ໃນຕອນເຊົ້າວັນທີ 12 ພະຈິກ 2020 ທີ່ສະໂມສອນເມືອງລະຄອນເພັງໂດຍການເປັນປະທານຂອງທ່ານ ແກ້ວຜາ ສີລາດວງໃຈ ຮອງເລຂາພັກເມືອງຜູ້ຊີ້ນຳຂົງເຂດວຽກງານການເມືອງ ແນວຄິດ, ວຽກພັກ-ພະນັກງານ ມີຄະນະປະຈຳພັກເມືອງ, ກຳມະການພັກເມືອງ, ຫົວໜ້າຫ້ອງການ, ຮອງຫ້ອງການ, ພະນັກງານລັດຖະກອນ, ພ້ອມດ້ວຍນ້ອງນ້ອຍນັກຮຽນເຂົ້າຮ່ວມຮັບຟັງ
ຕາມວາລະ ທ່ານ ຄຳມະນີ ພຸດທະເກສອນ ຮອງຫົວໜ້າຫ້ອງການແຮງງານ ແລະ ສະຫວັດດີການສັງຄົມເມືອງ ໄດ້ຜ່ານເອກະສານດຳລັດຂອງນາຍົກລັດຖະມົນຕີ ສະບັບເລກທີ 238/ນຍ, ນະຄອນຫຼວງວຽງຈັນ ລົງວັນທີ 18 ພຶດສະພາ 2020 ວ່າດ້ວຍການຈັດຕັ້ງ ແລະ ການເຄື່ອນໄຫວຂອງຄະນະກຳມະການຄຸ້ມຄອງໄພພິບັດເຊິ່ງປະກອບມີ 5 ໝວດໃຫຍ່ 13 ມາດຕາ ເຊິ່ງໃຫ້ຮູ້ເຖິງທີ່ຕັ້ງ, ພາລະບົດບາດ, ໜ້າທີ່ ແລະ ຂອບເຂດສິດຂອງຄະນະກຳມະການຄຸ້ມຄອງໄພພິບັດໃນແຕ່ລະຂັ້ນເຊິ່ງປະກອບດ້ວຍ: ຄະນະກຳມະການຄຸ້ມຄອງໄພພິບັດຂັ້ນສູນກາງ, ຂັ້ນແຂວງ, ຂັ້ນເມືອງ, ຂັ້ນບ້ານ ແລະ ຫຼັກການແບບແຜນວິທີເຮັດວຽກຂອງຄະນະກຳມະການຄຸ້ມຄອງໄພພິບັດໃນແຕ່ລະຂັ້ນ.
ຖັດຈາກນັ້ນ ທ່ານ ຄຳພອນ ບຸນສະຫວັດ ກຳມະການພັກເມືອງຫົວໜ້າຫ້ອງການພາຍໃນເມືອງຂຶ້ນຜ່ານເອກະສານດຳລັດສະບັບເລກທີ 207/ລບ, ລົງວັນທີ 20 ມີນາ 2020 ວ່າດ້ວຍວຽກງານຊົນເຜົ່າເຊິ່ງປະກອບມີ 6 ໝວດ 36 ມາດຕາ.
ຫຼັງຈາກນັນ ທ່ານ ໜູໄຊ ຈັນດາວົງ ຮອງເລຂາພັກປະທານກວດກາພັກ-ລັດເມືອງ ໄດ້ຜ່ານເອກະສານ ວັນຄ້າຍເກີດທ່ານ ຟຣິດຣິກ ອັງແກນ 28 ພະຈິກ 1820 ຄົບຮອບ 200 ປີ ເພິ່ນໄດ້ຍົກໃຫ້ເຫັນເຖິງປະຫວັດການເຄື່ອນໄຫວແລະ ຜົນງານຄຸນງາມຄວາມດີ ເຊິ່ງ ຟ.ອັງແກນ ໃນປີ 1841 ເພິ່ນໄດ້ປະຕິບັດພັນທະການທະຫານຢູ່ໃນກອງພົນທະຫານປືນໃຫຍ່ເປັນເວລາປີເຄິ່ງເພິ່ນໄດ້ສຶກສາກ່ຽວກັບກອງທະຫານ ແລະຍຸດທະສາດການສູ້ຮົບເຊິ່ງມາໃນປີ 1848 ຂະບວນການປະຕິວັດໄດ້ລະເບີດຂຶ້ນຢູ່ຝຣັ່ງແລ້ວແຜ່ລາມໄປປະເທດອື່ນຢູ່ເອີລົບ ຟ. ອັງແກນໄດ້ເຂົ້າຮ່ວມການປະຕິບັດສະຖານະການຢ່າງຈົດຈໍ່ພ້ອມທັງໄດ້ຂຽນບົດຄວາມລົງໜັງສືພິມເພື່ອຊົມເຊີຍການປະຕິວັດຝຣັ່ງ, ໃນຄະນະດຽວກັນນັ້ນ ກ.ມາກ ໄດ້ຮັບເລືອກຕັ້ງເປັນຜູ້ນຳຂອງສະຫະພັນຊາວກະສິກອນ ສ່ວນ ຟ. ອັງແກນ ກໍ່ໄດ້ເຂົ້າຮ່ວມຢູ່ໃນຄະນະບໍລິຫານສູນກາງ,
ອັງແກນແມ່ນນັກແນວຄິດທີ່ຍິ່ງໃຫຍ່ຂອງຊົນຂັ້ນກຳມະກອນ, ແມ່ນນັກປັດຊະຍາ, ນັກເສດຖະສາດ,ນັກການເມືອງທີ່ຍິ່ງໃຫຍ່ຂອງຄົນເຢຍລະມັນເພິ່ນເຮັດທຸກສິ່ງທຸກຢ່າງເພື່ອຜົນປະໂຫຍດຂອງຂະບວນການກຳມະກອນສາກົນ ແລະ ເປັນຜູ້ສືບຕໍ່ຂຽນຍົດປຶ້ມຕ່າງໆ ທີ່ ມາກ ຂຽນບໍ່ທັນສຳເລັດ, ອັງແກນ ແລະ ມາກ ໄດ້ເກີດຂຶ້ນຮ້ອຍກວ່າປີ ມັນໄດ້ສ່ອງແສງໃຫ້ເຫັນສິ່ງທີ່ຖືກຕ້ອງໃນສັງຄົມການເຕີບໃຫຍ່ຂະຫຍາຍຕົວໃນຂະບວນການຕໍ່ສູ້ຊົນຊັ້ນ.
ໃນຕອນທ້າຍ ທ່ານ ແກ້ວຜາ ສີລາດວງ ຮອງເລຂາພັກ ຜູ້ຊີ້ນຳຂົງເຂດວຽກງານການເມືອງແນວຄິດ ວຽກພັກ-ພະນັກງານ ໄດ້ເລົ່າເຖິງປະຫວັດວັນມະຫາປະຕິວັດເດືອນຕຸລາລັດເຊຍໂດຍຍົກໃຫ້ເຫັນການກຳເນີດການປະຕິວັດເດືອນຕຸລາລັດເຊຍ ແມ່ນເກີດຂຶ້ນໃນປີ 1917 ບໍ່ແມ່ນເຫດການທີ່ເກີດຂຶ້ນແບບບັງເອີນແຕ່ແມ່ນກົດເກນທີ່ຕ້ອງເປັນໄປຂອງສັງຄົມມະນຸດຍ້ອນວ່າລັດເຊຍໃນຊຸມປີຕົ້ນສະຕະວັດທີ 20 ເປັນປະເທດທຶນນິຍົມທີ່ຂະຫຍາຍຕົວຊ້າ, ແຕ່ຊົນຊັ້ນນາຍທຶນຊໍ້າພັດກົດຂີ່ຂູດຮີດກຳມະກອນ ແລະປະຊາຊົນຜູ້ອອກແຮງງານຢ່າງໜັກໜ່ວງ ທ່ານ ເລນິນ ແລະ ພັກໂບນເຊວິກກໍ່ໄດ້ສຶກສາປຸກລະດົມ ຊົນຂັ້ນກຳມະກອນປະຊາຊົນຜູ້ອອກແຮງງານລຸກຮື້ຂຶ້ນເຮັດການປະຕິວັດ, ການປະຕິວັດເດືອນຕຸລາລັດເຊຍໄດ້ມີຄວາມໝາຍຄວາມສຳຄັນໃຫຍ່ຫຼວງໃນປະຫວັດສາດມັນເປັນການໄຂສັງກາດໃໝ່ໃຫ້ແກ່ມວນມະນຸດໃນການຂ້າມຜ່ານສູ່ລະບອບໃໝ່ລະບອບສັງຄົມນິຍົມ ນອກນັ້ນເພິ່ນຍັງຍົກໃຫ້ເຫັນເຖິງ ການຊ່ວຍເຫຼືອຂອງສະຫະພາບໂຊວຽດຕໍ່ລາວ ແລະ ຄວາມຮັບຮູ້ທີ່ຖືກຕ້ອງຕໍ່ການປະຕິວັດເດືອນຕຸລາລັດເຊຍໃນເງື່ອນໄຂໃໝ່.

ຂ່າວ:ຈັນດາວອນ ສີນາມົນຕີ ຫ້ອງການ ຖວທ ເມືອງລະຄອນເພັງ.

Loading...