ວັນທີ 27 ມິຖຸນາ 2024 ຫ້ອງການຖະແຫຼງຂ່າວ, ວັດທະນະທຳ ແລະທ່ອງທ່ຽວ ເມືອງອາດສະພອນ ໄດ້ສົມທົບກັບ ອົງການປົກຄອງບ້ານ ແລະພໍ່ແມ່ປະຊາຊົນຊາວບ້ານ ດົງຂັນຄຳ, ໄດ້ຈັດພິທີປ່ອຍກະປູແດງຄືນສູ່ທຳມະຊາດ ຢູ່ທີ່ ວັດປ່າ ເຂດປ່າສະຫງວນ ຂອງບ້ານດັ່ງກ່າວ,.
ເພື່ອເປັນການອະນຸລັກ, ການຂະຫຍາຍພັນກະປູແດງ ບໍ່ໃຫ້ດັບສູນຢູ່ຕາມທຳມະຊາດ ເປັນການປົກປັກຮັກສາລະບົບນິເວດ ແລະສະບຽງອາຫານທາງດ້ານທຳມະຊາດ ພ້ອມທັງເປັນການພັດທະນາສະຖານທີ່ແຫຼ່ງທ່ອງທ່ຽວ ທາງດ້ານທຳມະຊາດ ແລະ ວັດທະນະທຳ ໃຫ້ມີຄວາມອຸດົມສົມບູນ, ເຮັດໃຫ້ພື້ນທີ່ ທີ່ຢູ່ອາໄສຂອງກະປູແດງ ແລະສັດສາວາສິ່ງນາໆຊະນິດໄດ້ມີການຂະຫຍາຍພັນສະດວກສະບາຍຕາມລະດູການ.
ພື້ນທີ່ດັ່ງກ່າວ ແມ່ນປ່າສະຫງວນເຂດຄຸ້ມຄອງຂອງບ້ານດົງຂັນຄຳ ເມືອງອາດສະພອນ ມີເນື້ອທີ່ລວມທັງໝົດ 30 ກ່ວາເຮັກຕາ ເປັນປ່າດົງດິບອັນມີຄວາມອຸດົມສົມບູນທາງດ້ານທຳມະຊາດ ແລະທັງເປັນພື້ນທີ່ຕ້ອງຫ້າມຂອງບ້ານ ເຊິ່ງມີກົດລະບຽບການຄຸ້ມຄອງຂອງບ້ານຄົບຖ້ວນແລ້ວ, ການຈັດພິທີປ່ອຍກະປູແດງໃນຄັ້ງນີ້ກໍ່ເພື່ອເປັນການສ້າງຂະບວນການ ຮັບຕ້ອນວັນອະນຸລັກສັດນ້ຳ-ສັດປ່າ ແລະວັນປ່ອຍປາແຫ່ງຊາດ 13 ກໍລະກົດ ທີ່ຈະໝູນວຽນມາອີກວາລະໜຶ່ງໃນມໍ່ໆນີ້.
ຂ່າວ: ຫ້ອງການ ຖວທ ເມືອງອາດສະພອນ.
