ໄດ້ຈັດຂຶ້ນໃນວັນທີ 26 ກັນຍາ 2023 ນີ້ທີ່ສະໂມສອນໃຫຍ່ຂອງເມືອງ ໂດຍການເປັນປະທານຂອງທ່ານ ທອງດີ ຈັນທະວົງ ກໍາມະການພັກແຂວງ ເລຂາພັກເມືອງ ເຈົ້າເມືອງລະຄອນເພັງ ໃຫ້ກຽດເຂົ້າຮ່ວມ ຂອງທ່ານ ພົ.ວ ພູວັນ ພິມມະຈັນ ຄະນະປະຈໍາພັກແຂວງ, ຫົວໜ້າກອງບັນຊາການທະຫານແຂວງ ຮອງປະທານປ້ອງກັນ ຊາດ-ປ້ອງກັນຄວາມສະຫງົບແຂວງສາລະວັນ, ທ່ານ ຈັນສະໝອນ ພົມມະແສງ ຄະນະປະຈໍາພັກແຂວງ ຫົວໜ້າໂຄສະ ນາອົບຮົມແຂວງ ຜູ້ຊີ້ນໍາຮອບດ້ານເມືອງລະຄອນເພັງ, ມີຄະນະປະຈໍາພັກເມືອງ, ກໍາມະການພັກເມືອງເມືອງ, ພະແນກ ການຂັ້ນແຂວງ, ຫົວໜ້າ-ຮອງຫ້ອງການ, ເລຂາໜ່ວຍພັກ-ນາຍນາຍບ້ານທົ່ວເມືອງ ແລະແຂກຖືກເຊີນເຂົ້າຮ່ວມ.
ທ່ານ ພັທ ຈັນທະລິນ ໂພທິເສນ ຫົວໜ້າກອງບັນຊາການ ປກສ ເມືອງໄດ້ລາຍງານຕໍ່ກອງປະຊຸມໃຫ້ຮູ້ວ່າ: ການຈັດຕັ້ງປະຕິບັດວາລະແຫ່ງຊາດວ່າດ້ວຍການແກ້ໄຂບັນຫາຢາເສບຕິດ ຢູ່ເມືອງລະຄອນເພັງ ( 2021-2023) ໂດຍພາຍຫຼັງສະພາແຫ່ງຊາດໄດ້ຮັບຮອງເອົາ ການແກ້ໄຂບັນຫາຢາເສບຕິດເປັນວາລະແຫ່ງຊາດ. ຄະນະພັກ-ອົງການປົກຄອງເມືອງ ແຕ່ງຕັ້ງຄະນະຮັບຜິດຊອບຂັ້ນຕ່າງໆ ນັບແຕ່ເມືອງລົງຮອດຂັ້ນບ້ານນໍາພາ-ຊີ້ນໍາຈັດຕັ້ງຜັນຂະຫຍາຍ, ພ້ອມທັງສ້າງເປັນແຜນງານ-ໂຄງການລະອຽດ ໂດຍເລັງໃສ່ 3 ໄລຍະ 5 ບາດກ້າວ ແລະ 6 ວຽກຈຸດສຸມຄື: ສຸມໃສ່ສ້າງຄວາມຮັບຮູ້ທົ່ວສັງຄົມດ້ວຍການສຶກສາອົບຮົມ ເຜີຍແຜ່ລະບຽບກົດໝາຍ ແລະຜົນຮ້າຍຂອງຢາເສບຕິດ; ສຸມໃສ່ຄົ້ນຄ້ວາສ້າງ ແລະປັບປຸງນິຕິກຳລຸ່ມກົດໝາຍ ທີ່ກ່ຽວຂ້ອງກັບບັນຫາຢາເສບຕິດ; ສຸມໃສ່ປັບປຸງກົງຈັກການຈັດຕັ້ງ ແລະຍົກລະດັບຄວາມສາມາດຂອງເຈົ້າໜ້າທີ່ວິຊາສະເພາະ, ອົງການສືບສວນສອບສວນ ແລະພາກສ່ວນທີ່ກ່ຽວຂ້ອງ; ສຸມໃສ່ຍົກສູງປະສິດ ທິພາບໃນການຄຸ້ມຄອງ, ຊີ້ນຳ-ບັນຊາຮອບດ້ານໃນການແກ້ໄຂບັນຫາຢາເສບຕິດ ແລະປະກົດການຫຍໍ້ທໍ້; ປັບປຸງຂີດຄວາມສາມາດຂອງລະບົບການເມືອງ (ຂັ້ນເມືອງ-ຂັ້ນບ້ານ) ແລະສຸມໃສ່ການພົວພັນຮ່ວມມືກັບປະເທດເພື່ອນບ້ານໃນການຄຸ້ມຄອງ ແລະແກ້ໄຂບັນຫາຢາເສບຕິດ.
ຜ່ານການຈັດຕັ້ງປະຕິບັດຕົວຈິງ ໃນໄລຍະ 2 ປີ ໄດ້ເຄື່ອນໄຫວເຜີຍແຜ່ເຊື່ອມຊືມຄໍາສັ່ງ, ລະບຽບການ, ກົດໝາຍ ແລະຜົນຮ້າຍຢາເສບຕິດ ໃຫ້ອໍານາດການປົກຄອງ ແລະພໍ່ແມ່ປະຊາຊົນໄດ້ທັງໝົດ 92 ຄັ້ງ, ມີຜູ້ເຂົ້າຮ່ວມເຊື່ອມ ຊືມ 21.835 ຄົນ, ຍິງ 9.246 ຄົນ, ສຶກສາອົບຮົມເປົ້າໝາຍພົວພັນຢາເສບຕິດໄດ້ 2.359 ຄົນ, ຍິງ 36 ຄົນ ( ຜູ້ເສບ 2.178 ຄົນ, ຍິງ 20 ຄົນ ແລະຜູ້ຂາຍ 181 ຄົນ, ຍິງ 16 ຄົນ) ກວມເອົາ 100% ຂອງເປົ້າໝາຍ. ຜ່ານການປະເມີນຜົນໃນຮອບ 3 ບາດກ້າວທີ 5 ມີເປົ້າໝາຍຂາຍຢາເສບຕິດ ຖືກດໍາເນີນຄະດີ ແລະຢຸດເຊົາ 120 ຄົນ, ຍິງ 12 ຄົນ, ເທົ່າກັບ 66% ຂອງເປົ້າໝາຍ; ເປົ້າໝາຍເສບຢຸດເຊົາ 811 ຄົນ, ເທົ່າກັບ 37%, ສົງໄປບໍາບັດມີ 42 ຄົນ, ເທົ່າກັບ 2%, ໄປເຮັດວຽກຕ່າງປະເທດ, ຕ່າງແຂວງ 890 ຄົນ ເທົ່າກັບ 41%; ມາງຄະດີຢາເສບຕິດໄດ້ 56 ເລືອງ, ກັກຕົວຜູ້ຖືກຫາໄດ້ 74 ຄົນ, ຢຶດຢາບ້າໄດ້ 49 ມັດ, 13 ຖົງນ້ອຍ ກັບ 2898 ເມັດ, ເຮໂຣອີນ 8 ແພັກ ແລະອື່ນໆ…
ຈາກນັ້ນ, ກອງປະຊຸມຍັງໄດ້ຮັບຟັງການປະກອບຄໍາເຫັນ ຂອງທ່ານ ຈັນສະໝອນ ພົມມະແສງ ຄະນະປະຈໍາພັກແຂວງ ຫົວໜ້າໂຄສະ ນາອົບຮົມແຂວງ ຜູ້ຊີ້ນໍາຮອບດ້ານເມືອງລະຄອນເພັງ, ຮັບຟັງການໂອ້ລົມ ຂອງທ່ານ ພົ.ວ ພູວັນ ພິມມະຈັນ ຄະນະປະຈໍາພັກແຂວງ, ຫົວໜ້າກອງບັນຊາການທະຫານແຂວງ ຮອງປະທານປ້ອງກັນຊາດ-ປ້ອງກັນຄວາມສະຫງົບແຂວງສາລະວັນ ແລະໃນໂອກາດກອງປະຄັ້ງນີ້; ຍັງໄດ້ມອບໃບຍອ້ງຍໍ ໃຫ້ບຸກຄົນ ແລະການຈັດຕັ້ງ ທີ່ມີຜົນງານດີເດັ່ນປະກອບສ່ວນຈັດຕັ້ງປະຕິບັດວາລະແຫ່ງຊາດແກ້ໄຂບັນຫາຢາເສບຕິດ (2021-2023) ຕື່ມອີກ.
