ສະຫງວນລິຂະສິດ © ສະຖານີ ວິທະຍຸກະຈາຍສຽງແຫ່ງຊາດລາວ

ວິທະຍຸກະຈາຍສຽງແຫ່ງຊາດລາວ

Lao National Radio

ຊົມເຊີຍ ວັນສ້າງຕັ້ງວິທະຍຸກະຈາຍສຽງແຫ່ງຊາດລາວ ຄົບຮອບ 60 ປີ
(13 ສິງຫາ 1960-13 ສິງຫາ 2020) ຢ່າງສຸດໃຈ

ເມືອງສອງຄອນ ມີເປົ້າໝາຍໃນເກນ ສັກວັກຊິນກັນມະເຮັງປາກມົດລູກ 3 ພັນກວ່າຄົນ

ໃນຕອນເຊົ້າຂອງວັນທີ 26 ພຶດສະພາ 2020 ນີ້ ທິມງານສູນການແພດແມ່ແລະເດັກ ກະຊວງສາທາລະນະສຸກ ແລະ ຊວງຖະແຫຼງຂ່າວ-ວັດທະນະທຳແລະທ່ອງທ່ຽວ ນຳໂດຍທ່ານ ວັນໄຊ ຕະວິນຍານ ຫົວໜ້າກົມນິຕິກຳ ກະຊວງຖະແຫຼງຂ່າວ – ວັດທະນະທຳແລະທ່ອງທ່ຽວ ໄດ້ລົງເຄື່ອນໄຫວຕິດຕາມ ຊູກຍູ້ ຂະບວນການວັກຊິນກັນມະເຮັງປາກມົດລູກ ພາຍໃນເມືອງສອງຄອນ ແຂວງສະຫວັນນະເຂດ ໂດຍມີພະນັກງານແພດໝໍ ຫ້ອງການສາທາລະນະສຸກເມືອງ, ໂຮງໝໍເມືອງ, ຫ້ອງການຖະແຫຼງຂ່າວ-ວັດທະນະທຳແລະທ່ອງທ່ຽວເມືອງ, ຫ້ອງການສະຫະພັນແມ່ຍິງເມືອງສອງຄອນເຂົ້າຮ່ວມ.

ດຣ ສີສະເຫວີຍ ດວງຈັນທາ ກຳມະການພັກເມືອງ ຫົວໜ້າຫ້ອງການ ສາທາລະນະສຸກເມືອງສອງຄອນ ໄດ້ລາຍງານ ການຈັດຕັ້ງປະຕິບັດຂະບວນການສັກວັກຊິນກັນມະເຮັງປາກມົດລູກພາຍໃນເມືອງສອງຄອນ ເຊິ່ງທາງຫ້ອງການໄດ້ເລີ່ມເປີດຊຸດອົບຮົມຊີ້ແຈ້ງກ່ຽວກັບການສັກຢາວັກຊິນກັນມະເຮັງປາກມົດລູກໃຫ້ເດັກໃນເກນອາຍຸ 10-14 ປີ ໃຫ້ບັນດາພະນັກງານແພດໝໍ ປະຈຳຢູ່ສຸກສາລາ ຫຼື ໂຮງໝໍນ້ອຍ ຈຳນວນ 15 ແຫ່ງໃນທົ່ວເມືອງສອງຄອນ, ມາຮອດປະຈຸບັນ ທາງທິມງານສາທາລະນະສຸກເມືອງ ແມ່ນໄດ້ເຄື່ອນໄຫວ ໃຫ້ບໍລິການສັກວັກຊິນກັນມະເຮັງປາກມົດລູກໃຫ້ ເດັກຍິງໃນເກນອາຍຸ 10-14 ປີ ໄດ້ທັງໝົດ 1,347 ຄົນ, ຂອງເປົ້າໝາຍທັງໝົດ 3,906 ຄົນ, ໃນນັ້ນນັກຮຽນໃນເກນອາຍຸ ມີ 3,430 ຄົນ, ຢູ່ໃນແຕ່ລະບ້ານ 476 ຄົນ, ເຊິ່ງແຜນການເຄື່ອນໄຫວຂອງທິມງານແຜດໝໍ ແມ່ນຈະໄດ້ຈັດຕັ້ງປະຕິບັດ ໃຫ້ການບໍລິການສັກວັກຊິນກັນມະເຮັງປາກມົດລູກໃຫ້ກຸ່ມເປົ້າໝາຍ 10-14 ປີ ລວມມີ 184 ຈຸດ ໃນນັ້ນ ຢູ່ໂຮງຮຽນ ມີ 42 ຈຸດ ແລະ ບ້ານ 142 ຈຸດ,  ກອງປະຊຸມແມ່ນຍັງໄດ້ມີການສະຫຼບຖອດຖອນບົດຮຽນ ຢ່າງກົງໄປກົງມາ ໂດຍເລັ່ງໃສ່ແກ້ໄຂຈຸດທີ່ເປັນຂອດຫຍຸ້ງຍາກໃນການປະຕິບັດໜ້າທີ່ຂອງທິມງານແພດໝໍ ເພື່ອຮັບປະກັນໃຫ້ ການບໍລິການສັກວັກຊິນກັນມະເຮັງປາກມົດລູກໃຫ້ເດັກຍິງເກນອາຍຸ 10-14 ປີ ໃນແຕ່ລະໂຮງຮຽນ ລວມໄປເຖິງເດັກຍິງທີ່ບ່ໍໄດ້ເຂົ້າໂຮງຮຽນໃນແຕ່ລະບ້ານ ໃຫ້ໄດ້ຢ່າງທົ່ວເຖິງ ແລະ ບັນລຸໄດ້ 100%  ສະນັ້ນ ຈຶ່ງຮຽກຮ້ອງໃຫ້ພໍ່ແມ່ປະຊາຊົນທີ່ມີລູກຫຼານເປັນເດັກຍິງທີ່ມີເກນອາຍຸ ລະດົມໃຫ້ເຂົາເຈົ້າໄດ້ຮັບການບໍລິການສັກວັກຊິນກັນມະເຮັງປາກມົດລູກ ເພາະມັນເປັນການປົກປ້ອງທີ່ດີທີ່ສຸດແກ່ເດັກຍິງ ເພາະວັກຊິນຊະນິດນີ້ຈະສ້າງພູມຄຸ້ມກັນຕ່ໍໄວຮັດ HPV ດີທີ່ສຸດກ່ອນອາຍຸ 15 ປີ, ວັກຊິນຊະນິດນີ້ແມ່ນມີຄວາມປອດໄພສູງ ແລະ ໄດ້ຮັບການອະນຸມັດຈາກອົງການອະນາໄມໂລກ ແລະ ໄດ້ນຳໃຊ້ໃນຫຼາຍໆປະເທດໃນທະວີບອາຊີແລະທະວີບອື່ນໆ.