ວິທະຍຸກະຈາຍສຽງແຫ່ງຊາດລາວ

Lao National Radio

ຕັ້ງໜ້າຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XI ຂອງພັກ ເຂົ້າສູ່ຊີວິດຈິງ
ເມືອງວັງວຽງ ແຂວງວຽງຈັນ ກຽມຄວາມພ້ອມຫລາຍດ້ານ ຕ້ອນຮັບປີທ່ອງທ່ຽວລາວ 2024 ທີ່ຈະມາເຖິງ ເປັນຕົ້ນການປັບປຸງ ແລະ ຟື້ນຟູສະຖານທີ່ທ່ອງທ່ຽວ, ການບໍລິກາອາຫານ,ເຮືອນພັກ-ໂຮງແຮມ ແລະ ສິ່ງອຳນວຍຄວາມສະດວກອື່ນໆ ເພື່ອຮອງຮັບນັກທ່ອງທ່ຽວ ທັງພາຍໃນ ແລະ ຕ່າງປະເທດ ທີ່ຈະເດີນທາງມາທ່ອງທ່ຽວພາຍໃນເມືອງວັງວຽງ.
ທ່ານ ອັດສະຍາໄສ ມະນີວັນ ຫົວໜ້າຫ້ອງການຖະແຫຼງຂ່າວ ວັດທະນະທໍາ ແລະ ທ່ອງທ່ຽວ ເມືອງວັງວຽງໄດ້ໃຫ້ສຳພາດຕໍ່ທີມງານຂ່າວ ໃນວັນທີ 22 ທັນວາ 2023 ກ່ຽວກັບການມີສ່ວນຮ່ວມສ້າງຂະບວນການຕ້ອນຮັບປີທ່ອງທ່ຽວລາວ 2024 ນີ້ວ່າ: ຫ້ອງການ ຖວທ ເມືອງວັງວຽງ ໄດ້ເປັນເຈົ້າການໂດຍຖືເອົາການແຂ່ງຂັນປະຕິບັດວຽກງານວິຊາສະເພາະ, ຄຽງຄູ່ກັບການໂຄສະນາແນວທາງຂອງພັກ, ນະໂຍບາຍຂອງລັດ, ເກັບກໍາການເຄື່ອນໄຫວຂອງພາກສ່ວນຕ່າງໆຢູ່ພາຍໃນເມືອງ ເພື່ອຂຽນຂ່າວ, ອອກຂ່າວໃຫ້ສັງຄົມ, ພໍ່ແມ່ປະຊາຊົນຊັ້ນຄົນຮັບຮູ້ຂໍ້ມູນຂ່າວສານສຳຄັນຕ່າງໆ, ສົມທົບກັບກໍາລັງປ້ອງກັນຄວາມສະຫງົບເມືອງ ແລະ ພາກສ່ວນກ່ຽວຂ້ອງເພື່ອຈັນສັນຄວາມເປັນລະບຽບຮຽບຮ້ອຍຄວາມສະອາດຈົບງາມພາຍໃນເມືອງ,ສືບຕໍ່ແຜນຈັດສັນທາງຂຶ້ນທາງລ່ອງເພື່ອເຮັດໃຫ້ການສັນຈອນ ແລະ ການເຂົ້າອອກຂອງລົດນັກທ່ອງທ່ຽວໃຫ້ມີຄວາມສະດວກສະບາຍ, ຫຼຸດຜ່ອນຄວາມແອອັດພາຍໃນຕົວເມືອງ. ໄດ້ຈັດສັນລົດນໍາສົ່ງນັກທ່ອງທ່ຽວຢູ່ຕາມສະຖານນີລົດໄຟ ເພື່ອບໍລິການຮັບສົ່ງນັກທ່ອງທ່ຽວໄປສູ່ຈຸດໝາຍປາຍທາງຂອງການທ່ອງທ່ຽວ ປະຈຸບັນມີບໍລິສັດທ່ອງທ່ຽວ 24 ບໍລິສັດ ແລະ 3 ສາຂາບໍລິສັດ, ມີລົດນໍາທ່ຽວປະເພດລົດບັດ, ລົດຕູ້, ລົດກະບະຕິດຫຼັງຄາ ຈຳນວນ 200 ກວ່າຄັນ; ນອກນັ້ນຍັງມີປະເພດລົດບັກກີ່, ລົດຈັກ, ລົດຖີ, ເຮຶອນໍາທ່ຽວ, ເຮືອແພ, ເຮືອກາຍັກ, ເຮືອຈັກຫ່າງຍາວ, ກົງເບັງ, ມີພາລາມໍເຕີ ແລະ ບັນລູມ ໄວ້ບໍລິການນັກທ່ອງທ່ຽວຢ່າງພຽງພໍ. ຕິດຕາມການບໍລິການຂອງບັນດາຮ້ານອາຫານ, ຮ້ານບັນເທີງ, ເຮືອນພັກ, ສະຖານທີ່ທ່ອງທ່ຽວ ໃຫ້ດໍາເນີນທຸລະກິດພາຍໃຕ້ລະບຽບກົດໝາຍ, ຄວບຄຸມ, ຈໍາກັດ ແລະ ແກ້ໄຂປະກົດການຫຍໍ້ທໍ້ໃນຂະແໜງການທ່ອງທ່ຽວ; ສົ່ງເສີມຜູ້ປະກອບການປັບປຸງຂອດບໍລິການ ໃຫ້ມີຄວາມວ່ອງໄວ, ສະອາດ, ລາຄາໃຊ້ບໍລິການທີ່ສົມເຫດສົມຜົນບໍ່ເອົາປຽບລູກຄ້າ ແນະນໍາຫົວໜ່ວຍທຸລະກິດໃຫ້ມີຄວາມສາມັກຄີ, ຄ້າຂາຍຮ່ວມກັນແບບມີສ່ວນຮ່ວມ ແລະ ກະຈາຍລາຍໄດ້ ເຊິ່ງກັນ ແລະ ກັນ; ຄຸ້ມຄອງເວລາເປີດ, ປິດບໍ່ໃຫ້ກາຍໂມງເວລາ; ສືບຕໍ່ຕິດປ້າຍລະບຸຂໍ້ຫ້າມບັນດາຮ້ານອາຫານ, ຮ້ານກິນດື່ມໃຫ້ທົ່ວເຖິງ; ສົ່ງເສີມປະຊາຊົນບັນດາເຜົ່າຊາວເມືອງ ອະນຸລັກຮັກສາວັດທະນະທໍາຮີດຄອງປະເພນີຂອງຊາດ, ຂອງທ້ອງຖິ່ນ, ສົ່ງເສີມວັດທະນະທໍາຮີດຄອງປະເພນີທີ່ຕັ້ງໜ້າ, ປະດິດສ້າງ, ຄ່ອຍໆປະປ່ອຍຮີດຄອງປະເພນີລັກສະນະງົມງວາຍທີ່ກົດໜ່ວງຖ່ວງດຶງ ແລະ ອື່ນໆ.
ເພື່ອເປັນການຕ້ອນຮັບການທ່ອງທ່ຽວໃຫ້ມີຄວາມຄຶກຄື້ນ ຫ້ອງການຖະເເຫຼງຂ່າວ, ວັດທະນະທໍາ ເເລະ ທ່ອງທ່ຽວ ກໍ່ໄດ້ເອົາໃຈໃສ່ເປັນເຈົ້າການ ປະສານສົມທົບກັບບັນດາຂະເເໜງການທີ່ກ່ຽວຂ້ອງ ພາກລັດ,ພາກທຸລະກິດ ໄດ້ກຳໜົດແຜນຈັດຕັ້ງປະຕິບັດກິດຈະກຳຕິດພັນກັບແຜນການເຄື່ອນໄຫວຂອງແຂວງ ແລະ ແຜນກິດຈະກຳຂອງຂັ້ນສູນກາງຄື: ຂັ້ນສູນກາງກຳນົດມີ 14 ກິດຈະກຳ, ຂັ້ນແຂວງມີ 6 ກິດຈະກຳ ແລະ ເມືອງວັງວຽງມີ 8 ກິດຈະກຳຄື: 1. ບຸນກິນຈຽງ, ບຸນເກີຣ ຈະຈັດຂຶ້ນລະຫວ່າງ ເດືອນ ມັງກອນ 2024; 2. ກິດຈະກຳ ງານກິລາມາລາທອນວັງວຽງເທຣວຈະຈັດຂຶ້ນລະຫວ່າງເດືອນກຸມພາ 2024;3. ງານແຫ່ນາງ ສັງຂານ ປີໃໝ່ລາວຈະຈັດຂຶ້ນລະຫວ່າງ ເດືອນເມສາ2024; 4. ກິດຈະກຳບຸນບັ້ງໄຟຈະຈັດຂຶ້ນລະຫວ່າງມີຖຸນາ 2024; 5.ງານແຫ່ທຽນພັນສາ ຈັດຂຶ້ນລະຫວ່າງ ເດືອນສິງຫາ2024; 6. ງານກິລາແລ່ນວິບາກວັງວຽງ ເອັກສະເຣດ ຈັດຂຶ້ນລະຫວ່າງ ເດືອນ ສິງຫາ 2024; 7. ງານເທດສະການໝາກກ້ຽງຫວານ ຈະຈັດຂຶ້ນລະຫວ່າງ ເດືອນພະຈິກ-ເດືອນທັນວາ2024; 8. ງານເທດສະການຄອນເສີດວັງວຽງເຟຣດຕີໂບ ຈັດຂຶ້ນລະຫວ່າງເດືອນພະຈິກ-ເດືອນທັນວາ2024 ທັງໝົດນີ້ ແມ່ນບາງເນື້ອໃນຈິດໃຈຂອງການກະກຽມຄວາມພ້ອມຂອງເມືອງວັງວຽງໃນການເປີດປີທ່ອງທ່ຽວລາວ2024ແລະ ເພື່ອເປັນສ້າງຂະບວນການໃຫ້ຟົດຟື້ນ ໃນຂອບເຂດທົ່ວປະເທດ ແລະ ພາຍໃນເເຂວງ ຕະຫຼອດຮອດຂັ້ນເມືອງ ຕາມສະພາບທ່າເເຮງຂອງການທ່ອງທ່ຽວຂອງຕົນ.
ປະຈຸບັນທົ່ວເມືອງມີໂຮງແຮມ 43 ແຫ່ງ, ເຮືອນພັກ 117 ແຫ່ງ, ຣີສອດ 18 ແຫ່ງ, ວີນລາ 6 ແຫ່ງ, ບັງກາໂລ 12 ແຫ່ງ, ລວມສະຖານທີ່ພັກແຮມ 196 ແຫ່ງ, ມີຕຽງນອນທັງໝົດ 6.672 ຕຽງ, ສາມາດບໍລິການຕ້ອນຮັບນັກທ່ອງທ່ຽວທີ່ມາພັກເຊົາໄດ້ເຖິງ 13.344 ຄົນຕໍ່ວັນ ໃນນັ້ນມີລະດັບໂຮງແຮມ 5 ດາວ 1 ຫົວໜ່ວຍ, 4 ດາວ 1 ຫົວໜ່ວຍ, 2 ດາວ 1 ຫົວໜ່ວຍ ແລະ ລາງວັນມາດຕະຖານໂຮງແຮມຂຽວອາຊຽນ 6 ຫົວໜ່ວຍ, ລາງວັນມາດຕະຖານເຮືອນພັກແຮມປະຊາຊນ 1 ຫົວໜ່ວຍ, ມີຮ້ານອາຫານ, ຮ້ານກິນດື່ມ 160 ຫົວໜ່ວຍ ແລະ ທົ່ວເມືອງວັງວຽງ ມີສະຖານທີ່ທ່ອງທ່ຽວທີ່ໄດ້ຂຶ້ນບັນຊີແລ້ວທັງໝົດ 37ແຫ່ງ ໃນນີ້ເປັນຖ້ຳ 24 ແຫ່ງ, ຈຸດຊົມວີວ 6 ແຫ່ງ, ນ້ຳຕົກຕາດ 6 ແຫ່ງ ແລະ ອ່າງນ້ຳທຳມະຊາດ 1 ແຫ່ງ, ນອກນີ້ຍັງມີບັນດາກິດຈະກຳການທ່ອງທ່ຽວຄື: ກຸ່ມບໍລິການເຮືອກາຍັກ, ກຸ່ມບໍລິການກົງເບັງ, ກຸ່ມບໍລິການເຮືອຈັກຫາງຍາວ, ບໍລິການຂີ່ສະລິງ, ບໍລິການປີນຜາ, ກິດຈະກຳທ່ອງທ່ຽວທາງອາກາດປະກອບມີ ຂີ່ບາລູນ, ຂີ່ພາລາມໍເຕີອັນທີ່ໂດດເດັ່ນເປັນທີ່ນິຍົມຂອງນັກທ່ອງທ່ຽວ. ພ້ອມນີ້ໄດ້ປະສານສົມທົບກັບອົງການປົກຄອງບ້ານ, ຜູ້ປະກອບການສະຖານທີທ່ອງທ່ຽວ ປັບປຸງເສັ້ນທາງເຂົ້າເຖິງ, ປ້າຍຊີ້ບອກ, ຂໍ້ມູນແຫຼ່ງທ່ອງທ່ຽວ, ຫ້ອງນ້ຳສະອາດ, ຮ້ານສະດວກຊື້, ຮ້ານອາຫານໃຫ້ເປັນທີ່ປະທັບໃຈ ແລະ ໄດ້ມາດຕະຖານ. ປະຈຸບັນ ສາມາດປະເມີນ ແລະ ຮັບຮອງເປັນແຫຼ່ງທ່ອງທ່ຽວປະຊາຊົນມີສ່ວນຮ່ວມຕາມມາດຕະຖານອາຊຽນ 1 ແຫ່ງ, ລາງວັນການພັດທະນາແຫຼ່ງທ່ອງທ່ຽວດີເດັ່ນຍືນຍົງ 3 ແຫ່ງ, ລາງວັນຮ້ານອາຫານສະອາດປອດໄພ 3 ແຫ່ງ, ຫ້ອງນໍ້າສາທາລະນະສະອາດອາຊຽນ 1 ແຫ່ງ.
ທ່ານ ອັດສະຍາໄສ ມະນີວັນ ຫົວໜ້າຫ້ອງການ ຖວທເມືອງວັງວຽງ ຍັງໃຫ້ຮູ້ອີກວ່າ: ວຽກງານຖະແຫລງຂ່າວ, ວັດທະນະທໍາ ແລະ ທ່ອງທ່ຽວ ເປັນປັດໄຈສໍາຄັນຍູ້ແຮງເສດຖະກິດຂອງຊາດ, ແກ້ໄຂວຽກເຮັດງານທໍາ ເປັນວຽກບູລິມະສິດໜຶ່ງຊຶ່ງພັກ ແລະ ລັດຖະບານ ເອົາໃຈໃສ່ຊີ້ນໍາຕິດຕາມໃກ້ສິດ, ໂຄສະນາ ແລະ ສົ່ງເສີມເລື້ອຍມາ ເພື່ອຂຸດຄົ້ນລາຍໄດ້ຈາກການທ່ອງທ່ຽວ ໄປພ້ອມວຽກສໍາຄັນອື່ນໆ ພັດທະນາເສດຖະກິດ-ສັງຄົມໃຫ້ກ້າວຂຶ້ນຕາມຈຸດໝາຍທີ່ວາງໄວ້; ວຽກງານທ່ອງທ່ຽວສາມາດສ້າງຊື່ສຽງໃຫ້ກັບປະເທດຊາດ, ເຮັດໃຫ້ພາກພື້ນ, ສາກົນ ຮັບຮູ້ ສປປ ລາວ ຫລາຍຂຶ້ນ, ປະເທດລາວມີຄວາມງາມຂອງສະຖານທີ່ທ່ອງທ່ຽວທໍາມະຊາດ, ປະຫວັດສາດ ແລະ ວັດທະນະທໍາ ຫລາຍແຫ່ງທີ່ມີຊື່ສຽງທີ່ບໍ່ໜ້ອຍໜ້າຊາດອື່ນ.
ຂ່າວ:ພາບ: ຂ່າວ ແຂວງວຽງຈັນ
May be an image of 11 people, people swimming and lake
No photo description available.
May be an image of 6 people and kayak
May be an image of 6 people and people climbing
May be an image of 2 people
May be an image of 2 people
May be an image of 8 people and kayak
May be an image of 3 people and kayak