ສະຫງວນລິຂະສິດ © ສະຖານີ ວິທະຍຸກະຈາຍສຽງແຫ່ງຊາດລາວ

ວິທະຍຸກະຈາຍສຽງແຫ່ງຊາດລາວ

Lao National Radio

ຊົມເຊີຍ ວັນສ້າງຕັ້ງວິທະຍຸກະຈາຍສຽງແຫ່ງຊາດລາວ ຄົບຮອບ 60 ປີ
(13 ສິງຫາ 1960-13 ສິງຫາ 2020) ຢ່າງສຸດໃຈ

ເມືອງເງິນ ເປີດກອງປະຊຸມ ຜູ້ບໍລິຫານການສຶກສາປະຈໍາສົກຮຽນ 2019-2020

ກອງປະຊຸມ ຜູ້ບໍລິຫານການສຶກສາປະຈໍາສົກຮຽນ 2019-2020 ທົ່ວເມືອງເງິນ ໄດ້ໄຂຂຶ້ນໃນລະຫວ່າງ ວັນທີ 28-29 ກັນຍາ 2020ນີ້ ຢູ່ທີ່ສະໂມສອນໃຫຍ່  ເມືອງເງິນ ແຂວງໄຊຍະບູລີ. ພາຍໃຕ້ການເປັນປະທານ ຂອງທ່ານ ຊູລິສິດ ຄຳພູວົງ ກຳມະການພັກເມືອງ ຫົວໜ້າຫ້ອງການສຶກສາທິການ ແລະ ກິລາເມືອງ, ເຂົ້າຮ່ວມເປັນກຽດມີທ່ານ ສີທະນົນໄຊ ທອງເທພາ ຮອງເຈົ້າເມືອງ, ມີທ່ານ ອອ່ນຕາ ພົມມະຈິດ ຫົວໜ້າພະແນກສຶກສາທິການ ແລະ ກິລາແຂວງ,  ມີຄະນະພັດທະນາການສຶກສາຂັ້ນເມືອງ-ຂັ້ນບ້ານ, ນາຍບ້ານເທດສະບານເມືອງ, ຫົວໜ້າຫ້ອງການ, ກົມກອງ ອຳນວຍການໂຮງຮຽນອານຸບານ, ປະຖົມ, ມັດທະຍົມ, ຕະຫຼອດຮອດຄູ-ອາຈານ, ພະນັກງານວິຊາການຫ້ອງການສຶກສາທິການ ແລະ ກິລາເຂົ້າຮ່ວມ.

ໂອກາດນີ້ ທ່ານ ຊູລິສິດ ຄຳພູວົງ ກຳມະການພັກເມືອງ ຫົວໜ້າຫ້ອງການສຶກສາທິການ ແລະ ກິລາເມືອງ ໄດ້ເປັນກຽດຂຶ້ນກ່າວເປີດກອງປະຊຸມຜູ້ບໍລິຫານການສຶກສາປະຈໍາສົກຮຽນ 2019-2020 ຢ່າງເປັນທາງການ. ພ້ອມທັງໄດ້ສືບຕໍ່ຜ່ານເອກະສານທີ່ສໍາຄັນຂອງຂະແໜງການສຶກສາ ຈໍານວນໜຶ່ງເຊັ່ນ: ມະຕິ ກອງປະຊຸມຜູ້ບໍລິຫານການສຶກສາທິການ ແລະ ກິລາ ທົ່ວປະເທດ ແລະ ທົ່ວແຂວງໄຊຍະບູລີ, ຄຳແນະນຳການປະເມີນຜົນມາດຕະຖານ 3 ສ້າງຂອງຂະແໜງການສຶກສາທິການ ແລະ ກິລາ.

ຈາກນັ້ນ, ກອງປະຊຸມໄດ້ຮັບຟັງ ການຜ່ານຮ່າງບົດສະຫຼຸບສົກຮຽນ 2019-2020 ແລະ ຜ່ານແຜນພັດທະນາການສຶກສາທິການ ແລະກິລາ ສົກຮຽນ 2020-2021 ແລະ ບົດວິເຄາະ ຕົວຊີ້ບອກ ດ້ານການສຶກສາ, ບົດວິເຄາະ  ວິໄຈ ສະພາບການສຶກສາໃນທົ່ວເມືອງ ແລະ ຜົນການຮຽນ ຊັ້ນປະຖົມ, ມັດທະຍົມ ປະຈຳສົກຮຽນ 2019-2020

ໂອກາດດຽວກັນນີ້ ຜູ້ແທນກອງປະຊຸມ ຍັງໄດ້ພ້ອມກັນ ປະກອບຄຳຄິດເຫັນ ຕີລາຄາຄືນຕໍ່ວຽກງານການສຶກສາ ໃນໄລຍະຜ່ານມາ ຊອກໃຫ້ເຫັນຈຸດດີ-ຂໍ້ຄົງຄ້າງ ແລະ ພ້ອມກັນຄົ້ນຄວ້າ ແລກປ່ຽນບົດຮຽນເຊິ່ງກັນແລະກັນເພື່ອຫາວິທີແກ້ໄຂໃນຕໍ່ໜ້າ.

ໂດຍ: ອິນແປງ ແຫວນຄຳ