ວິທະຍຸກະຈາຍສຽງແຫ່ງຊາດລາວ

Lao National Radio

ຕັ້ງໜ້າຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XI ຂອງພັກ ເຂົ້າສູ່ຊີວິດຈິງ
ສົບເບົາ ແມ່ນເມືອງໜຶ່ງຂອງ ແຂວງຫົວພັນ ທີ່ມີຊາຍແດນຕິດຈອດກັບ 3 ເມືອງຂອງແຂວງເຊີນລາ ສສ ຫວຽດນາມ ຄື: ເມືອງເວິນໂຮ່, ເມືອງມົກເຈົ່າ ແລະ ເມືອງລາດ ໂດຍມີການຮ່ວມມືແບບພິເສດຮອບດ້ານມາເປັນເວລາດົນນານ. ໃນນີ້, ສິ່ງສໍາຄັນທີ່ສຸດແມ່ນໄດ້ພ້ອມກັນເອົາໃຈໃສ່ແກ້ໄຂບັນຫາຫຍໍ້ທໍ້ໃນສັງຄົມຕ່າງໆ ທີ່ເຄີຍເກີດຂຶ້ນຢູ່ຕາມລຽບຊາຍແດນຂອງສອງປະເທດ.
ນອກຈາກນີ້, ສອງຝ່ານໄດ້ໃຫ້ການຊ່ວຍເຫຼືອເຊິ່ງກັນແລະກັນໃນຫຼາຍດ້ານ ໂດຍສະເພາະແມ່ນບັນດາເມືອງແຮກສ່ຽວຫວຽດນາມ ໄດ້ໃຫ້ການຊ່ວຍເຫຼືອເມືອງສົບເບົາດ້ານວິຊາການການປູກການລ້ຽງ ແລະ ຊ່ວຍດ້ານທຶນຮອນໃຫ້ກັບປະຊາຊົນລຽບຕາມຊາຍແດນ. ຝ່າຍຫວຽດນາມ ຍັງມີນະໂຍບາຍພິເສດຕໍ່ເມືອງສົບເບົາກ່ຽວກັບການປູກການລ້ຽງ ເຊິ່ງໃນໄລຍະຜ່ານມາ, ການຊ່ວຍເຫຼືອຂອງຫວຽດນາມໃຫ້ເມືອງສົບເບົາ ທີ່ສໍາຄັນແມ່ນການຊ່ວຍເຫຼືອດ້ານຊົນລະປະທານ ຫຼື ຄອງເໝືອງມິດຕະພາບລາວ-ຫວຽດນາມ ມູນຄ່າທັງໝົດ44 ຕື້ກວ່າກີບ.
ໄລຍະຜ່ານມາ, ກອງບັນຊາການທະຫານຊາຍແດນມົກເຈົ່າ ໄດ້ຊ່ວຍເຫຼືອແນວພັນງົວໃຫ້ເມືອງສົບເບົາ ຈໍານວນ 12 ບ້ານໃນຈຸດສຸມເຂດປ່າຮ່າງ ທັງໝົດ 50ໂຕ ມູນຄ່າ750 ກວ່າລ້ານດົງສະກຸນເງິນຫວຽດນາມ, ສະເພາະປີ 2023 ໄດ້ຮັບການຊ່ວຍເຫຼືອ 26 ໂຕ, ອາຫານ ແລະ ຕົ້ນທຶນຈໍານວນໜຶ່ງ ມູນຄ່າ 149 ລ້ານກວ່າດົງ. ນອກຈາກນີ້, ຍັງໄດ້ຊ່ວຍເຫຼືອດ້ານການປູກການລ້ຽງອື່ນໆ ໃນເມືອງສົບເບົາໃນໄລຍະປີ2019 ມີມູນຄ່າ 100 ກວ່າລ້ານດົງ, ປີ 2020 ມູນຄ່າ 50 ກວ່າລ້ານດົງ, ປີ 2021 ມູນຄ່າ 40 ກວ່າລ້ານດົງ,.
ພິເສດໃນປີ2023 ເມືອງເວິນໂຮ່ ໄດ້ໃຫ້ການຊ່ວຍເຫຼືອແນວພັນໝາກມີ້ 885 ຕົ້ນພ້ອມທັງປຸຍໃຫ້ 8ຄອບຄົວ ມູນຄ່າທັງໝົດ 166ລ້ານກວ່າດົງ. ຝ່າຍສສຫວຽດນາມຍັງໄດ້ອໍານວຍຄວາມສະດວກໃຫ້ປະຊາຊົນລຽບຕາມຊາຍແດນ ເຂົ້າໄປປິ່ນປົວສຸຂະພາບ ໄດ້ເປັນປົກກະຕິ ໂດຍບໍ່ຈໍາເປັນຕ້ອງມີວີຊາເຂົ້າອອກ.
ດ້ານວຽກງານປ້ອງກັນຊາດ ປ້ອງກັນຄວາມສະຫງົບ ພື້ນຖານແມ່ນໄດ້ສົມທົບແລກປ່ຽນເຊິ່ງກັນແລະກັນ ໂດຍການຜັດປ່ຽນກັນເປັນເຈົ້າພາບຈັດກອງປະຊຸມໃນແຕ່ລະປີ ເພື່ອປຶກສາຫາລື ແລະ ຖອດຖອນບົດຮຽນເຊິ່ງກັນ ແລະ ກັນ ເພື່ອເຮັດໃຫ້ເສັ້ນຊາຍແດນມີຄວາມສະຫງົບ, ຮ່ວມກັນພັດທະນາຮອບດ້ານ, ພ້ອມກັນແກ້ໄຂທຸກບັນຫາທີ່ເປັນປະກົດການຫຍໍ້ທໍ້ທີ່ເກີດຂຶ້ນ ໂດຍໄດ້ນຳເອົານິຕິກຳ, ກົດໝາຍຊາຍແດນຕ່າງໆ ລົງເຜີຍແຜ່ໃຫ້ປະຊາຊົນທັງສອງຝ່າຍລຽບຕາມຊາຍແດນໃຫ້ມີຄວາມເຂົ້າໃຈເຖິງການພົວພັນແບບພິເສດລະຫວ່າງລາວ-ຫວຽດນາມ ໂດຍສະເພາະແມ່ນ 21 ບ້ານຂອງເມືອງສົບເບົາທີ່ອາໃສຢູ່ລຽບຊາຍແດນຕິດກັບຫວຽດນາມ.