ພິທີສະເຫຼີມສະຫຼອງວັນຄູແຫ່ງຊາດ 7 ຕຸລາ ຄົບຮອບ 28 ປີຢູ່ເມືອງລະຄອນເພັງ ແຂວງສາລະວັນ ໄດ້ຈັດຂຶ້ນດ້ວຍບັນຍາກາດເບີກບານ ແລະຍິ້ມແຍ້ມແຈມໃສ ໃນວັນທີ 7 ຕຸລາ 2022 ທີ່ສະໂມສອນຂອງໂຮງຮຽນ ມສ ລະຄອນສີ ໂດຍເປັນກຽດເຂົ້າຮ່ວມຂອງທ່ານ ໄຊຊະນະ ສີສະຫວັດ ຮອງເຈົ້າເມືອງລະຄອນເພັງ ຜູ້ຊີ້ນໍາຂົງເຂດວັດທະນະທໍາ-ສັງຄົມ, ທ່ານ ກັນຍາ ໄຊຍະໂອຊະ ຫົວໜ້າຫ້ອງການສຶກສາທິການເມືອງ, ພ້ອມດ້ວຍຜູ້ບໍລິຫານການສຶກສາທົ່ວເມືອງ, ສະມາຄົມອຸດໜູນການສຶກສາ, ແຂກອ້ອມຂ້າງເມືອງ, ຄູ ແລະນັກຮຽນໂຮງຮຽນມສລະຄອນສີເຂົ້າຮ່ວມ.
ພິທີໄດ້ເລີ່ມຕົ້ນດ້ວຍການຊົມການສະແດງສິລະປະບົດຟ້ອນອວຍພອນຄູ, ຮັບຟັງສານອວຍພອນຄູຂອງນ້ອງນັກ ຮຽນ, ຮັບຟັງການສະແດງຄວາມຮູ້ສຶກຂອງຄູ, ປະກາດ ແລະມອບໃບຍ້ອງຍໍໃຫ້ຄູ ແລະບຸກຄະລາກອນການສຶກສາ ຜູ້ທີ່ມີຜົນງານດີເດັນ, ມອບລາງວັນໃຫ້ຄູ ແລະນັກຮຽນ ຜູ້ສອນດີ-ຮຽນເກັງ ໂດຍມີຜູ້ໄດ້ຮັບການຍ້ອງຍໍທັງໝົດ 188 ທ່ານ, ຍ້ອງຍໍຂັ້ນກະຊວງສຶກສາທິການ ແລະກິລາ 11 ທ່ານ, ຍ້ອງຍໍຂັ້ນພະແນກສຶກສາທິການ ແລະກິລາ 51 ທ່ານ, ຍ້ອງຍໍຂັ້ນເຈົ້າເມືອງ 62 ທ່ານ, ຍ້ອງຍໍຂັ້ນຫ້ອງການສຶກສາທິການ ແລະກິລາເມືອງ 64 ທ່ານ, ຄູໄດ້ຮັບລາງສອນດີ 3 ທ່ານ ແລະນັກຮຽນໄດ້ຮັບລາງວັນຮຽນເກັງ 3 ທ່ານ.
ໃນໂອກາດໂອ້ລົມຕໍ່ພິທີ ທ່ານ ໄຊຊະນະ ສີສະຫວັດ ຮອງເຈົ້າເມືອງລະຄອນເພັງ ໄດ້ຍົກໃຫ້ເຫັນຄວາມສໍາຄັນຂອງວັນຄູແຫ່ງຊາດ 7 ຕຸລາ, ຄວາມສໍາຄັນ ແລະບົດຂອງຄູ ຕໍ່ກັບການສ້າງຊັບພະຍາກອນມະນຸດ ກໍຄືການພັດ ທະນາປະເທດຊາດ ດ້ວຍເຫດນີ້ຄູຈິງໄດ້ຮັບການຂະໜານນາມວ່າ: “ຄູແມ່ນຄົນຂອງພັກ, ຄູແມ່ນວິສາວະກອນແຫ່ງດວງວິນຍານ, ຄູແມ່ນແມ່ພິມຂອງຊາດ, ຄູຄືພໍ່ແມ່ຜູ້ທີສອງຂອງເດັກ, ຄູແມ່ນຜູ້ມີຄວາມຮູ້ ແລະປະສົມການທີ່ສາມາດຖ່າຍທອດໃຫ້ຜູ້ອື່ນ, ຄູຄືຜູ້ນໍາແຫ່ງການປ່ຽນແປງໃໝ ແລະອື່ນໆ”… ຍ້ອນເຫັນໄດ້ບົດບາດ ແລະຄວາມສໍາຄັນຂອງຄູ ພັກ ແລະລັດຖະບານເຮົາ ຈິ່ງຕົກລົງກໍານົດວັນທີ 7 ຕຸລາ ເຊິ່ງເປັນ ວັນເຂົ້າຮັບລາຊະການຂອງນາຍຄູຄໍາ ຄູລາວຄົນທໍາອິດ ເປັນຄູແຫ່ງຊາດ ເພື່ອໃຫ້ນັກຮຽນ, ນັກສຶກສາ, ພະນັກ ງານ, ທະຫານ, ຕໍາຫຼວດ ກໍຄືທຸກຊັ້ນຄົນ ແລະທຸກອາຊີບ ໄດ້ສະແດງອອກເຖິງຄວາມກະຕັນຍູ ຮູ້ບຸນຄຸນ ຕໍ່ຄູອາຈານ ຜູ້ທີ່ເຄີຍສິດສອນໃຫ້ຄວາມຮູ້ແກ່ຕົນ.
Cr: ສື່ມວນຊົນລະຄອນເພັງ
