ເນື່ອງໃນໂອກາດວັນປ່ອຍປາ ແລະ ສັດນໍ້າ ແຫ່ງຊາດ 13 ກໍລະກົດ 2024 ໄດ້ໜູນວຽນມາບັນຈົບຄົບຮອບອີກວາລະໜຶ່ງ ມາໃນ ວັນທີ 12 ກໍລະກົດ 2024 ນີ້ ຢູ່ທີ່ອ່າງເກັບນໍ້າຫ້ວຍນານ້ອຍ ເມືອງເງິນ ແຂວງ ໄຊຍະບູລີ ໄດ້ຈັດພິທີປ່ອຍປາ ແລະ ສັດນ້ຳແຫ່ງຊາດ ໂດຍໃຫ້ກຽດເຂົ້າຮ່ວມພິທີ ມີທ່ານ ທະວີສັກ ໄຊຍະວົງ ເຈົ້າເມືອງໆເງິນ, ທ່ານ ຍຸດທະນາ ຈຸນພັນທອງ ຜູ້ອໍານວຍການສາຍງານກິດຈະການອົງກອນ ບໍລິສັດໄຟຟ້າຫົງສາ, ມີການນຳເມືອງ ແລະ ພາກສ່ວນກ່ຽວຂ້ອງເຂົ້າຮ່ວມ.
ທ່ານ ທະວີສັກ ໄຊຍະວົງ ໄດ້ກ່າວວ່າ: ເພື່ອເປັນການຈັດຕັ້ງຜັນຂະຫຍາຍກົດໝາຍ ວ່າດ້ວຍສັດນ້ຳ ແລະ ການປະມົງ (ສະບັບປັບປຸງ) ແລະບັນດານິຕິກຳຕ່າງໆທີ່ກ່ຽວຂ້ອງ, ໃນໄລຍະທີ່ຜ່ານມາ ການນຳຂັ້ນຕ່າງໆກໍໄດ້ເອົາໃຈໃສ່ນໍາພາ ແລະ ຊີ້ນໍາຕໍ່ກັບການປົກປັກຮັກສາ, ການອະນຸລັກປ່າໄມ້, ສັດນ້ຳ ແລະ ສັດປ່າ ທັງນີ້ກໍເພື່ອແນໃສ່ເຮັດໃຫ້ຊັບພະຍາກອນປ່າໄມ້, ສັດນ້ຳ ແລະ ສັດປ່າ ໄດ້ຮັບການຄຸ້ມຄອງ ແລະ ເພີ່ມຄວາມອຸດົມສົມບູນໃຫ້ແກ່ທໍາມະຊາດ, ມີການຄຸ້ມຄອງນຳໃຊ້ແບບຍືນຍົງຕາມນະໂຍບາຍວາງອອກ ໂດຍບໍ່ມີວັນບົກແຫ້ງ.
ສະເພາະ ປີ 2024 ເມືອງເງິນມີແຜນສູ້ຊົນປ່ອຍປາໃຫ້ໄດ້ 570.000 ໂຕ, ໃນນີ້, ໄດ້ປ່ອຍກ່ອນວັນທີ 13 ກໍລະກົດ 2024 ຈໍານວນ 361.000 ໂຕ ແລະ ຈະນຳໄປປ່ອຍຫຼັງວັນທີ 13 ກໍລະກົດ 2024 ຈໍານວນ 173.000 ໂຕ, ສຳລັບພິທີປ່ອຍປາ ເພື່ອສະເຫຼີມສະຫຼອງວັນປ່ອຍປາ ແລະ ສັດນ້ຳແຫ່ງຊາດ ປີນີ້ ຈຳນວນ 36.000 ໂຕ ມີ 4 ຈຸດໃນທົ່ວເມືອງ ຄື: ອ່າງເກັບນໍ້າຫ້ວຍນານ້ອຍ 15.000 ໂຕ, ອ່າງເກັບນໍ້າຫ້ວຍເພຍງາມ 7.000 ໂຕ, ວັງສະຫງວນບ້ານຂອນ 7000 ໂຕ, ວັງສະຫງວນຝາຍນໍ້າເງິນ 7000 ໂຕ ແລະ ປ່ອຍລົງແຫຼ່ງນໍ້າທໍາມະຊາດອີກຈໍານວນໜຶ່ງ, ປາທີ່ປ່ອຍໃນປີນີ້ ປະກອບມີ ຄື: ປານິນ, ປາໄນ, ປາປາກ ແລະ ປາອິນເດຍ.
ຂ່າວ-ພາບ: ສຸລີຍາ ແສງເດືອນ
