​ທ່ານ ເພັດສະໃໝ ພະບໍລິບູນ ວ່າການຫົວໜ້າຫ້ອງການກະສິກຳ ແລະ ປ່າໄມ້ ເມືອງຫີນບູນ ແຂວງຄຳມ່ວນ ໄດ້ລາຍງານກ່ຽວກັບການເກັບກ່ຽວເຂົ້ານາແຊງ ຂອງຊາວກະສິກອນໃນທົ່ວເມືອງຫີນບູນ ໃນວັນທີ 11 ພຶດສະພາ 2021 ໃຫ້ຮູ້ວ່າ: ໃນສົກປີ 2020-2021 ແຜນການຜະລິດເຂົ້ານາແຊງໃນທົ່ວເມືອງຫີນບູນ ແມ່ນ 1.085 ເຮັກຕາ ໃນຈຳນວນ 26 ໂຄງການຊົນລະປະທານ. ທາງຫ້ອງການກະສິກຳ ແລະ ປ່າໄມ້ເມືອງກໍ່ໄດ້ຈັດແບ່ງພະນັກງານລົງຕິດຕາມ, ຊຸກຍູ້ບັນດາບ້ານຕ່າງໆໃນຂອບເຂດຊົນລະ​ປະທານ ເຊິ່ງຜ່ານການຈັດຕັ້ງປະຕິບັດຕົວຈິງແມ່ນປະຕິບັດໄດ້ທັງໝົດ 1.120 ເຮັກຕາ ເທົ່າກັບ 103% (ລື່ນເນື້ອທີ່ແຜນການຈຳນວນ 35 ເຮັກຕາ) ມາຮອດປະຈຸບັນຊາວກະສິກອນແມ່ນໄດ້ລົງມື ເກັບກ່ຽວສຳເລັດເປັນສ່ວຍຫຼາຍແລ້ວ ໂດຍສະເລ່ຍແມ່ນປະມານ 85% ໃນເນື້ອທີ່ທົ່ວເມືອງ ເຊິ່ງຄາດວ່າຈະໃຫ້ ສຳເລັດການເກັບກ່ຽວ 100% ໃນກາງເດືອນພຶດສະພາ ນີ້, ສະເລ່ຍສະມັດຕະພາບ 5,7 ໂຕ່ນຕໍ່ເຮັກຕາ. ສຳລັບການຫ້າງ ຫາກະກຽມໃຫ້ແກ່ການຜະລິດເຂົ້ານາປີ 2021 ຕາມເນື້ອທີ່ແຜນການຈຳນວນ 8.850 ເຮັກຕາ. ເຊິ່ງທາງຫ້ອງການ ກະສິກຳ ແລະ ປ່າໄມ້ເມືອງກໍ່ໄດ້ມີການກະກຽມທາງດ້ານແນວພັນເຂົ້າຈຳນວນໜຶ່ງ ເພື່ອຕອບສະໜອງໃຫ້ແກ່ຊາວນາ ພ້ອມນັ້ນກໍ່ໄດ້ປະສານສົມທົບກັບອຳນາດການປົກຄອງບ້ານ ເພື່ອສຸມໃສ່ໃນການກວດກາ, ປັບປຸງ, ສ້ອມແປງ ບັນດາ ຊົນລະປະທານຕ່າງໆ ເພື່ອກຽມຄວາມພ້ອມຮັບມືກັບສະພາບ ດິນຟ້າອາກາດ ໂດຍສະເພາະແມ່ນກະກຽມຮັບມືກັບ ໄພແຫ້ງແລ້ງທີ່ອາດຈະເກີດຂຶ້ນ.
ຂ່າວ,​ພາບ: ແຂວງຄຳມ່ວນ
Loading...