ເມືອງຫົງສາ ມອບເງິນຊ່ວຍໄພນໍ້າຖ້ວມໃຫ້ແກ່ 3 ເມືອງ

ເພື່ອເປັນການປະກອບສ່ວນຊ່ວຍເຫຼືອຜູ້ປະສົບໄພພິບັດນ້ຳຖ້ວມຢ່າງຮ້າຍ ແຮງ ໃນຫຼາຍພື້ນທີ່ໃນຂອບເຂດ 3 ເມືອງຂອງແຂວງໄຊຍະບູລີ ຄື: ເມືອງເງິນ, ເມືອງຊຽງຮ່ອນ ແລະ ເມືອງຄອບ ທີ່ຜ່ານມາ. ອັນໄດ້ສົ່ງຜົນກະທົບຢ່າງໜັກໜ່ວງໃຫ້ແກ່ຊີວິດ, ຊັບສິນຂອງປະຊາຊົນກໍຄືໂຄງລ່າງພື້ນຖານໄດ້ຖືກທຳລາຍເປັນຈຳນວນ ຫຼວງ ຫຼາຍ ເພື່ອເປັນການປະກອບສ່ວນຊ່ວຍເຫຼືອປະຊາຊົນ ຜູ້ທີ່ປະສົບໄພທຳມະຊາດຄັ້ງນີ້ ໃຫ້ຜ່ານຜ່າຄວາມຫຍຸ້ງຍາກ ແລະ ສາມາດກັບຄືນສູ່ການດຳລົງຊີວິດຢ່າງເປັນປົກ ກະຕິໂດຍໄວ.

ໃນວັນທີ 26 ສິງຫາຜ່ານມານີ້, ທ່ານ ພອນສະຫວັນ ໄຊສົມພັນ ເລຂາພັກເມືອງ ເຈົ້າເມືອງໆຫົງສາຕາງໜ້າຄະນະພັກ, ອົງການປົກຄອງເມືອງ ແລະ ປະຊາຊົນພາຍໃນເມືອງ ໄດ້ໄປມອບເງິນຊ່ວຍເຫຼືອໃຫ້ແກ່ 3 ເມືອງດັ່ງກ່າວຄື: ມອບໃຫ້ເມືອງເງິນ 15 ລ້ານກີບ, ເມືອງຊຽງຮ່ອນ ເງິນສົດ 10 ລ້ານກີບ, ນໍ້າດື່ມ ມູນຄ່າ 1 ລ້ານ 3 ແສນກີບ ແລະ ເມືອງຄອບ ເງິນສົດ 20 ລ້ານກີບ, ນ້ຳດື່ມ ມູນຄ່າ 1 ລ້ານ 3 ແສນກີບ. ຫຼັງຈາກນັ້ນ, ການນໍາຂອງເມືອງຄອບໄດ້ນຳພາທ່ານເຈົ້າເມືອງຫົງສາ ພ້ອມດ້ວຍຄະນະນຳ ລົງພື້ນທີ່ເບິ່ງສະພາບລວມຂອງປະຊາຊົນທີ່ຖືກຜົນກະທົບຈາກໄພ ພິບັດທຳມະຊາດ ຄັ້ງນີ້.

ພາບ-ຂ່າວ: ກິດຕິສັກ ບົວໄລ