ເນື່ອງໃນໂອກາດວັນປ່ອຍປາ ແລະ ສັດນ້ຳ ແຫ່ງຊາດ, ຫ້ອງການກະສິກຳ ແລະ ປ່າໄມ້ ເມືອງວຽງພູຄາ ໄດ້ປ່ອຍປາ ລົງສູ່ແຫລ່ງນ້ຳທຳມະຊາດ 10.000 ກວ່າໂຕ ໃນວັນທີ 12 ກໍລະກົດ 2024 ທີ່ວັງສະຫງວນ ບ້ານກໍາປອນ ເມືອງວຽງພູຄາ ໂດຍເຂົ້າຮ່ວມຂອງທ່ານ ພູມອນ ຄູນສີລິເຮືອງ ຮອງເຈົ້າເມືອງໆວຽງພູຄາ, ທ່ານ ບຸນມາ ພິລາວົງ ຫົວໜ້າຫ້ອງການກະສິກໍາ ແລະ ປ່າໄມ້ ເມືອງ ພ້ອມດ້ວຍຫ້ອງການອ້ອມຂ້າງເມືອງ, ອົງການຈັດຕັ້ງພາຍໃນບ້ານກໍາປອນເຂົ້າຮ່ວມ.
ທ່ານ ພູມອນ ຄູນສີລິເຮືອງ ໄດ້ກ່າວວ່າ: ການປ່ອຍປາ ຄັ້ງນີ້ ຕິດພັນກັບການສົ່ງເສີມການລ້ຽງ, ຄຸ້ມຄອງ, ປົກປັກຮັກສາ, ພັດທະນາ ແລະ ນໍາໃຊ້ ປາ-ສັດນໍ້າ ໃຫ້ມີການຂະຫຍາຍຕົວ ຕາມທິດສີຂຽວ ແລະ ຍືນຍົງ, ເຊິ່ງໄລຍະຜ່ານມາ ຫ້ອງການກະສິກຳ ແລະ ປ່າໄມ້ເມືອງ ກໍໄດ້ອອກແຈ້ງການ ເປັນເຈົ້າການ ເອົາໃຈໃສ່ໂຄສະນາເຜີຍແຜ່ ບັນດານະໂຍບາຍ, ກົດໝາຍ, ປູກຈິດສຳນຶກ ແລະ ອອກແຈ້ງການ ຜ່ານທາງລະບົບໂທລະໂຄງຂອງເມືອງ, ຂອງບ້ານ ໃຫ້ບັນດາພະນັກງານ, ທະຫານຕໍາຫລວດ, ພໍ່ແມ່ປະຊາຊົນ ໄດ້ຮັບຮູ້ຢ່າງທົ່ວເຖິງ ເພື່ອແນໃສ່ອະນຸລັກປົກປັກຮັກສາປາ, ສັດນໍ້າ ແລະ ສັດປ່າ ໃຫ້ເປັນຂະບວນກວ້າງຂວາງ ທົ່ວປວງຊົນຮັບຮູ້ ແລະ ເຂົ້າໃຈ ຕໍ່ກັບນະໂຍບາຍຂອງລັດ ແລະ ເຫັນໄດ້ເຖິງຄວາມໝາຍຄວາມສໍາຄັນຂອງປາ ແລະ ສັດນໍ້າ ຕໍ່ກັບການດຳລົງຊີວິດຂອງປະຊາຊົນບັນດາເຜົ່າ ທັງເປັນການປຸກລະດົມ ໃຫ້ທຸກພາກສ່ວນ ປະກອບສ່ວນເຂົ້າໃນການອະນຸລັກ, ປົກປັກຮັກສາ ແລະ ພັດທະນາ ປາ ແລະ ສັດນໍ້າ ຕາມກົດໝາຍ ແລະ ລະບຽບການກຳນົດ, ເປັນເຈົ້າການຈັດຕັ້ງ ການຄຸ້ມຄອງ ແລະ ປົກປັກຮັກສາ ເພື່ອໃຫ້ມີການສືບຕໍ່ຂະຫຍາຍພັນເພີ່ມຂຶ້ນ ແລະ ເພີ່ມຄວາມອຸດົມສົມບູນຂອງປາ ແລະ ສັດນໍ້າ ໃຫ້ຫລາຍຂຶ້ນ. ການປ່ອຍປາ ຄັ້ງນີ້ ປະກອບມີ: ປາເຄິງ, ປາໄນ ແລະ ປາຊະນິດອື່ນໆ 10.000 ກວ່າໂຕ ແລະ ທ່ານ ພູມອນ ຄູນສີລິເຮືອງ ຍັງຮຽກຮ້ອງໃຫ້ຫ້ອງການກ່ຽວຂ້ອງ ລົງຊຸກຍູ້ກະສິກອນ ແລະ ຜູ້ປະກອບການ ສືບຕໍ່ຂະຫຍາຍການລ້ຽງປາ ແລະ ສັດນໍ້າ ທຸກຮູບແບບ ເປັນຕົ້ນ ການລ້ຽງປາໃນໜອງ, ໃນນາເຂົ້າ ແລະ ຮູບແບບອື່ນໆ ພ້ອມທັງເອົາໃຈໃສ່ແນະນຳ ທາງດ້ານເຕັກນິກ-ວິຊາການ ດ້ານແນວພັນ, ການໃຫ້ອາຫານ, ບົວລະບັດຮັກສາ, ປ້ອງກັນພະຍາດ ໃຫ້ຖືກຕ້ອງຕາມຫລັກວິຊາການ ເພີ່ມຄວາມເຂັ້ມງວດ ໃນການປະຕິບັດມາດຕະການ ເກືອດຫ້າມການຫາປາແບບດັບສູນ ແລະ ຫ້າມບຸກຄົນ, ນິຕິບຸກຄົນ ແລະ ການຈັດຕັ້ງ ນຳໃຊ້ທາດເບື່ອ, ລະເບີດ, ອາວຸດ, ເຄື່ອງໄຟຟ້າ ຈັບສັດນ້ຳ ແບບດັບສູນ ແລະ ອື່ນໆ. ພ້ອມທັງຫ້າມຮັບເອົາ, ຊື້-ຂາຍ, ຄອບຄອງ ຫລື ຂົນສົ່ງສັດນໍ້າບັນຊີ I ໂດຍບໍ່ໄດ້ຮັບອະນຸຍາດ ຈາກພາກສ່ວນທີ່ກ່ຽວຂ້ອງ. ນອກຈາກນີ້, ຫ້າມບຸກລຸກ ວັງສະຫງວນ ຫລື ເຂດອະນຸລັກພັນສັດນໍ້າ, ຫ້າມຫາສັດນໍ້າ ໃນລະດູວາງໄຂ່ ແລະ ຫ້າມມີພຶດຕິກໍາອື່ນໆ ທີ່ເປັນການລະເມີດກົດໝາຍ ກໍລະນີພົບເຫັນຜູ້ລະເມີດຂໍ້ຫ້າມດັ່ງກ່າວ ຈະຖືກດຳເນີນມາດຕະການກ່າວເຕືອນ, ສຶກສາອົບຮົມ, ປັບໃໝ ແລະ ດຳເນີນຄະດີຢ່າງເຂັ້ມງວດ ຕາມແຕ່ລະກໍລະນີ ເບົາ ຫລື ໜັກ ທີ່ໄດ້ກຳນົດໄວ້ໃນກົດໝາຍ ວ່າດ້ວຍສັດນໍ້າ ແລະ ການປະມົງ.
ຂ່າວ: ຄໍາປິງ
