ສະຫງວນລິຂະສິດ © ສະຖານີ ວິທະຍຸກະຈາຍສຽງແຫ່ງຊາດລາວ

ວິທະຍຸກະຈາຍສຽງແຫ່ງຊາດລາວ

Lao National Radio

ຊົມເຊີຍ ວັນສ້າງຕັ້ງວິທະຍຸກະຈາຍສຽງແຫ່ງຊາດລາວ ຄົບຮອບ 60 ປີ
(13 ສິງຫາ 1960-13 ສິງຫາ 2020) ຢ່າງສຸດໃຈ

ເມືອງຫົງສາ ສ້າງຂະບວນການອອກແຮງງານອະນາໄມ ເພື່ອປ້ອງກັນ ແລະ ຄວບຄຸມການລະບາດພະຍາດໄຂ້ຍຸງລາຍ.

ເພື່ອເຮັດໃຫ້ການສ້າງຂະບວນການອະນາໄມ ທຳລາຍແຫຼ່ງເພາະພັນຂອງໜອນຍຸງໃຫ້ເປັນຂະບວນທີ່ຟົດຟື້ນ, ເຮັດໃຫ້ຕົວເມືອງມີຄວາມສະອາດງາມຕາເປັນລະບຽບຮຽບຮ້ອຍ ແລະ ເພື່ອກຽມຄວາມພ້ອມໃຫ້ແກ່ການລົງຕິດຕາມຊຸກຍູ້ ຂອງທ່ານປະທານຄະນະກຳມະທິການ ປ້ອງກັນ ແລະ ຄວບຄຸມການລະບາດພະຍາດໄຂ້ຍຸງລາຍ ຂັ້ນແຂວງ ເວົ້າລວມ ເວົ້າສະເພາະ ກໍ່ຄືເມືອງຫົງສາ ຈຶ່ງໄດ້ສ້າງຂະບວນການອອກແຮງງານອະນາໄມລວມຂຶ້ນໃນຕອນເຊົ້າຂອງວັນທີ 15 ພຶດສະພາ 2020 ຢູ່ທີ່ສະໜາມກິລາຂອງເມືອງ. ໂດຍມີທ່ານ ນາງ ດາວວິນ ລາດຊະກິດ ຮອງເລຂາພັກເມືອງ ຫົງສາ ຜູ້ຊີ້ນຳວຽກງານການເມືອງແນວຄິດ ພັກ-ພະນັກງານ, ມີຫົວໜ້າຫ້ອງການ, ທະຫານ, ຕຳຫລວດ, ພະນັກງານ​ແຕ່ລະຫ້ອງການ, ນາຍບ້ານສອງບ້ານຄື: ບ້ານໂພນສະອາດ ແລະ ບ້ານໂພນໄຊ ຕະຫລອດຮອດພໍ່ແມ່ປະຊາຊົນພາຍໃນບ້ານ ເຂົ້າຮ່ວມຢ່າງພ້ອມພຽງ.

ໃນໂອກາດນີ້, ທ່ານ ນາງ ດາວວິນ ລາດຊະກິດ ກໍໄດ້ໃຫ້ຮູ້​ກ່ຽວກັບຊີວິດວົງຈອນຂອງຍຸງ ແລະ ພະຍາດໄຂ້ຍຸງ. ເພື່ອສ້າງຄວາມຮູ້, ຄວາມເຂົ້າໃຈກ່ຽວກັບຜົນຮ້າຍ ແລະ ວິທີປ້ອງກັນໄຂ້ຍຸງລາຍ ໃຫ້ພະນັກງານ ຕະຫຼອດຮອດພໍ່ແມ່ປະຊາຊົນໄດ້ມີສະຕິລະວັງຕົວ, ຮ່ວມແຮງຮ່ວມໃຈກັນຕ້ານ ແລະ ສະກັດກັ້ນພະຍາດໄຂ້ຍຸງລາຍ ບໍ່ໃຫ້ມີການແຜ່ລະບາດ.

ຫຼັງຈາກນັ້ນ, ແຕ່ລະພາກສ່ວນໄດ້ສາມັກຄີກັນສ້າງຂະບວນການອອກແຮງງານລວມຢ່າງຕັ້ງໜ້າ ໂດຍແບ່ງກັນອອກແຮງງານຕາມເສັ້ນທາງຕ່າງໆ ໃນຕົວເມືອງ ໂດຍການຖາງຫຍ້າທີ່ຮົກເຮື້ອ, ຕັດຫຍ້າ ແລະ ເກັບຂີ້ເຫຍື້ອຕາມສອງຟາກທາງໃຫ້ມີຄວາມສະອາດຈົບງາມ.

ທ່ານ ດຣ ສົມບູນ ທຳມະລັດ ຫົວໜ້າຫ້ອງການ ສາທາລະນະສຸກເມືອງຫົງສາ ໄດ້ຮຽກຮ້ອງມາຍັງພໍ່ແມ່ປະຊາຊົນພາຍໃນສອງບ້ານ ກໍ່ຄືທົ່ວ ເມືອງຫົງສາ ຈົ່ງເປັນເຈົ້າການຮ່ວມກັນໃນການປ້ອງກັນພະຍາດໄຂ້ຍຸງລາຍ ດ້ວຍການຮັກສາອະນາໄມສາມສະອາດ, ອະນາໄມສະຖານທີ່ອ້ອມຮອບບ້ານເຮືອນ ເອົາ​ໃຈ​ໃສ່​ປະຕິບັດ​ 5  ປໍ​ ເປັນປະຈໍາທຸກໆ ອາທິດ, ຄຽງຄູ່ກັນນັ້ນ, ກໍ່ໃຫ້ມີສະຕິເຝົ້າ​ລະວັງ ແລະ ປ້ອງກັນພະຍາດໂຄວິດ 19 ນໍາອີກດ້ວຍ.

ຂ່າວ​: ກິດ​ຕິ​ສັກ​ ບົວໄລ