ເມືອງສາມັກຄີໄຊຈັດພິທີສະເຫຼີມສະຫຼອງວັນປ່ອຍປາແຫ່ງຊາດ

ພິທີສະເຫຼີມສະຫຼອງວັນປ່ອຍປາແຫ່ງຊາດ ໄດ້ຈັດຂຶ້ນໃນວັນທີ 12 ກໍລະກົດ 2024 ນີ້ທີ່ນ້ຳໜອງລົມ ບ້ານຮົມເມືອງສາມັກຄີໄຊແຂວງອັດຕະປື ໂດຍເປັນກຽດເຂົ້າຮ່ວມຂອງທ່ານ ພິທູນ ມະວົງສາ ຄະນະປະຈຳພັກເມືອງ. ຮອງເຈົ້າເມືອງ ມີທ່ານ ທອງສະຫວັດ ສິດທິຈັກ ຮອງຫົວໜ້າພະແນກກະສິກຳ ແລະ ປ່າໄມ້ ແຂວງອັດຕະປື, ມີບັນດາຄະນະປະຈຳພັກ, ກຳມະການພັກເມືອງ, ຄະນະພະແນກທີ່ກ່ຽວຂ້ອງຂັ້ນແຂວງ ແລະ ເມືອງ, ຫົວໜ້າ-ຮອງຫ້ອງການ, ເລຂາພັກບ້ານອ້ອມຂ້າງເມືອງເຂົ້າຮ່ວມ

ທ່ານ ພິທູນ ມະວົງສາຄະນະປະຈຳພັກເມືອງ. ຮອງເຈົ້າ ເມືອງສາມັກຄີໄຊໄດ້ຜ່ານປະຫວັດຄວາມເປັນມາຂອງວັນປ່ອຍປາແຫ່ງຊາດວ່າ: ຊັບພະຍາກອນປ່າໄມ້, ສັດນໍ້າ – ສັດປ່າ ໃນ ສປປ ລາວ ເວົ້າລວມ ເວົ້າສະເພາະຢູ່ເມືອງສາມັກຄີໄຊ ເມື່ອສົມທຽບໃນເມື່ອກ່ອນກັບປະຈຸບັນນີ້ ແມ່ນມີຄວາມແຕກຕ່າງກັນຫຼາຍ, ຍ້ອນການທຳມາຫາກິນຂອງຄົນເຮົານັບມື້ນັບຫຼາຍຂຶ້ນ ແລະ ສະພາບແວດລ້ອມມີການປ່ຽນແປງເຊັ່ນ: ເກີດໄພແຫ້ງແລ້ງ, ນໍ້າຖ້ວມ ແລະ ອື່ນໆ, ເຮັດໃຫ້ສັດນ້ຳ-ສັດປ່າ, ທີ່ອາໄສຢູ່ຕາມພູຜາປ່າດົງ ແລະ ຫ້ວຍນໍ້າລໍາເຊຕ່າງໆຫຼຸດນ້ອຍຖອຍລົງ ສ້າງຜົນສະທ້ອນເຖິງການດໍາລົງຊີວິດຂອງຄົນເຮົາພົບກັບຄວາມຫຍຸ້ງຍາກຕໍ່ກັບບັນຫາດັງກ່າວນີ້, ດັງນັ້ນ, ພັກ-ລັດຈຶ່ງໄດ້ກຳນົດເອົາວັນທີ 13 ກໍລະກົດ ຂອງທຸກໆປີເປັນວັນອະນຸລັກສັດນໍ້າ-ສັດປ່ ແລະ ການປະມົງ(ວັນປ່ອຍປາແຫ່ງຊາດ)

ຂຶ້ນເພື່ອທົດແທນຈຳນວນສັດທີ່ສູນເສຍໄປເພື່ອແນໃສ່ການຂະຫຍາຍຕົວແນວພັນສັດ ແລະ ການຮັກສາແນວພັນສັດໃຫ້ມີໄວ້ແບບຍືນຍົງຊົ່ວເຊັ່ນລູກເຊັ່ນຫຼານ. ການປ່ອຍປາໃນຄັ້ງນີ້ມີປະເພດປາປາກ, ປານິນ, ປາໄນ ແລະ ປາພອນ ຊຶ່ງລວມທັງໝົດຈຳນວນ 5,760 000 ໂຕ ທຽບໃສ່ແຜນການປີລື່ນຄາດໝາຍ 1,02%

ຂ່າວ-ພາບ:ສ ລູກປາສ້ອຍເມືອງໄຕ້